خلصتي؟ سألتها بصوت واطي جداً، بس كان فيه ثقل خلا أحمد يبلع ريقه. أحمد حاول يستعيد زمام الموقف، فقرب خطوة وقال مريم، اسمعي هنا. اللي بينك وبين كريم جوزك تحلوه في بيتكم بعيد عن أمي. لكن تلغي سداد قسط الشقة وتخلي البنك يهدد بالحجز؟ وتوقفي كارت كريم اللي كان بيسدد بيه مصاريف عربيتي؟ ده جنان! إنتِ عارفة لو القسط ده منزلش بكرة الصبح هيحصل إيه؟! هيحصل إيه يا أحمد؟ قولتله وأنا بميل بجسمي على الترابيزة وببتسم قولي كدة، الشقة هيتحجز عليها؟ الشقة اللي رهنتموها عشان تاخد 4 مليون جنيه تشتري بيهم شاليه لمروة في هاسيندا وتفتح بيهم شركة وهمية باسم الأفق؟
الكلمة نزلت على وش أحمد كأنها قلم بحديدة. وشه اتقلب من الأحمر للرمادي في لحظة واحدة، ورجليه رجعت خطوة لورا كأنه شاف عفريت. مروة عينيها وسعت برعب وبصت لأحمد إنتِ إنتِ بتقولي إيه؟ شاليه إيه وشركة إيه؟! متعمليش عليا دور العبيطة يا مروة هانم قولت وأنا بفتح الظرف اللي هاني حطه على الترابيزة قدامي وسحبته بروقان دور المسكنة وبنت الأكابر ده تاكلي بيه عقل حماتك الهبلة اللي باعت اللي وراها واللي قدامها عشان تجوز ابنها الكبير البرنس وتعملك عزومات بآلافات من جيبي أنا!
رميت الورقة الأولى في وش أحمد كشف حساب شركة الأفق، اللي متسجل باسمك وبسجلك التجاري، والتحويلات اللي طالعة من حسابي الشخصي
بتوقيع أخوك المحترم كريم. ورميت الورقة التانية في وش مروة عقد شاليه هاسيندا، اللي اتدفع مقدمه 850 ألف جنيه من شيك مسروق من مكتبي هنا! مريم إنتِ فاهمة غلط الفلوس دي كانت أحمد بدأ يتهته، عرقه نزل على جبينه وبدأ يمسح وشه بمنديل بإيدين بترتعش. فاهمة غلط؟! صوتي علي فجأة لأول مرة، صرخة هزت قاعة الاجتماعات وخلت الاتنين يتنفضوا بقالكم تلات سنين بتمصوا دمي! أحمد العاطل اللي مبينزلش من بيتهم بيقبض من شقايا، ومروة هانم اللي بتعايرني بالأصول وبتقولي أصل إحنا بنعرف نعيش عيشة نضيفة، عايشة في الشاليه بتاعي وراكبة عربية من عرق جبيني، وحماتي بتذلني في طبق أكل وبتقولي ميزانيتك خلصت؟!
مروة وشها جاب ألوان، الخبث واللؤم اتمسحوا وبقى بدالهم رعب خالص. كانت بتبص لأحمد بنظرات اتهام أحمد! إنت قولتلي إن الفلوس دي نسبتك في مشروع المقاولات اللي دخلته مع كريم! إنت مكنتش قايلي إنها من فلوسها هي! أحمد زعق فيها بقلة حيلة اخرسي إنتِ دلوقتي! وبعدين بصلي وهو بيقرب وبيوطي صوته بنبرة ترجي مقرفة، نفس نبرة الشحات اللي كان من دقيقة بيتفرعن مريم استهدي بالله، إحنا أهل، وكريم أخويا وده جوزك إحنا لو الشقة دي اتحجز عليها أمي هيجرالها حاجة، والبوليس لو دخل في قصة التوكيل والشيكات دي، أنا هروح في داهية وكريم هيتحبس معايا! إنتِ ترضي تحبسي جوزك عشان خلافات حريم؟!
