Uncategorizedروايات وقصص

المريله الزرقا

مش مشكلة نبدأ باللي عندك
قالت بعصبية
إنتي ليه مصممة تحسسيني إني حرامية؟
رديت عليها
أنا مقلتش كده ولا هقول كده قبل ما أشوف الحقيقة
شريف قال
خلاص بكرة الصبح هنروح بيت جدتك ونشوف الفواتير وكل حاجة موجودة هناك
نهى اتوترت وقالت
روايات_مشيره_محمد
بكرة مش هينفع
سألها
ليه؟
قالت
عندي مشوار
شريف قال
المشوار يتأجل
نهى سكتت وبصت لماما كأنها مستنية منها تتدخل
لكن المرة دي ماما ما اتكلمتش
خلص العشا من غير ما حد يكمل أكله
وأنا رجعت بيتي متأخرة وأنا بفكر في كل كلمة اتقالت
فضلت طول الليل أقلب في ذكرياتي مع جدتي
افتكرت الأيام اللي كنت بصحى فيها قبل الفجر عشان أديها الدواء
وافتكرت لما كانت بتصحى بالليل وتنده عليا عشان تشرب مية
وافتكرت إزاي كانت بتفرح لما أرجع من الشغل وأحكيلها حصل إيه في يومي
لكن أكتر حاجة افتكرتها كانت جملتها اللي قالتها لي قبل ما أمشي من بيتها بفترة قصيرة
قالتلي يومها
خلي بالك يا سامية من الورق يا بنتي
استغربت وسألتها
ورق إيه يا تيتة؟
قالتلي
ورق الحسابات والأوراق المهمة متخليش حد يضيعها
ضحكت وقلتلها
هو أنا هضيع حاجة يا تيتة؟
قالتلي
أنا مش خايفة عليكي من الضياع أنا خايفة عليكي من إنك تسكتي لما تعرفي إن فيه حاجة غلط
وقتها مفهمتش هي تقصد إيه
لكن دلوقتي بدأت أحس إن جدتي كانت شايفة حاجات أنا مكنتش واخدة بالي منها
تاني يوم الصبح شريف كلمني وقاللي إنه مستنيني قدام بيت جدتي
وصلت لقيته واقف مع نهى وماما وبابا
البيت كان مقفول من فترة لكن لسه محتفظ بريحة جدتي
أول ما دخلت حسيت إني رجعت بالزمن
الصالون زي ما هو والساعة القديمة لسه فوق الحيطة والستارة البنية اللي كانت جدتي بتحبها لسه موجودة
لكن كان فيه حاجات كتير ناقصة
المكتبة الصغيرة اللي كانت جنب الشباك اختفت
والكرسي الخشب اللي كانت بتقعد عليه اختفى
وحتى السجادة اللي كانت في طرقة الأوض اختفت
سألت نهى
الحاجات دي راحت فين؟
قالت
اتشالت عشان البيت كان محتاج يتفضى
قلتلها
اتخزنت فين؟
قالت
في مخزن
شريف سألها
أنهي مخزن؟
قالت
مخزن قريب من البيت
شريف قال
هاتيلنا عقد التخزين
نهى بصتله وقالت
مش فاكرة العقد فين
قلت لها
طب خلينا نشوف المطبخ الأول
دخلنا المطبخ وبدأت أبص على الحيطان والأرضية
السباكة القديمة كانت زي ما هي تقريبا
والحنفية اللي كانت بتنقط كل شوية لسه موجودة
أما الكهرباء فكانت سليمة وكل المفاتيح شغالة
بصيت لشريف وقلتله
إنت شايف أي تجديد هنا؟
مردش
فتح درج المطبخ وبدأ يدور على أي فواتير
نهى قالت
أنا نقلت كل الورق المهم في كرتونة
قلتلها
فين الكرتونة؟
قالت
مش عارفة يمكن في الصالة
بدأنا ندور ولقينا كراتين كتير متكومة في أوضة جدتي
لكن الكراتين اللي كان مكتوب عليها حاجات جدتي كانت أغلبها فاضية

