خرجوا وهما بيبرطموا ويهددوا، لكن التهديد ده كان مجرد حلاوة روح. في نفس الأسبوع، نزلت لجنة التفتيش الصيدلي على الصيدلية في البلد، ومعاهم قوة من القسم. شمعوا الباب بالشمع الأحمر، وحرزوا الدفاتر والأدوية، واتعمل له محضر إدارة منشأة طبية بدون ترخيص وانتحال صفة صيدلي.
الموقف اتقلب عليه 180 درجة. الراجل اللي كان باعت لي رسالة بيقول «هتصرف معاكي تصرف مش هيعجبك»، بقى هو اللي مرعوب يدخل الحبس، خصوصاً لما النيابة استدعته عشان محضر التعدي وإحداث عاهة مستديمة بالكسر المضاعف اللي في دراعي، والمحامي بتاعي حاصر كل ثغرة ممكن يهرب منها.
جالي وقتها منه فويس نوت بصوت غير الصوت، نبرة مكسورة : «طب بلاش عشان خاطري، عشان خاطر الأيام اللي كانت بيننا، فكي الشمع واسحبي المحاضر وأنا هطلقك بالمعروف واديكي كل اللي تطلبيه».
سمعت الفويس، ومحستش بأي شفقة. افتكرت الليلة اللي كنت ببكي فيها من الوجع تحت الباب المقفول وبترجاه يديني حبة مسكن وهو باصص لي ببرود، افتكرت كلام أمه وهي بتهين كرامتي، وافتكرت وقفتي قدام المراية وكتفي مدلدل ومش قادرة أرفعه.
مسحت الفويس من غير ما أرد عليه بكلمة واحدة. خليت المحامي يكمل في إجراءات الطلاق للضرر، ومع كل جلسة كان موقفي بيقوى أكتر، لحد ما المحكمة حكمت لي بالطلاق للضرر، ومعاه كل حقوقي الشرعية كاملة مكملة، مؤخر ونفقة وقائمة المنقولات اللي اضطر يدفع قيمتها كاش عشان مكنش معاه العفش يرجعه.
أول ما طلعت ورقة الطلاق في إيدي، حسيت إني بتنفس هوا نضيف لأول مرة من سنين. دراعي أخد شهور في العلاج الطبيعي لحد ما رجعت أحركه طبيعي، لكن الأهم من دراعي، إن كرامتي اللي كانت مكسورة رجعت بنيتها حجر ورا حجر.
أجرت مكان صغير قريب من بيتنا في مصر الجديدة، وعلّقت رخصتي على الحيطة باسمي اللي مفيش مخلوق هيقدر يستغله تاني، وبدأت أفتح صيدليتي الخاصة بجد، وأنا عارفة إن الوجع اللي مبيكسرش الضهر، بيقويه.
اليوم اللي وقفت فيه أستلم مفتاح الصيدلية الجديدة كان يوم مختلف تمامًا. المحل مكنش كبير أوي، بس كان واسع بنوره، وشمس مصر الجديدة داخلة من الواجهة الإزاز من أولها لآخرها. وقفت في النص، بصيت للسقف الأبيض والحيطان الفاضية، وحسيت برعشة خفيفة في نفس الإيد اللي كانت في يوم مكسورة ومربوطة في رقبتي.
بابا كان واقف ورايا، حط إيده على كتفي السليم وطبطب عليا وقال لي: «مبروك يا دكتورة.. دي بتاعتك، بتعبك وعرقك، ومحدش كاسر عينك فيها بحرف».
بدأت مرحلة التجهيز والفرش، وكل رف كنت بختاره وبثبته بإيدي كان كأنه بيرد لي اعتباري. كنت بنزل شركات الأدوية بنفسي، أقعد مع المناديل، أفرز الفواتير، وأراجع كل علبة بتدخل الصيدلية. الشغل كان مجهد والوقفة بالساعات كانت بتتعب دراعي اللي لسه فيه أثر وجع خفيف في الشتا، بس كان وجع شريف، وجع شغل ونجاح مش وجع قهر وذل.
في وسط المعمعة دي، سمعت من معارف مشتركة إنه بعد ما شمعنا الصيدلية في أسيوط واضطر يسدد الغرامات وقيمة القايمة عشان يفلت من الحبس، عيلته اضطرت تبيع قيراطين من الأرض عشان يلموا الفضايح والديون اللي ركبته. الصيدلية اللي كان فاكر إنه هيملكها برخصتي اتقفلت للأبد، والمشروع اللي بنى عليه طموحه على حساب كرامتي انهار كله، ورجع يشتغل في الأرض اللي كان بيعايرني بيها وعايز ينزلني أخدم فيها غصب عني.
بعد سنة بالظبط من يوم طلاقي، كانت الصيدلية اتعرفت في المنطقة، والناس بقت تدخل تسأل عن «الدكتورة» بالاسم. لما ست كبيرة كانت تدخل تدعي لي على دوا كتبتهولها أو استشارة ريحتها، كنت بحس إن كل لحظة رعب عشتها في البيت داك كانت تمن غالي دفعته عشان أوصل لليوم ده.
في يوم، كنت واقفة على السيستم بالليل بقفل الحسابات، بصيت على اليافطة المضيئة برة: د. راضه راضى.. ابتسمت ابتسامة هادية، ومسكت روشتة في إيدي، وعرفت إن أكبر انتقام من اللي حاول يكسرك، مش إنك تأذيه، الانتقام الحقيقي إنك تعيشي أحسن، وتنجحي أكتر، وتثبتي له إن وجوده كان مجرد غلطة اتمسحت، وإنك من غيره بنيتي كيان ميتهزش.