ضحكت بصوت عالي، ضحكة رنت في القاعة كلها لدرجة إن السكرتيرة برة قلقت. أحبس جوزي؟ ده أنا مش بس هحبس جوزك يا أحمد، ده أنا هدخلكم كلكم القفص في قضية واحدة، سرقة، ونصب، وخيانة أمانة. وعارف الشقة بتاعة زايد؟ أنا مش هدفع فيها مليم أحمر. والبنك هيحجز عليها، وأنا بنفسي
اللي هدخل المزاد
العلني أشتريها بالتراب لما تنزل، وهطرد أمك منها بالشرطة العسكرية والبوليس لو حطت رجلها فيها!
مروة دموعها نزلت، دموع تمثيل وخوف من الفضيحة مريم عشان خاطري، بلاش فضا فضايح، إحنا لينا اسم وعيلة، طنط نادية لو عرفت بالرهن ده هتموت فيها، هي فاكرة إن أحمد بيسدد الأقساط العادية وإنك بتساعدي من حبك لكريم! طنط نادية؟ قولت وأنا بلم الورق بهدوء طنط نادية لازم تعرف أول واحدة. وعشان كده، إنتوا الاتنين دلوقتي، زي الشطار، هتاخدوا بعضكم وتروحوا فيلا زايد. لأن أنا رايحة وراكم، بس مش لوحدي المحامي بتاعي معايا، وكشوف الحسابات دي كلها هتتحط على نفس السفرة اللي اتحط عليها الطبق الفاضي.
أحمد صرخ برعب لأ يا مريم! بلاش أمي! أمي مريضة ضغط وسكر، متستحملش الصدمة دي! كانت صحتها زي البمب وهي بتكسر نفسي أول إمبارح وبتديني طبق فاضي قولتله وأنا بشاور على باب القاعة اخرجوا برة مكتبي. قدامكم نص ساعة، لو ملقتكوش في فيلا زايد متجمعين إنت وأمك وكريم ومروة، البلاغ للنائب العام هيتقدم إلكترونياً قبل ما أركب عربيتي. برا!
خرجوا يجروا ورا بعض زي الفيران المذعورة، أحمد بيشد مروة من إيدها وهي بتعيط وماسكة شنطتها اللي بقت شبهة توديها السجن.
وقفت دقيقة أتنفس. طلعت موبايلي وشيلت البلوك عن رقم كريم. أول ما شيلته، التليفون رن في ثانيتها. فتحت الخط، وسمعت صوت كريم بينهج مريم! إنتِ فين؟ أحمد اتصل بيا صوته مرعوب ومفهمتش منه حاجة غير إنك طردتيه من الشركة وإنك عارفة حوار الرهن! مريم، الكلام ده فيه سوء تفاهم كبير، أنا كنت هفهمك كل حاجة والله، بس الموضوع وفر كلامك يا كريم قاطعتُه بصوت ميت ربع ساعة وتكون في بيت أمك. العيلة كلها
لازم تتجمع، عشان الميزانية اللي خلصت دي في ديون تانية كتير لازم تتدفع، والمرة دي، الدفع هيكون من لحمكم الحي.
قفلت، وبصيت لهاني اللي كان واقف مستني عند الباب جهزت العربيات يا هاني؟ جاهزة يا فندم، ودكتور شريف المحامي مستني حضرتك تحت في العربية ومعاه كل أصول الإنذارات والمحاضر. تمام يلا بينا، نروح نحضر العزومة الحقيقية.
ركبت عربيتي، والدنيا كانت بتغلي جوايا، بس مش غضب، كان إحساس غريب بالقوة، إحساس الست اللي كانت طول عمرها طيبة ومستحملة لحد ما افتكروها ضعيفة، ودلوقتي رايحة تفرتك السيرك اللي نصبوه على حسابها. الطريق من التجمع للشيخ زايد كان بياخد حوالي ساعة، وفي الساعة دي، كنت برتب المشهد في دماغي مشهد مشهد. مكنتش ناوية أسامح، ولا ناوية أقبل بأي حلول وسط.
وصلت قدام الكومباوند في الشيخ زايد. بوابة الكومباوند اتفتحت، وركنت عربيتي ورا عربية المحامي بالظبط. نزلت، الهوا كان سخن، بس خطواتي كانت ثابتة. طلعت درجات السلم بتاعة الفيلا، والباب كان موارب، وصوت صريخ وزعيق من جوة كان مسموع لحد الجنينة.