شريف فتح واحدة ولقى فيها صور قديمة وكتب وعلبة نظارات
أما أنا فكنت بدور على ملف الحسابات القديم
لقيته في آخر درج في دولاب الطرقة
فتحته وبدأت أقلب في الأوراق
كان فيه نسخة من الاتفاق اللي جدتي عملته معايا ونسخ من التقارير الشهرية الخمسة والستين
لكن كان فيه ظرف أبيض صغير مكتوب عليه بخط جدتي
لسامية
قلبي دق بسرعة
فتحت الظرف ولقيت ورقة مطوية بخطها
كان مكتوب فيها
يا سامية يا بنتي
لو إنتي بتقري الورقة دي يبقى أنا مش موجودة معاكي
أنا عارفة إنك تعبتي عشاني كتير وعارفة إنك ساعات بتفتكري إنك ضيعتي مستقبلك بسببي
بس أنا عمري ما طلبت منك تضيعي نفسك
أنا اللي طلبت منك تساعديني لأنك كنتي الوحيدة اللي كنت بحس معاها إني لسه عايشة في بيتي مش قاعدة في مستشفى
خلي بالك من نفسك ومن حقك
والأهم متخليش حد يحسسك إن تعبك ملوش قيمة
بحبك يا بنتي
فريدة
وقفت مكاني وأنا ماسكة الورقة ومش قادرة أتكلم
شريف قرب مني وسألني
في إيه؟
مديتله الورقة وخدها وقراها
ماما كانت واقفة بعيد وبصت لنا وقالت
هي كانت كاتبة إيه؟
قلتلها
رسالة ليا
نهى قالت
يعني مفيش حاجة تانية؟
بصيتلها باستغراب
تقصدّي إيه؟
قالت بسرعة
ولا حاجة
رجعت أقلب في الملف ولقيت ورقة تانية مختلفة عن باقي الأوراق
كانت صورة من خطاب رسمي صادر من البنك قبل وفاة جدتي بشهرين
الخطاب كان بيأكد إن الصندوق المالي لازم يحتفظ بفواتير أصلية لأي مصروفات كبيرة وإن أي مبلغ يتصرف على ترميم البيت لازم يكون فيه تقرير من فني معتمد
وتحت الخطاب كان فيه ملاحظة مكتوبة بخط جدتي
لا يتم بيع أو نقل أي قطعة من أثاث البيت إلا بعد الرجوع إلي
بصيت لشريف وقلتله
هو الكلام ده كان موجود في الملف؟
قال
أيوه بس أنا محتاج أراجع النسخة الأصلية في البنك
نهى قربت وقالت
إنتوا مكبرين الموضوع ليه؟ البيت كان محتاج يتنضف وأنا شلت حاجات كتير عشان أقدر أشتغل
شريف قال
محدش بيتهمك بحاجة لكن لازم نعرف الحاجات دي راحت فين
في اللحظة دي رن موبايل نهى
بصت للشاشة وخرجت بره الأوضة
أنا فضلت مكاني وبدأت أراجع التواريخ
وفجأة لاحظت حاجة غريبة
كل الفواتير الكبيرة كانت بتاريخ واحد تقريبا
خلال شهرين بس
والأغرب إن بعض الفواتير كانت قبل التاريخ اللي نهى استلمت فيه مسؤولية رعاية جدتي
ناديت شريف ووريته
قال باستغراب
إزاي الفواتير دي بتاريخ قديم؟
نهى رجعت في اللحظة دي وسمعت كلامنا
قالت بسرعة
دي فواتير متأخرة والمقاول كان بيحاسبني بعدين
سألتها
يعني الإصلاحات اتعملت قبل ما تستلمي المسؤولية؟
قالت
بعضها آه

شريف قال
طيب لازم نعرف مين اللي نفذ الشغل ده
نهى اتعصبت وقالت
أنا مش فاكرة أسماء الناس كلها
قلتلها
مفيش مشكلة الأسماء مكتوبة على الفواتير
قعدنا على ترابيزة الصالون وبدأنا نراجع كل ورقة

