الناس كلها كانت بتتكلم عن “عريس الشقة الفاضحة” اللي بيتجوز على مراته في شقتها وبفلوسها، ويكذب على التانية ويقول إنه أعزب! اسم أحمد وصورته وبياض وشه بقوا على كل لسان في منطقتنا وفي مجاله الوظيفي.
الشركات اللي كان بيتعامل معاها بدأت تبعت له إخطارات بوقف التعامل لحين إيضاح موقفه القانوني والأخلاقي، وأصحابه اللي كانوا فاكرينه “العصامي الناجح” بقوا بيهربوا منه. وفوق كل ده… الأستاذ فاروق اتصل بيا الساعة ۱۲ الضهر وقال لي جملة واحدة: — نادين… النيابة أقتنعت بالمستندات، وصدر أمر باستدعاء أحمد رسمياً للتحقيق في عقد الإيجار المزورة وإثبات حالة الشقة!
ابتسمت، ولبست هدومي، ونزلت عشان أروح بنفسي الشقة القديمة مع المحامي وقوة من الشرطة عشان نغير الأقفال ونستلمها رسمياً. ولما وصلت تحت العمارة… شفت عربية أحمد مركونة على جنب، وهو قاعد جواها… وشه شاحب، دقنه نابتة، وهدومه متبهدلة كأنه ما نامش طول الليل.
أول ما شافني نزلت من عربيتي ومعايا المحامي، فتح باب عربيته وجري عليا زي المجنون… بس المرة دي، ما كانش بيترجى… النظرة اللي في عينيه اتغيرت تماماً… بقت نظرة تحول وغضب وحشي، وكأنه شخص تاني خالص!
قرب مني بخطوات سريعة ومجنونة، وشّه كان محتقن بالدم، وعينيه الغاضبة بتبصلي وكأنه عايز ينهي حياتي في الشارع. مسكني من دراعي بقوة خلت صوابعه تغرس في لحمي، وزعق بصوت هيستيري مالي الشارع: — إنتِ فاكرة نفسك مين عشان تفضحيني وتدصري حياتي بالشكل ده؟
! فاكرة إني هسيبك تاخدي كل حاجة وتطلعي منها كسبانة؟! أنا اتدمرت! شغلي اتقفل، وسمعتي بقت في الطين، وأهلي مش قادرين يرفعوا عينهم في حد بسبب الفيديو اللي انتشر! كل ده عشان إيه؟ عشان نزوة؟! الأستاذ فاروق، المحامي، اتدخل بسرعة وزقه لورا بحدة: — ابعد إيدك عنها يا أحمد!
إنت في موقف لا تحسد عليه، ولو لمستها تاني هثبت في المحضر محاولة اعتداء! أحمد ضحك ضحكة مجنونة، وبص للمحامي وبصلي بقلة حيلة وسواد: — محضر؟ محضر إيه يا أستاذ؟! إنت فاكر إني خايف من المحاضر؟ نادين فاكرة إن الشقة دي بتاعتها وسهل تاخدها؟
أنا كاتب عقد إيجار قديم باسم واحد صحبي من أربع سنين، ومثبت تاريخه، والشقة دي قانوناً مش هتعرفي تحطي إيدك عليها إلا بعد سنين في المحاكم! مش هخليكي تتهني بحاجة، وهسحلك في المحاكم لحد ما تتمني تسامحيني وترجعي لي!
بصيت لإيده اللي كانت بتترعش من الغضب، ولعينه اللي ضاع منها كل أثر للرجولة والرحمة. سحبت دراعي ببرود، وبصيت له بمنتهى الثبات والتحقير وقلت له: — إنت فاكر إنك بتخوفني؟ التهديد ده كان ينفع زمان لما كنت بقفل عينيا وبصدقك.. إنما دلوقتي، إنت بالنسبة لي مجرد بقعة قذرة وبمسحها من حياتي.
وعقدك المزّور ده؟ المحضر اللي معايا فوق دلوقتي قوة تنفيذية من النيابة لمعاينة الشقة وإثبات التزوير. في نفس اللحظة، عربية البوليس وصلت ونزل منها أمين شرطة ومعه قوة صغيرة. أحمد أول ما شاف البوليس، وشّه أصفر والجرأة اللي كان بيتكلم بيها تبخرت في ثانية.
رجع خطوتين لورا وهو بيبص حواليه بقلة حيلة. الأستاذ فاروق قرب من أمين الشرطة وورّاه أوراق النيابة وأمر المعاينة والتسليم التحفظي. أمين الشرطة بص لأحمد وقال بصوت صارم: — أنت الأستاذ أحمد؟ اتفضل معانا عشان تفتح الشقة وتنفيذ قرار النيابة، وإلا هنكسر الباب بموجب إذن النيابة.
أحمد بلع ريقه بصعوبة، وكان ماشى ورانا زي المسجون المنتظر حكم الإعدام. طلعنا السلم، وكل خطوة كانت بتفكرني باليوم اللي فات، بريحة الفرح المزيف اللي كان عامله لسمر. أول ما الباب اتفتح، الشقة كانت في حالة كركبة مش طبيعية؛
آثار ليلة البارح، الورد المرمي في الأرض، التاج الدهب الفالس اللي سمر رمته، وصورة الفرح الضخمة اللي كانت لسه معلقة على الحيطة… الصورة اللي كانت بداية الخيط. أمين الشرطة بدأ يكتب المحضر ويصور المكان، والأستاذ فاروق كان بيملي عليه التفاصيل الخاصة بالتزوير واستغلال الممتلكات.
