
مراتي كانت قاعدة على السرير بتقلب في موبايلها
قلت لها
ـ أنا مش هنام قبل ما أفهم الحكاية
رفعت عينيها وقالت
ـ حكاية إيه تاني
ـ بنتنا بتقول إن فيه راجل كان بيستخبى فوق الدولاب وإنه كلمها وطلب منها متقوليش لبابا
سكتت
ـ وإنتي لما سألتك عن الشنطة اتغير وشك ليه
ـ عشان مش بحب حد يفتش في حاجتي
ـ أنا جوزك مش حد غريب
حطت الموبايل جنبها وقالت بنبرة حادة
ـ الشنطة دي فيها حاجات تخص ماضي أنا مش عايزة أتكلم عنه
ـ ماضي إيه اللي ممكن يتخزن فوق دولاب في أوضة بنتنا
قامت من مكانها وقالت
ـ إنت مكبر الموضوع ليه
ـ عشان بنتي خايفة ومش عارف أنام وأنا مش فاهم إيه اللي بيحصل في بيتي
فضلت ساكتة شوية وبعدها قالت
ـ زمان قبل ما أتجوزك كان عندي أخ اسمه شريف
استغربت
أنا عارف إن مراتي عندها أخ واحد مسافر بره مصر اسمه حسام لكن عمري ما سمعت عن شريف
ـ أخوكي شريف
ـ أيوه
ـ أول مرة أسمع الاسم ده
قعدت على طرف السرير وبدأت تفرك إيديها
ـ لأنه مات من سنين
سألتها
ـ مات إزاي
ـ كان عنده مشاكل نفسية وكان بيختفي بالساعات وأوقات بالأيام وكان بيحب يقعد لوحده ومش بيحب الناس
ـ وإيه علاقة ده بالشنطة
ـ الشنطة كانت بتاعته وفضلت عندي بعد ما مات
حاولت أفهم كلامها
ـ طب ليه مخبياها بالشكل ده
ـ عشان مش عايزة أفتكر الأيام دي
حسيت إن فيه حاجة ناقصة في الحكاية لكن مكنتش عايز أضغط عليها أكتر
قلت لها
ـ بكرة هننزل الشنطة ونفتحها ونشوف اللي جواها
ردت بسرعة
ـ لأ
كانت كلمة واحدة لكنها طلعت منها بخوف واضح
بصيتلها وقلت
ـ ليه لأ
ـ عشان مش عايزة
ـ طيب أنا هفتحها لوحدي
ساعتها بدأت تعيط وقالت
ـ أرجوك يا أحمد متعملش كده
الطريقة اللي قالت بيها اسمي خلتني أسكت
لأول مرة أحس إن مراتي مش بس مخبية سر
دي خايفة منه
تاني يوم الصبح استنيت لما خرجت تشتري حاجات للبيت وبعدها جبت سلم صغير ونزلت الشنطة من فوق الدولاب
كانت أتقل مما توقعت
حطيتها على السرير وجبت مقص وبدأت أحاول أفك السلسلة
بعد محاولات كتير قدرت أفتحها
أول حاجة ظهرت قدامي كانت صور قديمة
صور لمراتي وهي طفلة واقفة جنب ولد أكبر منها بشوية
وعلى ضهر كل صورة كان مكتوب شريف
قلبت الصور واحدة واحدة لحد ما لقيت صورة مختلفة
الصورة كانت لراجل كبير شوية واقف قدام نفس الدولاب اللي في أوضتنا
لكن المفاجأة إن الصورة متصورة من جوه الأوضة وكان واضح إن الشخص اللي صورها واقف ناحية السرير
قلبت الصورة
لقيت مكتوب عليها بخط مراتي
آخر ليلة قبل اختفائه
اختفائه
مش موته
الجملة دي فضلت تتكرر في دماغي
آخر ليلة قبل اختفائه
فتحت باقي محتويات الشنطة ولقيت دفتر صغير متربط بشريط أزرق
فتحته وبدأت أقرأ
كانت فيه صفحات كتير مكتوبة بخط إيد شريف
في الأول كلام عادي عن حياته وعن أخته وعن البيت القديم
لكن كل ما كنت بقلب صفحة كنت بحس إن الموضوع بيزداد غرابة
كان بيكتب عن صوت خبط بيظهر كل ليلة في أوضة النوم
وعن إحساسه إن فيه حد بيراقبه
وفي آخر صفحة لقيت جملة مكتوبة بخط كبير


