صحيت تاني يوم، لكن النوم ما كانش راح لعيني أصلًا.
الرسالة كانت لسه قدامي على الموبايل.
كل شوية أفتحها وأقراها من أول وجديد.
“اسأليها عن الوعد اللي خدته من ابنها يوم كتب الكتاب.”
مين بعتها؟
وليه؟
وهل فعلًا في حاجة مستخبية عني طول الست سنين اللي فاتوا؟
خرج جوزي من الأوضة وهو بيجهز نفسه للشغل، بصلي وقال بابتسامة:
ـ صباح الخير… مالك؟ شكلك منمتيش.
اترددت.
كنت عايزة أسأله.
لكن خفت.
خفت تكون الرسالة مجرد هزار، وأفتح على نفسي باب مشاكل من غير لازمة.
فقلت بهدوء:
ـ مفيش… بس كنت عايزة أسألك سؤال.
ـ اتفضلي.
بصيت في عينه وقلت: #حكايات_منــال_عـلـي
ـ إنت شايف إن مامتك بتعاملني زي مرات أخوك؟
سكت شوية.
وده لوحده كان إجابة.
بعدها قال وهو بيتجنب يبصلي:
ـ كل واحد وله طريقته.
ابتسمت بسخرية.
ـ يعني آه… في فرق.
قال بسرعة:
ـ لا… بس إنتي حساسة شوية.
ضحكت ضحكة قصيرة.
ـ حساسة؟
أنا بقالي ست سنين كل ما أدخل بيتكم أدخل على المطبخ… وهي أول ما تدخل تقعد في الصالون.
دي حساسية؟
ما ردش.
قربت منه أكتر.
ـ بجد يا أحمد… جاوبني.
تنهد وقال:
ـ بصراحة… أمي متعودة عليكي.
استغربت.
ـ يعني إيه متعودة عليا؟
ـ يعني إنتي من البيت… وهي لسه عروسة جديدة.
هزيت راسي.
ـ طب وبعد ست شهور؟
ـ هتبقى زيك.
الجملة دي وقفتني.
يعني المطلوب أستنى؟
وأفضل أخدم؟
ولما ييجي دورها، تبقى هي كمان نسخة مني؟
لكن حاجة جوايا قالتلي إن ده مش هيحصل.
خرج أحمد للشغل، وأنا فضلت قاعدة بفكر.
وفجأة افتكرت حاجة.#حكايات_منــال_عـلـي
من كام شهر، قبل جواز سلفي، حماتي كانت بتقولي دايمًا:
“إنتي سندي.”
“إنتي بنتي.”
بعد العصر، أخت جوزي اتصلت بيا.
ـ ممكن أشوفك؟
استغربت.
ـ خير؟
ـ انزلي الكافيه اللي تحت بيتنا.
نزلت.
لقيتها قاعدة لوحدها.
أول ما قعدت قالت:
ـ متزعليش مني… أنا اللي بعتلك الرسالة.
اتصدمت.
ـ إنتي؟
هزت راسها.
ـ أيوة.
ـ ليه؟
قالت وهي بتتنهد:
ـ لأني زهقت من اللي بيحصل.
فضلت ساكتة.
قالت:
ـ إنتي فاكرة إن أمي بتحب مرات أخو أحمد أكتر منك؟
ـ أمال؟
هزت راسها بالنفي.
ـ لا.
ـ أومال؟
بصتلي وقالت:
ـ أمي شايفة إنك خلاص ضمناكي.
الكلمة نزلت على قلبي تقيلة.
ـ يعني؟
ـ يعني إنتي مهما عملت… هتفضلي موجودة.
لكن مرات أخو أحمد لسه جديدة… فلازم يدلعوها علشان متبعدش.
قولتلها:
ـ وأنا؟
ابتسمت بحزن.
ـ إنتي للأسف… اتعودوا إنك بتوافقي على كل حاجة.
سكت.
قالت:
ـ تعرفي أول مرة أمي اتأكدت إنك هتسكي؟
افتكرت.
ـ إمتى؟
قالت:
ـ بعد جوازك بأسبوعين.
اليوم اللي كانت عاملة فيه عزومة كبيرة.
إنتي كنتي تعبانة وسخنة، ومع ذلك دخلتي المطبخ من غير ما حد يطلب.
ومن يومها…
أمي قالت جملة عمري ما نسيتها.
حسيت قلبي بيدق بسرعة.
ـ قالت إيه؟
قالت وهي مكسوفة:
ـ قالت… “دي سهلة… هنعتمد عليها في كل حاجة.”
سكتت.
وأنا حسيت كأن حد صفعني.
“سهلة.”
هو ده كان وصفي عندهم؟
مش طيبة.
مش محترمة.
مش بنت أصول.
“سهلة.”
دموعي نزلت من غير ما أحس.
قالت أخت جوزي بسرعة:
ـ والله أنا زعلت وقتها… لكن ما قدرتش أقولك.
مسحت دموعي.
وقلت بهدوء غريب حتى أنا استغربته:
ـ خلاص.
قالت:
ـ زعلانة؟
ابتسمت.
ـ لا.
أنا بس… فهمت.
ولأول مرة من ساعة ما اتجوزت…
عرفت إن المشكلة ما كانتش فيا.
المشكلة إني كنت بدي من غير حدود.
وبرجع أستنى تقدير…
من ناس عمرهم ما طلبوا مني أدي…
