ده شيك مقدم عربية بي إم دبليو، مسحوب من سنة ونص. فاكرة حضرتك لما أحمد غير عربيته وجاب عربية زيرو؟ ساعتها أستاذ كريم قال لحضرتك إن أحمد وارث من خاله اللي مات في الكويت؟ الفلوس دي خرجت من حسابك، بتزوير توقيعك على الشيك، أو أستاذ كريم استخدم التوكيل القديم اللي كان معاه وطلع الشيك بصفته وكيل.
فضلت ساكتة لمدة تلات دقايق كاملة. هاني كان قاعد مراقبني، خايف يقطع حبل أفكاري. الغضب لما بيوصل لمرحلة معينة، مبيخليش الواحد يصرخ ولا يكسر، بيخليه يفكر بتكتكة زي عقارب الساعة. الجريمة مش بس خيانة زوجية أو قلة أصل؛ دي سرقة، نصب منظم، استغفال باسم العيلة والستر والواجب.
هاني. نعم يا فندم؟ الورق ده كله، يروح فوراً لدكتور شريف المحامي. عايزاه يترتب في ملفات منفصلة قضية تبديد، قضية استغلال توكيل بدون وجه حق، وقضية خيانة أمانة وتزوير لو الشيك ده اتوقع باسمي مش بالتوكيل. تمام يا فندم، جاهزين، وأنا كلمت دكتور شريف ومستني إشارة. قبل ما تروحله، الشقة بتاعة زايد، مين اللي عليه الدور دلوقتي في الحجز؟ البنك؟ البنك يا فندم، والإنذار الأخير كان معاده يوم 15 في الشهر ده، يعني كمان ست أيام بالظبط. لو مدفعوش ال 48 ألف ومعاهم غرامة التأخير اللي عدت ال 120 ألف عشان متأخرين في سداد الفوايد من الشهر اللي فات، البنك هيبدأ إجراءات الحجز التنفيذي وعرض الشقة في المزاد العلني.
ابتسمت. ابتسامة كانت باردة زي التلج. حلو أوي. يعني نادية هانم هتبقى في الشارع رسمي كمان ست أيام، ومروة هانم اللي بتفهم في الأصول مش هتعرف تقعد في ريسبشن زايد تتبغدد.
التليفون على المكتب رن، تليفون السكرتارية. رفعت السماعة أيوة يا شيرين؟
بشمهندسة مريم، في واحدة تحت في الاستقبال، عاملة مشكلة ومصممة تطلع، وبتقول إنها مدام مروة الشناوي، سلفتك، ومعاها أستاذ أحمد. وشكلهم متنرفزين جداً.
بصيت ل هاني، وشاورلي بقلق تحبي أطلب الأمن يمشوهم يا فندم؟ لأ قولت وأنا بصلح ياقة قميصي وبقف خليهم يطلعوا يا شيرين. دخليهم أوضة الاجتماعات الكبيرة. متجيبيهمش مكتبي هنا.
قمت وقفت، وبصيت ل هاني هاني، خد الدوسيه ده، وخلي معاك النسخ الأصلية في الخزنة. وطلعلي صورة واحدة من عقد الرهن، وصورة من كشف التحويلات لشركة الأفق. حطهم في ظرف مقفول وهاتهم ورايا على أوضة الاجتماعات. تمام يا فندم، ربنا يقويكي.
خرجت من مكتبي وخطوات كعبي العالي كانت بترن في الممر الرخام بتاع الشركة. كل مهندس وموظف كان بيعدي بيبص في الأرض باحترام. دي إمبراطوريتي أنا، المكان اللي بنيته بطول ذراعي، بالطوب والأسمنت والسهر في المواقع بالحر والبرد، والعيال المايصة دي جاية تتبجح في عقر داري.
فتحت باب قاعة الاجتماعات ودخلت.
مروة كانت قاعدة على أول كرسي، حاطة شنطة ديور غالباً مدفوع تمنها من كروتي القديمة على الترابيزة، ولابسة نضارة شمس على شعرها، وشها محتقن وعينيها بتطلع شرار. جنبها كان أحمد، قاعد لابس بدلة سبور، بيهز رجله بعصبية واضحة، وعروق رقبته نافرة، وأول ما دخلت وقف في وشي
إيه اللي بيحصل ده يا مريم؟! إنتِ اتجننتي رسمي؟! مروة وقفت وراه على طول، وصوتها الرفيع كان بيزعق من غير أي احترام إنتِ فاكرة نفسك مين عشان تعملي الحركات دي مع طنط نادية وتلغي مصاريف البيت؟ إنتِ نسيتي نفسك ولا إيه؟ ده إحنا اللي قبلنا بيكي وسطنا وفتحنا ليكي بيتنا! جاية تقفلي الحسابات وتكسري بخاطر حماتك
عشان طبق أكل؟ تفاهة دي ولا قلة أصل؟ ما هو اللي يجي من بيئة واطية ميعرفش يعني إيه كرم ونفس عفيفة!
وقفت قدامهم عند راس الترابيزة الطويلة، مكنتش بتكلم، كنت باصة في عين مروة تحديداً ببرود مرعب. نظرة خلت كلامها يبهت في آخر جملة، وبدأت تتلجلج وهي بترجع شعرها ورا ودنها.
