آلاء: أنا قولتلك يا غبية، ما تبينيش إنك مدلوقة، مش تتجاهليه بالغباء دا، انتي كدا هطفشيه، انتي مش بتشوفي البنات بتبصلوا ازاي؟
جني: ما تفكرنيش، كل ما افتكر ازاي كان بيتكلم مع البت المسهوكة في النادي، عفاريت الدنيا بتتنطط في وشي.
هايدي: سيبك منها، البت دي هتغرقك، انتي اتعاملي معاه بطبيعتك وما تعنديش فيه، كل ما تشوفيه، عمر مش بيحب العند، اسمعي كلامي.
آلاء: اسكتي يا هابلة انتي وهي، دا كل ما تتقل حبه تزيد محبة، انتي ما بتشوفيش في الروايات البطلة بتفضل تعاند في البطل وهو بيموت فيها؟
هايدي: والنبي ما موديكي في داهية غير الروايات اللي بتقريها دي.
جني: بااااااااس، انتي وهي فكروا معايا، أخليه ازاي يشوفني زي البنات اللي بيعرفهم؟ مش كل ما يتكلم معايا يحسسني إني لسة عيلة صغيرة.
آلاء: عندي فكرة، احنا نوهمه إن في واحد بيحبك وبتكلميه في الفون، فهو يغير عليكي ويعترف بحبه.
جني: آها يا صلاة النبي، دا كان هو وفهد أذوني.
هايدي: اسكتي يا بت بأفكارك المهببة دي، أنا رأي إنها تلفت نظره باهتمامها بيه، إنها تسمع كلامه مش العند والعبط دا.
جني: مهو أنا بعمل كدا وبرضو زي ما يكون مش شايفني.
آلاء: حيرتينا معاكي، قومي أنا جوعت أوي، يلا بينا نروح نقعد شوية في النادي بدل جو الخنيق دا، وناكل لينا لقمة.
جني وهايدي: أوك يلا بينا.
في غرفة المكتب.
الجد سليم: يعني كله تمام يا دكتور؟ أومال التأخير من إيه؟
الدكتور: هي مسألة وقت مش أكتر، وأنا كتبتلها على شوية تحليل، بس بردو لازم فهد باشا يعمل تحليل هو كمان، عشان ممكن يكون عنده مشاكل هي اللي ماخرة الحمل.
الجد سليم: يعني هو كمان لازم يكشف؟
الدكتور: ضروري طبعًا، عشان لو في مشكلة لا قدر الله نبدأ بالعلاج، كل ما كان التدخل أسرع كل ما كانت النتيجة أحسن.
الجد سليم: بإذن الله، شكرًا ليك يا دكتور، هكلم حضرتك في أقرب وقت.
يقفل الجد الهاتف وهو في حيرة كيف سيقنع فهد بالذهاب لعمل الكشف والتحليل.
الجد سليم: لازم يروح، أنا نفسي أطمن عليه قبل ما أموت.
في بيت أم سارة.
أم سارة: ها يا بنتي رنيتي عليها؟
سارة: أيوة يا ماما، اتصلت عليها وبرضو مغلق.
أم سارة بقلق: أنا قلبي واكلني عليها، ما كانش لازم تنزل لواحدها، كنتي روحي انتي ولا أنا معاها. يا عالم يا بنتي إيه اللي حصل.
يرن جرس الباب، فتجري سارة، تفتح الباب بسرعة لتدخل ملك بإرهاق.
ملك: السلام عليكم.
أم سارة وسارة: وعليكم السلام.
أم سارة: كدا يا بنتي قلقتيني عليكي.
ملك: معلش يا طنط، سَرقني الوقت وأنا ماشية.
سارة: هاا احكيلنا عملتي إيه؟
ملك بصوت باكي: اتنصب عليا، اخد الفلوس وصفي الشركة وسافر.
أم سارة وهي تلطم على صدرها: يا حبيبتي يا بنتي، عوضك على الله.
سارة: منه لله الحرامي، حبيبتي ما تزعليش نفسك، الزعل مش هيرجعلك الفلوس.
ملك: حسبي الله ونعم الوكيل، مش عارفة هعمل إيه في الأيام الجاية، الكلية على الأبواب وعوزة أدفع المصاريف وأجيب الكتب وكمان لبس للكلية.
أم سارة: قومي يا حبيبتي اغسلي وشك وكولي لقمة، وإن شاء الله كله هيتدبر.
ملك: لا أنا هقوم أدخل أنام، مش قادرة.
أم سارة: كدا غلط يا حبيبتي، هتقعي من طولك. قومي يا سارة جهزي الأكل يلا.
سارة: حاضر يا ماما.
تجلس ملك بحزن وهي تدعي ربها بحل مشكلتها.
في إحدى الشركات التابعة لعائلة سالم المهدي، في مكتب فهد.
فهد لشريف: كدا كل الورق الخاص بالمشروع جاهز على الإمضا؟ تمام.
شريف: أيوة يا بوص، كدا كله تمام.
فهد: طيب في حاجة تاني عوزها مني؟
شريف: انت هتروح دلوقت؟
فهد: أيوة يا سيدي، لازم جدي يشوف الورق النهاردة عشان يقول رأيه النهائي.
شريف: طيب وراك حاجة بالليل؟
فهد: مش عارف، لسة هبقي أكلمك، لو مفيش حاجة هتصل بيك نسهر مع بعض.
شريف: تمام. آها، من حق منيرة السكرتيرة عوزة إجازة وضع 3 شهور، ولازم نشوف واحدة مكانها.
فهد: طيب اعمل اللازم، بس اختار واحدة صح، مش زي الأشكال اللي بتجبهالنا.
شريف ببراءة: أنا يا بوص؟ الله يسامحك.
فهد وهو ينهض: يلا سلام عشان ما أتأخرش.
شريف: سلام يا بوص.
شريف أحمد الهواري، 30 سنة، صديق فهد المقرب وذراعه اليمين، محل ثقة لفهد وكاتم أسراره، من أصول صعيدية، يعشق السهر، وبرغم الكثير من علاقاته النسائية، إلا أنه لم يجد حتى الآن من تمتلك قلبه المتمرد.
في عربية أم روجيدة.
أم روجيدة: كدا بقي مالهومش حجة، ومفيش حد فيهم هيضايقك تاني.
روجيدة: والله مفيش حد بيضايقني غير جده، هو اللي نازل زن عاوز حفيد، لكن فهد بحس إنه مكبر دماغه، ودا اللي مطمني.
