دخلت بيت أهلي وأنا حاسة إن روحي مسحوبة مني. أمي فتحت الباب ولقتني بالمنظر ده، شنطة في إيدي، ووشي من العياط، صرخت بصوت مصدوم:— يا نهار يا بنتي! إيه اللي جابك في نص الليل كده؟ وأحمد فين؟ وإيه الشنطة دي؟! مقدرتش أنطق حرف واحد. رجلي كبرت عليا ووقعت في طرقة البيت مغمى عليا. لما فوقت، لقيت نفسي نايمة على سريري القديم في بيت أهلي، وأمي وأخويا واقفين حواليا، عيونهم كلها خوف وقلق.
أمي كانت مسسكة إيدي وبتعيط:— فوقي يا ضنايا، استعيذي بالله.. فهّمينى في إيه؟ جوزك عمل فيكي إيه تاني؟ عيوني جابت الدموع تلقائي، بس المرة دي مكنش عياط بكسرة، كان عياط بنار وغضب أكل كل حاجة جوايا. بصيت لأمي وأخويا، وصوتي طلع مبحوح ومش طالع:— أحمد.. أحمد هو اللي.. ابني.
أخويا وقف مكانه مذهول، وقال بصوت عالي: — إنتي بتقولي إيه يا بت جننتي؟! ابنك إزاي؟! إنتي واعية للي بتخرفيه؟ حكيتلهم كل كلمة سمعتها من مكالمته مع أخوه، وكل تفصيلة اعترف بيها لما واجهته: إزاي كان شايله، وإزاي الموبايل وقع، وإزاي الواد اتزحلق واتخبط في التربيزة الزجاجية، وإزاي خاف من الفضيحة ومن المسئولية فكذب على الكل، وسايبني أموت كل يوم بحسرتي ووجعي، ولما جه يعوض، كان عايز يعمل ده كأنه بينظف ضميره مش عشان حب ولا إنسانية، بالعكس.. كان بيستغلني عشان يخلف تاني وينسى الجريمة!
أخويا أول ما سمع الكلام ده، عروقه برزت في رقبته، وشكّه اتغير وبقى مرعب. بص لأمي وقال بصوت كله غضب: — أنا رايح للحيوان ده حالا أخلص عليه! ده مش بني آدم، ده قاتل!
أمي مسكت فيه وهي بتعيط بصوت عالي: — استنى يا ابني، بالهداوة.. العنف مش هيحل حاجة، والبت مش ناقصة فضايح أكبر.. خلينا نمشي في الطرق القانونية، نجيب حق الولد بالقانون، مش بنار ودم!
فضلت قاعدة مكانها مش قادرة أنطق، وحاسة إن الدنيا كلها اتكشفت على بعضها.
بعد أقل من ساعتين، والليل لسه ما خلصش، سمعنا صوت خبط هستيري وعالي على باب الشقة. أخويا فتح الباب بغضب، ولقى أحمد واقف بره، شكله مبهدل، وشعره منكوش، وعيونه حمرا من العياط والهلع. دخل أحمد زي المجنون، وماسك في إيده المفاتيح، وبص لي وقال بصوت مرتعش:— مراتي.. أم أحمد.. أرجعي معايا، والله العظيم أنا متجنن من غيرك! أنا غلطت، وعارف إن ذنبي أكبر من أي اعتذار، بس والله العظيم ما كان قصدي.. ده ابني أنا كمان!
أخويا جابه من ياقة هدومه وشدّه لورا ودفعه بقوة لحد ما خبط في الحيطة، وزعّق فيه بصوت جاب آخر الشارع:— إنت ليك عين تيجي هنا كمان يا حقير؟! إنت ابن اختي وكمان مخبي وسايبها تتذبح كل يوم وهي مش عارفة الحقيقة؟! أنا هوديك في داهية!
أحمد نزل على ركبته قدام أخويا وهو بيبكي بانهيار وبيمسك في رجله: — اضربني.. اعمل فيا اللي إنت عايزه، بس والله العظيم ما كنت أقصد.. القضاء والقدر.. الموبايل وقع فجأة.. أنا كنت بموت كل ثانية وأنا شايفها بتعيط، وكنت مخنوق.. سيبوني أشرح لها!
قمت من على السرير، ومشيت خطوتين بخطوات ثقيلة لحد ما وقفت قدامه. بصيت له ببرود تام، كأني مش باصة لبني آدم عشته معاه سنين، وبصوت هادئ قطع عياطه:— تشرح لي إيه يا أحمد؟ تشرح لي إزاي استخسرت في ابنك حياته، واستخسرت فيا إني أعرف الحقيقة عشان تخاف على نفسك؟ تشرح لي إزاي قدرت تنام جنبي، وتحضني، وتطلب مني الحمل، وإنت إيدك متخضبة بدم ابننا؟
بص لي بعيون مكسورة وقال بصوت مخنوق: — عشان بحبك.. وعشان كنت خايف أخسرك إنتي كمان.. إنتي روحي، ولو كنت اعترفت وقتها، كنتِ هتموتي بسببي..
قاطعتُه بضحكة سخرية طلعت من قلب موجوع:— تخسرني؟! إنت خسرتني من اللحظة اللي كذبت فيها، ومن اللحظة اللي بعت فيها ابنك عشان تحمي نفسك! اسمع يا أحمد.. العِشْرة اللي بيننا انتهت، ومفيش رجوع للبيت ده تاني. أنا بكرة الصبح هاخد حقوقي القانونية والشرعية، وهرفع قضية طلاق، وهفتح تحقيق في ظروف وفاة ابني.. وإنت هتاخد جزاء اللي عملته، سواء في الدنيا أو الآخرة.
وقف على حيله وبص لي بصدمة: — طلاق؟! وقضية؟! إنتي بتجنني يا أم أحمد؟! إنتي بتهدمي بيتنا عشان حادثة غصب عني؟!
أخويا زقه بره الباب وصرخ في وشي: — براااا.. اطلع بره بيتنا بدل ما أقسم بالله أدفنك مكانك! يلا غور!
أخويا طرده وقفل الباب في وشه، وأحمد فضل يخبط ويزعّق ويرهب بره لحد ما أهل الحارة ابتدوا يطلعوا يشوفوا في إيه، فمشي وهو بيبكي وبيصرخ.
