صوت نادية وهي بتلطم رهنتم بيتي يا ولاد الكلب؟! رهنتم شقى عمري عشان شاليه لمروة في الساحل؟! وصوت كريم وهو بيزعق في أخوه إنت السبب! قولتلي هنرد الفلوس من أرباح المشروع قبل ما مريم تاخد بالها! وديتنا في داهية وضيعت مراتي من إيدي!
زقيت الباب برجلي ودخلت بكل هدوء. القاعة سكتت فجأة. نادية كانت قاعدة على الكنبة، وشها أصفر زي الليمونة، ماسكة صدرها، وأحمد واقف بعيد حاطط إيده على راسه، ومروة منكمشة في ركن كأنها فار مبلول، وكريم أول ما شافني جرى عليا ودموعه في عينه مريم حبيبتي، اسمعيني بس
رفعت إيدي في وشه،
فوقف مكانه كأنه اتسمر. بصيت لنادية، اللي رفعت عينيها فيا بكسرة عمري ما شوفتها فيها، الست المتكبرة اللي كانت بتهيني من يومين عشان مروة. شيلت الدوسيه من إيد المحامي، ورزعته على ترابيزة السفرة اللي كانت لسه ممسوحة بعد عزومة أول إمبارح. الدوسيه رن بصوت عالي خلاهم كلهم يتخضوا.
أظن السفرة النهاردة مفهاش لحمة ولا جمبري يا حماتي قولت وأنا ببص لنادية في عينيها بس فيها أوراق هتدخل ولادك الاتنين ليمان طرة، وهتخليكي تنامي على الرصيف اللي قدام الكومباوند ده قبل ما الأسبوع يخلص. ها تحبوا نبدأ الحساب منين؟ مين اللي ميزانيته خلصت دلوقتي؟!
الجزء الثالث والأخير
الصوت الوحيد اللي كان شغال في ريسبشن فيلا زايد بعد الرزعة دي كان صوت تكتكة ساعة الحيطة الخشب الكلاسيك، وصوت نفس نادية وهي بتنهج كأنها بتغرق في شبر مية.
السفرة الضخمة اللي كانت من يومين بس مفروشة بأغلى أنواع الأكل والجمبري، ومحطوط عليها طبق فاضي معمول مخصوص عشان يكسر نفسي، كانت الليلة دي مفروشة بأوراق بيضا، أختام بنوك، صور شيكات، وإيصالات تحويلات بنكية حبرها أزرق فاقع، كل ورقة فيها كانت بمثابة مسمار بيتدق في نعش العيلة دي.
نادية كانت متبتة في صدرها بإيدين بترتعش، عينيها مبقتش قادرة ترفعها في عيني. الست اللي كانت بتبصلي من فوق لتحت وبتكلمني بنص لسان كأني خدامة جايباها من الشارع، كانت قاعدة قدامي مكسورة، منهارة، وشها شاحب وخالي تماماً من مساحيق التكبر اللي كانت دايماً دهناها على وشها.
مريم يا بنتي نادية بدأت تتكلم، صوتها طالع بالعافية، مشروخ وفيه رنة شحاتة رخيصة يا بنتي، استهدي بالله إحنا لحم ودم، إحنا ستر وغطا على بعض، الشيطان دخل ما
بينكم يا مريم كريم بيحبك، وأحمد ابني غبي ومتهور وطمع، بس إحنا في الأول والآخر أهلك!
بصيتلها وضحكت، ضحكة رنت في الصالة الفاضية خلت مروة تتنفض في مكانها.
لحم ودم؟ قولت وأنا بلف حوالين السفرة بخطوات بطيئة أهلي؟! إنتِ نسيتي الأهل دول كانوا بيعملوا إيه من يومين بس يا نادية هانم؟ نسيتي لما دخلت من الباب ده مهدود حيلي بعد 12 ساعة شغل في التجمع، ورميتي في وشي طبق فاضي وقولتيلي ميزانيتك خلصت عندنا، لو اتبقى حاجة ابقي كليها؟! كنت ساعتها لحمك ودمك؟ ولا كنت المكنة اللي بتصرف وتدفع، ولما اتأخرت ساعة على العزومة قولتوا نربيها وندوس على كرامتها؟!
كريم قرب مني خطوة، وشه كان مورم من الخوف، ومد إيده عشان يلمس كتفي مريم، عشان خاطري أنا عارف إني غلطت، وعارف إني كنت سلبي، بس والله العظيم أحمد ضحك عليا! قالي المشروع هيكسب دهب، وقالي كلها شهرين ونرجع الفلوس لحسابك ومحدش هيحس بحاجة! أنا مكنتش عايز أكسر قلب أمي لما أحمد اتزنق
سحبت نفسي لورا بقرف قبل ما إيده تلمسني، وبصيتله باحتقار عمري ما حسيته لبني آدم متلمسنيش! إنت مش راجل يا كريم إنت مجرد كائن عايش عالة، مسنود على ضهري، وبتسرقني من ورا ضهري عشان تراضي أخوك وعشان تتباهى قدام أهلك بفلوس مش بتاعتك! التوكيل اللي عملتهولك عشان تدير حساب الشغل وقت سفري استخدمته في السرقة والنصب؟! الشيك ده وشاورت على صورة شيك معرض العربيات تزوير رسمي، أو استغلال أمانة عقوبتها في القانون متقلش عن تلات سنين سجن مشدد!
أحمد زعق فجأة بصوت كله هستيريا، كان باين عليه إنه خلاص فقد أعصابه والحيطة سدت في وشه سجن إيه وبتاع إيه يا مريم؟! إنتِ فاكرة نفسك هتخوفينا بالمحامي بتاعك ده؟
مضى عليها وطلعها برضاه! وده مالي وماله! إنتِ ملكيش دعوة بين الإخوات! والبيت ده مش هيتحجز عليه، إنتِ اللي هتدفعي عشان سمعة جوزك وسمعتك إنتِ كمان! إنتِ مهندسة مشهورة وليكي اسم في السوق، ولو الفضايح دي طلعت، شغلك هيقف!
دكتور شريف المحامي، اللي كان واقف ورايا بكل هدوء ولابس نضارته الطبية، خطى خطوة واحدة لقدام، وفتح دوسيه أسود في إيده أستاذ أحمد، أنا بنصحك توفر طاقتك دي للتحقيقات في نيابة الأموال العامة. بصفتي وكيل البشمهندسة مريم، أنا رفعت دعوى إثبات تزوير واستيلاء على أموال الشركة، وده محضر رسمي تم تحريره الساعة اتنين الظهر بخصوص التوكيل الملغي وسحبه بعد تاريخ سحب الثقة. وفوق ده كله، البنك العقاري تم إخطاره رسمياً بوجود تلاعب وتزوير في الضمانات اللي اتقدمت لقرض ال 4 مليون جنيه، والبنك أصدر قرار مستعجل بوقف التعامل وإحالة الملف للشئون القانونية. يعني الشقة دي خلاص، راحت.
نادية لطمت على خدها بصوت عالي يالهوي! بيتي راح! شقى عمري وشقى أبوكم راح! يا فضيحتك يا نادية وسط الناس والكومباوند! يا خراشي! وبصت لمروة فجأة، واتحولت زي اللبوة الجريحة إنتِ السبب يا بت الفقر! إنتِ اللي عينك فارغة وطلباتك مابتخلصش! قولتيله عايزة شاليه في الساحل وعايزة أعيش في هاسيندا عشان متكونيش أقل من صحابك! خربتي بيت ابني وضيّعتي بيتي معاه!
