منوعات

ملجئ نجمة الصباح

بصيت للبنت اللي واقفة قدامي وأنا مش فاهمة هي تقصد إيه

قلت لها بصوت متقطع

ـ إنتي بتقولي إيه يا بنتي؟ هو إنتي تعرفيني؟

مسحت دموعها بطرف إيديها وضحكت ضحكة قصيرة كلها وجع

ـ أعرفك؟! ده أنا عشت عمري كله مستنية اللحظة اللي أشوفك فيها

حسيت إن رجلي مش شايلاني

قمت من مكاني وقربت منها وأنا بقول

ـ إنتي ملك؟! ولا مريم؟! إنتي واحدة من بناتي؟!

هزت راسها وقالت

ـ أنا ملك

حطيت إيدي على وشي وبدأت أعيط

ـ يا حبيبتي يا بنتي يا نور عيني

مديت إيدي أحضنها لكنها رجعت خطوة لورا ومنعتني

وقالت بصوت بارد

ـ متلمسينيش

الكلمة نزلت عليا زي السكينة

فضلت باصة لها ومش عارفة أتكلم

قالت وهي بتشاور على الكرسي اللي قدامي

ـ اقعدي الأول علشان عندنا كلام كتير

قعدت وأنا حاسة إن الدنيا بتلف بيا

سألتها بسرعة

ـ طب ومريم فين؟ هي كويسة؟ عايشة فين؟ متجوزة؟ عندها ولاد؟ قوليلي أي حاجة عنها

ردت عليا وهي بتبص في عيني

ـ مريم عايشة والحمد لله كويسة بس مش هنا

ـ طب هي فين؟ عايزة أشوفها

ـ مش هتشوفيها غير لما هي تقرر إنها تشوفك

ـ ليه يا بنتي؟ أنا أمكم

ضحكت بسخرية وقالت

ـ فاكرة إن كلمة أم دي كفاية علشان كل حاجة ترجع زي زمان؟

سكت

مكنش عندي إجابة

كملت كلامها

روايات_مشيره_محمد

ـ إنتي فاكرة إننا كنا بنقعد هنا في الدار مستنيينك ترجعي ومعاكي لعب وهدوم وحاجات حلوة ونرمي نفسنا في حضنك؟!

ـ أنا كنت مضطرة يا ملك

أول ما قلت الجملة دي ملامحها اتغيرت

قامت من مكانها وقالت بعصبية

ـ مضطرة؟! هو إحنا كنا حمل عليكي؟! إحنا كنا عندنا سنة واحدة يا ماما نادية! سنة واحدة! لا كنا بنفهم ولا نعرف ندافع عن نفسنا ولا حتى نطلب الأكل لو جعانين

حاولت أتكلم لكنها منعتني

ـ استني أنا هحكيلك إحنا عشنا إزاي وإنتي اسمعي للآخر من غير ما تقاطعيني

رجعت قعدت

بدأت ملك تحكي

وقالت إن بعد ما اختفيت في الليلة دي بساعات الحاجة زينب سمعت عياطنا ودخلت البيت

لقيتنا لوحدنا وواحدة فينا حرارتها عالية والتانية قاعدة بتعيط من الجوع

فضلت تدور عليا في كل حتة وتسأل الجيران لكن محدش كان عارف أنا رحت فين

جابر كان وقتها مش موجود

كان قاعد على القهوة من الصبح واختفى بعد ما عرف إن الناس بدأت تسأل عليه بسبب الديون اللي عليه

الحاجة زينب أخدتنا عندها وفضلت ترعانا

قالت ملك

ـ الست دي كانت غريبة عننا أكتر منك ومع ذلك عملت اللي إنتي مقدرتيش تعمليه

وطت راسي

كملت

ـ فضلت معانا لحد ما تعبت ومبقتش قادرة تتحرك وبعدها ماتت وإحنا لسه صغيرين

سألتها

ـ ومين أخدكم بعدها؟

ـ واحدة من قرايبها كانت بتيجي تساعدها أوقات اسمها عايدة لكنها كانت كبيرة ومقدرتش تتحمل مسؤوليتنا إحنا الاتنين وكانت ظروفها صعبة فبلغت الشؤون الاجتماعية واتنقلنا للدار

ـ ووالدكم؟

بصتلي ملك نظرة طويلة

ـ أبويا مات بعد ما إنتي مشيتي بحوالي تلات شهور

حسيت بصدمة رغم إني كنت عارفة إنه ممكن يكون مات

ـ مات إزاي؟

ـ لقوه واقع جنب القهوة بعد خناقة مع واحد كان بيطالبه بفلوسه وبعدها عرفنا إنه كان عليه ديون لناس كتير

