كان واقف فى المؤتمر وبيتكلم مع المستثمرين ومراته واقفه جمبه بتستعرض فستانها والميكب ومره واحده بص ناحيه الباب لاقى اكبر صدمه ممكن يشوفها قدامه
مراته اللى طلقها داخله وماسكه فى ايد اكبر رجل اعمال
الكلام وقف في زوره، وعينيه اتسعت بصدمة شلت حركته تماماً، لدرجة إن المستثمر اللي كان بيتكلم معاه سكت وبص لنفس الاتجاه باستغراب.
مراته الحالية حست بيه اتخشب جنبها، لفت وشها وسألته بدلع وهي بتعدل عقدها الألماس:
“مالك يا بيبي؟ باصص على مين كده؟”
ما ردش عليها، ولا حتى سمعها. كل حواسه اتعلقت بالباب.
كانت داخلة زي الملكات، لابسة فستان أسود كلاسيك بسيط بس في منتهى الشياكة والفخامة، رافعة راسها بابتسامة هادية وواثقة، وإيدها في إيد “عاصم الشريف”.. أكبر حوت عقارات في الشرق الأوسط، الراجل اللي الكل بيعمله ألف حساب ومش أي حد يطوله.
عقله كان بيصرخ من جوه: مستحيل.. دي ندى؟ ندى اللي رمى عليها يمين الطلاق وبهدلها واتجوز عليها وخرجها بشنطة هدومها مكسورة ومبتنطقش؟! دي البنت الهادية الساذجة اللي كان شايفها حمل تقيل وعايز يخلص منه عشان يتجوز اللي معاه دلوقتي؟!
الهمهمات في القاعة زادت، والأنظار كلها اتسحبت من على مراته التانية وبقت كلها على ندى وعاصم. حتى الصحافة والكاميرات جريوا عليهم.
فجأة، ندى لفت وشها، وعينيها جت في عينيه بالظبط.
جاسر كان متوقع يشوف في عينيها الخوف، أو حتى العتاب القديم.. بس اللي شافه رماه في دوامة ألعن؛ كانت نظرة برود تام، كأنها بتبص لكرسي فاضي أو شخص ملوش أي وجود في حياتها!
عاصم الشريف مال عليها، همس لها بكلمتين وهي ضحكت برقة ودلال جنن جاسر وخلّى الدم يغلي في عروقه لدرجة إنه قبض على إيده لحد ما ضوافره غرزت في كفه.
مراته التانية شهقت بخبث وغل أول ما لمحتها:
“مش معقول! هي دي الشحاتة طليقتك؟! دي إيه اللي جابها هنا؟ ولا جاية مع عاصم الشريف بصفتها إيه دي كمان؟!”
جاسر ماسمعهاش ولا رد عليها اصلا .
وافتكر لما كان بياخد دينا معاه الحفلات ولما كانت تطلب منه تخرج معاه كان يهزأها ويهينها
بقى دى مراته اللى طلقها قصاد الكل عشان خاطر دينا مراته اللى واقفه معاه دلوقتي وعشان يعلمها الادب ويجبها مذلو.له لحد عنده وترضى باللى يعمله فيها
ومن غير ما يفكر في الكاميرات ولا المستثمرين اللي واقفين، سابها وساب الحفلة كلها ورا ضهره، وبدأ يتحرك بخطوات سريعة وعينيه بتطق شرار ناحية ندى وعاصم..
الدم كان فاير في نافوخه، وكل خطوة كان بيخطيها على السجادة الحمراء كانت كأنها بتدوس على كرامته اللي اتبعترت قصاد الناس. دينا جرت وراه وهي بتنادي عليه بصوت واطي ومحروق: “جاسر! استنى يا جاسر هتعمل إيه، الناس بتبص علينا!” لكنه كان أعمى، مش شايف غير الضحكة اللي على وش ندى وإيدها اللي متشبثة بدراع عاصم الشريف.
وقف فجأة قصادهم، المسافة بينهم بقت خطوتين اتنين. الهوا في القاعة كأنه اتسحب فجأة، والهمهمات هديت والكل بدأ يترقب الكارثة اللي هتحصل. جاسر رمى نظرة محتقرة لعاصم، وبعدين وجّه عينه لندى بابتسامة صفرا كلها غل، وقال بصوت عالي سمّع الدايرة اللي حواليهم:
“أهلاً.. مش معقول! مدام ندى بنفسها منورانا؟ سبحان مغير الأحوال.. من يومين كنتي خارجة من بيتي بشنطة هدومك وبتعيطي على عتبة الباب، والنهارده جاية تفرجي الناس على ألاعيبك في أحدث حفلات رجال الأعمال؟!”
دينا وقفت جنبه ووشها بيطق حقد، وضحكت بسخرية خبيثة وهي بتبص لفستان ندى:
“تلاقيها شافت إن مفيش حل غير إنها تبيع نفسها للمظاهر عشان تعوض الفقر اللي كانت عايشة فيه، بس عيب يا جاسر.. سيبها تسترزق، عاصم بيه مش هيقصر معاها برضه!”
الكاميرات اتوجهت عليهم، والعيون كلها وسعت من قلة الذوق والوقاحة، بس الصدمة اللي شلت جاسر بجد كانت رد فعل ندى.
ما اتهزتش.. مفيش دمعة واحدة لمعت في عينيها زي زمان، ولا حتى وشها جاب ألوان. بالعكس، بصتله من فوق لتحت بابتسامة هادية جداً تخلي العاقل يتجنن، وكأنها بتبص لحشرة بتعافر تحت جزمتها.
وقبل ما جاسر يفتح بقه بحرف زيادة، عاصم الشريف عدل جاكت بدلته ببرود تام، وخطى خطوة واحدة لقدام وقفت جاسر مكانه غصب عنه من هيبة الراجل وطوله. عاصم حط إيده التانية فوق إيد ندى برقة وتملك، وبص لجاسر بنظرة مميتة كانت كفيلة تخرس القاعة كلها.
ابتسم عاصم بهدوء يرعب، وقال بصوت جهوري واثق رجّ أركان المكان:
“شكلك نسيت نفسك يا جاسر.. أو يمكن الوجع مأثر على عقلك شوية. ندى مش محتاجة تسترزق، لأن ندى الشريف من نص ساعة بس، بقت الشريك التنفيذي ورئيسة مجلس إدارة نص شركات الشريف جروب.. ده غير إنها مراتي وبنت عمي اللي دورت عليها سنين بعد ما سرقتوا حقها وحبستوها في بيتكم المقرف.. وأعتقد القرض اللي انت بتشحت من البنوك عشان تاخده، توقيعه بقى تحت إيدها هي.”
