أنا خريجة صيدلة، اتجوزت سنة 2022، .
أنا من مصر الجديدة، وجوزى كان من أسيوط، وهو خريج كلية زراعة.
أول ما اتجوزنا قال لي: «هعمل لك صيدلية باسمك»، وفعلاً عملت له التراخيص باسمي، وهو قعد في الصيدلية، ومكنش بيسمح لي أنزل أشتغل فيها أبدًا، وكان بيقول لي: «عيب الست تنزل تشتغل عندنا، دي عادات وتقاليد».
قلت مفيش مشكلة، لكن بعد شوية لقيته عايزني أعيش معاهم في بيت العيلة، رغم إننا كنا متفقين إننا هنعيش لوحدنا.
وافقت، لكن اتفاجئت بطريقة معيشة مختلفة تمامًا عن اللي اتعودت عليها، وطريقة أكل بالنسبة لي كانت صعبة جدًا.
كانوا بياكلوا كلهم في طبق واحد، والأكل بيتغرق شوربة، والأطفال ــ عفوًا ــ كانوا بيبصقوا في الأكل، ويمسحوا إيديهم في هدومهم، وشوفت حاجات كتير كانت مقززة جدًا بالنسبة لي، غير نوعية الأكل اللي أنا أصلًا مستحيل أقدر آكل منها، ولا أقدر أطبخ في مطبخ مليان صراصير.
اتكلمت مع جوزى بصراحة وقلت له إني مش قادرة أتأقلم مع الوضع ده، لكن رد فعله كان إنه ضربني، ونزل قال لأمه.
أمه قعدت تشتم فيا وتقول لي: «بتقرفي مننا؟» وقالت كلام بذيء.
وبعد كده لقيته بيساومني إني أنزل أخدم وأطبخ وأعيش تحت، وكمان عايزني أروح الأرض 3 أيام في الأسبوع وأشتغل زي سلفتي!
قولت له: «يعني شغلي في صيدليتي عيب، وشغلي فلاحه في الأرض مش عيب؟»
فضربني لدرجة إنه كسر كتفي، ودراعي اتكسر كسر مضاعف.
ومش بس كده، حبسني في البيت غصب عني، وأخد موبايلي، وحتى مصعبش عليه يجبس لي دراعي. كنت بتحايل عليه يجيب لي مسكن من صيدليتي أو مضاد حيوي، أو حتى يجيب لي الادوات وأنا أجبس لنفسي، وبرضه رفض.
لحد ما بنت أخوه صعبت عليها حالتي، وفتحت لي الباب، ومشيت الفجر قبل ما هما يصحوا.
حاولت أطلق بالمعروف، لكنه رفض وقال لي: «مالكيش حاجة عندي، روحي اخلعيني»، وحتى الصيدلية قال لي: «مالكيش حاجة فيها». والاحسن ليكى ترجعى وتعيشى زى ما الباقى عايشين ولو معملتيش كده هتصرف معاكى تصرف مش هيعجبك
ساعتها حسيت إن الدنيا بتلف بيا، والوجع اللي في دراعي وكتفي مكنش يجي نقطة في بحر القهرة والكسرة اللي حسيتها في قلبي. قفلت السكة في وشه وإيدي التانية بتترعش، وبصيت لنفسي في المراية، مكنتش مصدقة إن دي البنت اللي اتخرجت بامتياز وكانت بتحلم تفتح كيان لنفسها، بقيت متبهدلة، دراعي متدمر، ومحبوسة في
أول حاجة عملتها إني حكيت لأهلي كل حرف من غير ما أجمّل ولا أداري حاجة من اللي حصلت. بابا لما شاف دراعي وعملنا الإشاعات ولقى الكسر المضاعف كان هيتجنن، وخدني فورًا على المستشفى وطلعنا تقرير طبي رسمي بالحالة كلها، وقدمنا بلاغ فوري بعدم التعرض وإثبات واقعة الضرب والاعتداء والاحتجاز.
أما عن الصيدلية اللي فاكر إنه يقدر يلوي دراعي بيها، فكان ناسي إني دكتورة صيدلانية وعارفة القانون كويس. الصيدلية دي مترخصة باسمي أنا، وشهادة مزاولة المهنة بتاعتي أنا، وهو قانونًا مجرد دخيل منتحل صفة وبيدير منشأة طبية بدون وجه حق. طلعت على طول على نقابة الصيادلة ومعايا محامي، وقدمت شكوى رسمية وإخطار بعدم تمكيني من إدارتها، وتوجهت للتفتيش الصيدلي وطلبت سحب الترخيص وإلغاء المدير المسؤول وتشميع المكان لحد ما يتصفى كل مليم اتصرف فيه.
بدل ما أستسلم وأروح أخلعه وأتنازل عن شقايا وحقوقي زي ما كان بيخطط عشان يخرج كسبان من كل ناحية، رفعت قضية طلاق للضرر، والتقرير الطبي مع البلاغات كان كفيل يثبت كل اللي عمله ويديلي كامل حقوقي الشرعية والقانونية من مؤخر ونفقة وقائمة المنقولات.
أول ما لقى التفتيش الصيدلي نازل يشمّع الصيدلية، والمحاضر نازلة عليه، والتهديد اللي كان بيهددني بيه اتقلب ضده في النيابة، نبرته اتغيرت تمامًا. تليفوناته بدأت تنزل، ووساطات من قرايبه وناس من البلد يكلموا بابا: «حقكم علينا، وإحنا ولاد أصول، وكل اللي هي عايزاه هيتعمل، بس بلاش قضايا وبلاش خراب بيوت وبلاش الحبس».
بس وقتها كان خلاص، الباب اتقفل بالضبة والمفتاح. اللي يمد إيده على واحدة عشان طلبت كرامتها، ويحبسها ويحرمها من مسكن يلم عضمها المكسور عشان يذلها، ملوش عندي غير القانون، ورجعت مصر الجديدة لبيتي وأهلي، وبدأت ألملم اللي اتكسر فيا عشان أبدأ من جديد.
الوساطات اللي نزلت على بيت أهلي كانت تضحّك وتبكّي في نفس الوقت. ناس كبار من عيلته جايين يقعدوا مع بابا في الصالون، يحطوا رجل على رجل ويقولوا: «يا حاج، البيوت مقفولة على بلاوي، وبنتكم مكبّرة الحكاية، حتة قلم من راجل لمراته متهدش عمار!»
بابا وقتها ممسكش نفسه، قام وقف في نص الصالون وشاور عليهم بالباب وقالهم بصوت كان بيرج الحيطان: «القلم ده يتقال على سوء تفاهم، مش كسر عضم وحبس ست شهور في معتقل ومساومة على شرف مهنتها ورخصتها! اللي بيننا وبينكم النيابة، وكلمة زيادة وهطلب البوليس يطلعكم من البيت».