سألتها

ـ يعني كان بيضربكم قبل ما أمشي؟

ردت بحسم

ـ إحنا مش فاكرين منه حاجة غير الصور والحكايات اللي سمعناها

روايات_مشيره_محمد

وبعدين قربت مني وقالت

ـ بس أنا فاكرة حاجة تانية

ـ إيه يا حبيبتي؟

ـ فاكرة إننا كنا كل يوم بنسأل في الدار هو ماما هتيجي إمتى؟ وكل ما عربية تقف قدام الباب نجري نبص من الشباك ونفتكر إنك رجعتي

بدأت دموعي تنزل

لكن ملك مكنتش متأثرة

قالت

ـ تعرفي إيه أصعب حاجة؟ مش إنك سبتينا وإحنا صغيرين بس الأصعب إننا كبرنا وكل ما حد يسألنا عن أهلنا نقول إن أمنا عايشة بس مش عايزانا

حاولت أدافع عن نفسي

ـ أنا مكنتش مش عايزاكم أنا كنت خايفة من أبوكم وكان بيهددني وبيمد إيده عليا وكل يوم كان بيضيع فلوسنا وبيغرقنا في الديون

قالت

ـ وإحنا ذنبنا إيه؟

سكت

ـ كان ممكن تروحي تبلغي عن أبويا أو تطلبي مساعدة من أي حد أو حتى تاخدينا معاكي لو كنتي خايفة عليه

قلت وأنا بعيط

ـ كنت خايفة يا ملك كنت ضعيفة ومكنش معايا فلوس ولا شغل ولا مكان أروحله

ردت بهدوء موجع

ـ إحنا كمان مكناش معانا فلوس ولا مكان نروحله بس إحنا كنا أطفال

الكلام كان أقسى من أي عقاب

فضلت ساكتة

وبعد شوية ملك قامت وخرجت من الأوضة ورجعت ومعاها ملف قديم

حطته قدامي وفتحته

كان فيه صور ليا وأنا شايلة البنتين وهما صغيرين

واحدة من الصور كانت لينا التلاتة قدام البيت القديم

كنت مبتسمة والبنتين نايمين على كتفي

فضلت أبص للصورة وأمسح عليها بإيدي

قلت

ـ دي آخر صورة لينا مع بعض

ردت ملك

ـ لأ مش آخر صورة

رفعت عيني باستغراب

طلعت صورة تانية

كانت صورة لينا أنا والبنتين والحاجة زينب

قالت

ـ دي صورة الحاجة زينب كانت محتفظة بيها في أوضتها وكانت بتقولنا إن دي أمنا وإنها أكيد هترجع في يوم من الأيام

سألتها

ـ هي كانت بتتكلم عني؟

ـ كانت بتقول إنك مشيتي بسبب أبويا وإنك كنتي خايفة منه لكن عمرها ما قالت إن ده مبرر للي عملتيه

بصيت لها

ـ يعني إنتي عارفة إني كنت بتعرض للضرب؟

ـ أيوه وعارفة إن حياتك معاه كانت صعبة بس عارفة كمان إنك سبتي طفلين من غير ما تتأكدي إن حد هيحميهم

اتنهدت ملك وكملت

ـ الحاجة زينب كانت بتقولنا إن الإنسان ممكن يكون مظلوم في حياته لكن ده مش معناه إنه يظلم غيره

فضلت الجملة تتردد في دماغي

كنت عايزة أقول أي حاجة تخفف عني لكن كل الكلام كان بيبان صغير قدام اللي حصل

بعد شوية سألتها

ـ طب إنتي عرفتي إني جيت الدار إزاي؟ وإزاي عرفتي إني أمك؟

 

قالتلي إنها كانت موجودة في المكتب يوم ما دخلت أول مرة

وإن الموظفة اللي كانت قاعدة في الاستقبال كانت بتعرفها كويس لأنها كانت بتساعد في بعض الأنشطة داخل الدار

لما سمعت اسمي واسم البنتين اتوترت وطلبت من الموظفة متقوليش إنها موجودة

قالت ملك

ـ أنا كنت عايزة أشوفك من بعيد الأول

ـ ليه؟

ـ علشان أعرف هل رجوعك علشاننا فعلا ولا علشان ضميرك تعب

الكلمة وجعتني

قلت لها

ـ أنا رجعت علشانكم يا بنتي والله

ردت

ـ طب فين كنتي الستاشر سنة دول؟

بدأت أحكيلها

روايات_مشيره_محمد

بعد ما مشيت من البيت روحت القاهرة واشتغلت في مصنع ملابس صغير

كنت بنام في أوضة مشتركة مع ستات تانية وأشتغل ساعات طويلة علشان أقدر أوفر فلوس

في الأول كنت ناوية أرجع بعد ما أقبض أول مرتب

لكن كل ما أفتح الموبايل وأفكر أكلم حد من البلد أخاف

وبعد سنة عرفت إن جابر مات

كنت فاكرة إن موته هيخليني أرجع بسهولة لكن اكتشفت إن الخوف اللي جوايا أكبر من أي حاجة