لحد ما وصلنا لعنوان الشركة
كان عنوانها في منطقة قريبة من بيت نهى
شريف فتح الموبايل ودور على اسم الشركة
وبعد شوية قال
الشركة دي مقفولة من سنة تقريبا
نهى وشها اصفر
ماما قالت
يعني إيه مقفولة؟
قال
يعني مفيش نشاط مسجل ليها حاليا
نهى ردت بسرعة
ممكن تكون غيرت اسمها
شريف قال
ممكن بس لازم نتأكد
في الوقت ده بابا اللي كان ساكت طول الوقت قال
أنا عايز أعرف حاجة واحدة
نهى بصتله
قال
الفلوس دي كلها اتصرفت على البيت فعلا؟
نهى بدأت تعيط وقالت
أنا تعبت منكم كلكم
أنا اللي كنت بجري على المستشفيات وأنا اللي كنت ببات معاها وأنا اللي كنت بتحمل طلباتها
ماما قامت وحضنتها وقالت
خلاص يا حبيبتي متعيطيش
أنا كنت واقفة وببص للمشهد ومش عارفة أقول إيه
لحد ما شريف قال جملة غيرت كل حاجة
نهى أنا عايز أسألك سؤال واحد
هل المطبخ اللي اتجدد في بيت جدتك هو نفس المطبخ اللي اتجدد هنا في بيتك؟
نهى رفعت راسها بسرعة
وقالت
إنت بتقول إيه؟
شريف قال
أنا مش باتهمك أنا بس عايز أفهم ليه فيه فاتورة بمبلغ كبير باسم شركة تشطيبات على عنوان بيت جدتك وفي نفس الفترة كان بيتنا بيتجدد
نهى سكتت
أنا بصيت للمطبخ اللي شوفته امبارح في بيتها وبدأت أفتكر الرخامة الجديدة والدواليب والفرن الكبير
قلت لها
نهى هو المطبخ ده اتعمل إمتى؟
قالت
من شهور
قلتلها
وكانت الفلوس منين؟
صرخت في وشي
إنتي مالك؟ ده بيتي وأنا حرة فيه
شريف قال
نهى ردي على السؤال
نهى بصتله وقالت
أنا استخدمت جزء من الفلوس عشان أخلص تجديد البيت
ماما شهقت
وبابا قام من مكانه لأول مرة
قال
إنتي عملتي إيه؟
نهى بدأت تتكلم بسرعة
أنا مكنتش بسرق حد أنا كنت بقول لنفسي إن دي فلوس العيلة وفي الآخر هترجع تاني
قلت لها
فلوس جدتي مش فلوس العيلة يا نهى
قالت وهي بتعيط
أنا كنت مضغوطة وكان عليا أقساط ومصاريف مدارس وشريف شغله كان واقف فترة
شريف بص لها بصدمة وقال
إنتي بتقولي إيه؟ أنا مكنتش أعرف إنك بتدفعي من الفلوس دي أي حاجة
نهى قالت
كنت هعوضهم
قلت لها
إمتى؟
مردتش
قالت ماما
يا سامية أختك غلطت بس هي مش وحشة
بصيتلها وقلتلها
أنا مش بتكلم عن إنها وحشة أو كويسة أنا بتكلم عن فلوس ست كانت عايشة على قد احتياجاتها وكانت موصية إن كل حاجة تتسجل
ماما قالت
إنتي عايزة تعملي إيه دلوقتي؟
قلتلها
أنا عايزة الحقيقة كلها تظهر
نهى مسحت دموعها وقالت
روايات_مشيره_محمد
أنا هرجع الفلوس
شريف قال
إزاي؟
قالت
هبيع العربية وأدبر الباقي
شريف قال
الموضوع مش مجرد فلوس يا نهى فيه تقارير اتقدمت للبنك على إنها مصاريف اتصرفت على بيت جدتك وفيه مستندات لازم نعرف مين وقع عليها

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى