من وقت ما اتجوزت للمرة التانية، وانا سايبه بنتي عندها 4 سنين، عند ماما وكل مرة بتشوفني بتتعلق بيا أكتر، وبتفضل ماسكة في إيدي وتسألني: «ماما، النهارده هاتخديني معاكي انا عاوزه ابقا معاكى؟»آخر مرة روحت عند ماما فضلت طول القعدة تحكيلي عن أوضتها وإنها عايزة تيجي تنام عندي في البيت. ونفسها فى حضنى حاولت أشرح لها تفضل عند جدتها، بس هي مقتنعتش.
ولما جه وقت ما أمشي، استخبت ورا الباب، ولما لقيتها قلتلها: «هرجعلك بكرة تانى اقعد معاكى». مسكت إيدي وقالتلي: «بس أنا عايزة أكون معاكي دلوقتي، مش بكرة انا بحبك وعاوزه اكون معاكى». لقيت جوزى قال: «خلصى، أنا مش ناقص نكد ووجع دماغ». خرجت من البيت وقلبي كان بيتقطع، اتكلمت مع جوزي أكتر من مرة، وقلتله إن البنت محتاجاني، وإن وجودي معاها مش رفاهية، لكنه دايمًا بيقولي: «هي تلزم أبوها، ومالناش علاقة بيها». وبعد اسبوع بنتى دخلت فى انهيار وتعبت ودخلت المستشفى.
من أول يوم كتب فيه كتابي على «عصام» بعد طلاقي بسنتين، وأنا كنت حاسة إني بدوس على روحي بضغط شديد.
كان شرطه من أولها وصارم: «أنا واخدك إنتي، مش واخد عيلة وراكي.. بنتك عند أمك، تلزم أبوها، أنا مش هربي عيال حد، ولا هدخل بيتي وجع دماغ وعياط». وافقت، غصب عني وافقت تحت ضغط أهلي، وكلمة «الست مالهاش إلا راجل»، وكلام الناس اللي كان بيوجعني. سبت «نور» لسه بتتعلم تنطق الدنيا، عندها أربع سنين، سايباها عند أمي.. ومن يومها وأنا متقسمة نصين: جسمي في شقة عصام، وروحي عند عتبة بيت أمي.
كنت كل جمعة أروح أسرق ساعتين بالعافية، أشم ريحتها، أبوس صوابعها الصغيرة، وكل مرة كانت القفلة أتقل من الجبال على صدري. البنت ماسكة في هدومي، تعيط، تفرك بوشها في بطني: «ماما.. النهارده هتاخديني معاكي؟ أنا عايزة أنام في حضنك.. والله هبقى شاطرة.. خديني معاكي البيت». كنت أبلع ريقي المُر، وأحس بقلبي بينعصر، وأطبطب عليها بوعود: «بكرة يا حبيبتي.. المرة الجاية هجيبلك فستان حلو وأخدك». لحد الجمعة المشؤومة..
اليوم ده البنت كانت غير العادة، حاسة بحاجة، كل حركة أعملها تمشي ورايا زي ضلي، تحط إيدها في جيبي، تفضل تبص في عيني بصه كلها خوف.. ولما حست إني بقوم وبلم حاجتي وشنطتي، جريت دورت عليها في الشقة لقيتها مستخبية ورا باب الأوضة، كاشة في نفسها ودموعها نازلة من غير صوت. وطيت عليها، أخدتها في حضني، قولت لها بصوت بيترجف: «يا نور عيني.. يا حبيبتي متوجعيش قلبي، هرجعلك بكرة تاني والله هقعد معاكي اليوم كله». رفعت عينيها، ومسكت في صوابعي بكل قوتها وقالتلي بصوت مخنوق: «بس أنا مش عايزة بكرة.. أنا عايزة أكون معاكي دلوقتي، أنا بحبك أوي يا ماما، متسيبينيش والنبي».
فجأة، ومن على الباب، زعق عصام بصوت كله ضيق، وهو بيبص في ساعته وبيرزع المفاتيح: «خلصينا بقى إنتي وهي! إيه شغل المناحة اللي عايشين فيه ده؟ يلا يا ولية قدامي، مش ناقص نكد ووجع دماغ، هو كل أسبوع القرف ده ملوش نهاية؟». خرجت وراه ورجليا مش شايلاني، سامعة صراخ نور ورا الباب وهي بتخبط عليه وبتقول: «ماماااااا.. ماماااااا»، أمي بتحاول تمسكها، وأنا بتجر ورا الراجل. طول السكة وطول الاسبوع اللي بعده، البيت كان مليان توتر.. كلمته مرة واتنين وعشرة، عيطت وطلبت منه: «يا عصام عشان خاطر ربنا، دي عيلة أربع سنين مش فاهمة حاجة، دي بتموت في بعادي، هاتها هنا في أوضة صغيرة وأنا أخدمك، والله ما هتحس بوجودها، دي حتة مني مش قادرة أتنفس وهي بعيدة عني!».
رد عليا برفض قاطع: «هي تلزم أبوها، ومالناش دعوة بيها! إنتي متجوزاني أنا، والبيت ده بتاعي، مش ملجأ ولا حضانة.. هاتيلي سيرة البنت دي تاني وهتلاقي نفسك في الشارع جنبها». عدى الأسبوع ثقيل، لحد ما جه الفجر يوم التلات.. تليفوني رن رنة طويلة. قمت مفزوعة من السرير، خطفت التليفون قبل ما عصام يصحى، لقيت صوت أمي بينهج وبيصرخ من الدموع: «إلحقي يا بنتي.. إلحقي نور بنتك بتموت مني!
البنت قاطعة النفس من الصبح، وجسمها ولع نار، وبتتشنج وبتقول اسمك ومش دارية بالدنيا، احنا جرينا بيها على المستشفى، إلحقي البنت هتروح مننا يا بنتي!». الدنيا لفت بيا، صرخت صرخة مكتومة ورميت التليفون وجريت على الدولاب أشد أي عباية وأي طرحة، إيدي كانت بتترعش ومش عارفة ألبس من الخوف، قلبي كان بيدق في وداني.