اشتغلت واتعلمت الخياطة وفتحت ورشة صغيرة وبعد سنين قدرت أفتح محل ملابس

اتجوزت مرة تانية من راجل اسمه سامح وكان عارف إني عندي بنتين سبتهم في البلد

لكنه كان دايمًا يقولي

ـ الماضي انتهى يا نادية وإنتي لازم تعيشي حياتك

وفي كل مرة كنت أحاول أرجع كان يطلب مني أأجل الموضوع

وفي الآخر انفصلنا

ملك كانت بتسمعني من غير ما تقاطعني

لما خلصت قالت

ـ يعني قدرتي تفتحي محل وتشتري عربية وتعيشي حياتك لكن مقدرتيش تدوري على بنتيكي؟

مقدرتش أرد

قالت

ـ تعرفي أنا ومريم كنا بنشتغل في الإجازات من وإحنا صغيرين علشان نقدر نشتري احتياجاتنا وندخل المدرسة وإنتي كنتي بتجمعي فلوسك وتعيشي حياتك

قلت بسرعة

ـ أنا كنت بحاول أقف على رجلي علشان أقدر أرجعلكم

قالت

ـ طب ليه مرجعتيش بعد سنتين؟ تلاتة؟ خمسة؟ حتى لما بقي معاكي فلوس؟

فضلت ساكتة

لأنها كانت بتسأل عن الحقيقة اللي أنا طول عمري بهرب منها

أنا مكنتش خايفة من الفقر بس

كنت خايفة أشوف نتيجة قراري في عيون بنتيّا

ملك قامت من مكانها وقالت

ـ أنا عايزاكي تقابلي مريم بس مش النهارده

قلت بلهفة

ـ أرجوكي أنا نفسي أشوفها وأحضنها

ردت

ـ هي عارفة إنك هنا

اتخضيت

ـ عارفة؟! يعني هي جاية؟

ـ مش عارفة لسه هتيجي ولا لأ

سألتها

ـ هي زعلانة مني زيك؟

ابتسمت ملك ابتسامة حزينة

ـ مريم زعلها مختلف عن زعلي

ـ يعني إيه؟

ـ أنا طول عمري كنت عايزة أعرف إنتي مشيتي ليه أما مريم فكانت طول عمرها رافضة تسمع سيرتك أصلا

حسيت بوجع في قلبي

ملك كملت

ـ مريم كانت أضعف مني وهي صغيرة وكانت بتعيط كل ليلة وتنام وهي ماسكة الصورة بتاعتك ولما كبرت بقت أقوى مني في حاجة واحدة إنها قررت متستناكيش

في اللحظة دي سمعت صوت خطوات في الممر

ملك بصت ناحية الباب

وبعدين قالت

ـ أعتقد إنها وصلت

الباب اتفتح ودخلت بنت طويلة لابسة ملابس بسيطة وشعرها مربوط وملامحها كانت شبه ملامحي بشكل يخوف

عرفتها من أول نظرة

دي مريم

قمت بسرعة

ـ مريم يا بنتي

وقفت مكانها وبصتلي من غير ما تبتسم

قلت وأنا بعيط

ـ وحشتيني يا حبيبتي

ردت بهدوء

ـ أنا مش عارفاكي

الكلمة كانت أصعب من كل اللي سمعته

قربت منها خطوة

ـ أنا أمك يا مريم

قالت

ـ أنا عارفة إنتي مين بس معرفكيش

قعدت تاني وأنا بحاول أتمالك نفسي

مريم بصت لملك وقالت

ـ إنتي حكيتي لها كل حاجة؟

ردت ملك

ـ لسه

مريم قربت وقعدت قدامي

وقالت

ـ أنا مش جاية أسمع أعذار ولا جاية أزعقلك ولا أطلب منك فلوس

أنا جاية أسألك سؤال واحد

قلت

ـ اسألي يا بنتي

قالت

ـ لما مشيتي في الليلة دي كنتي عارفة إننا ممكن نموت من الجوع أو البرد؟

سكت

ـ كنتي عارفة إننا ممكن نصحى من النوم من غير ما نلاقيكي؟

هزيت راسي ببطء

ـ أيوه كنت عارفة

ـ وخرجتي برضه؟

دموعي نزلت

ـ أيوه

مريم بصتلي وقالت

السابق1 من 3
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى