تقبلك بالورود والشربات بعد سنين العداوة دي؟! دي ست مريضة وموجوعة من عجزها، كان المفروض تكبري دماغك وتعدي، مش تقفي على الواحدة وتطولي لسانك معاها كأنكم في خناقة سوق!
برقت أميرة بعينيها وقعدت تقاوح بدموع وجنون
يعني أنا اللي غلطانة يا ماما؟! أنا اللي سايبة بيتي ورايحة أخدمها وهي بتشتمني وبتقول لي جاية تشمتي فيا! وعادل كمان بكل بساطة يقول لي اتفضلي امشي؟! هو أنا كيس جوافة ولا خدامة عندهم؟!
ردت الأم بهدوء حكيم وصارم
أيوه، غلطانة.. لأنك رايحة بعمل تطوعي وخالص لوجه الله، مش رايحة تاخذي حقك وتأخذي جولة ملاكمة. الإنسانية ملهاش شروط، واللي بيعمل الخير بيتمه للآخر من غير ما يستنى شكر.
سكتت أميرة، وكلمات أمها نزلت على قلبها زي القلم. جوه منها، كان ضميرها لسه صاحي ومصحصح، وبيقرصها پعنف.. هي عارفة كويس إن كل اللف والدوران ده، وإنها وافقت تروح أصلاً، مش عشان عادل المكسور وبس، ولا عشان أي حاجة تانية.. الغمزة اللي في قلبها كانت أعمق بكتير؛ هي لسه بتحب عادل، ولسه محرومة من قربه، ومن ريحة بيتها القديم اللي هدمته العصبية والظروف، وكان نفسها تحس إنها لسه جزء من دنيته.
فضلت قاعدة ثواني تاكل في نفسها، والصراع واكل عقلها، لحد ما قامت فجأة ومسحت دموعها بحسم وقالت لأمها بصوت مكسور
عندك حق يا ماما.. أنا فعلاً مكنش المفروض أسيبهم وأمشي. قومي بابا، خليه يلبس ويجيب العربية ويخدني.. لازم أرجع.
استغرب أبوها لما دخلت عليه، بس لما شافت إصرارها ولمعة الدموع في عينيها، فهم اللي في القلب. ركبوا العربية، ووصلوا المستشفى في وقت متأخر نسبياً.
فتحت باب الأوضة بهدوء، فوقفت عينيها على عادل اللي كان قاعد جنب أمه وشايل هم الدنيا كله على كتافه، وأمه نايمة بتئن بصوت خفيف. أول ما سمعوا صوت الباب، لف عادل وشه مستغرب، فوقف مكانه مذهول وهو شايف أميرة وابوها واقفين قدامه.
قربت أميرة بخطوات بطيئة، وبصت لعادل اللي كانت عينيه حمرا، وبعدين نزلت بنظرتها للحاجة اللي بصت لها بكسرة واستغربت رجوعها.
بلعت أميرة غصتها، وقالت بصوت دافئ وصادق خالي من أي كبرياء
أنا آسفة يا عادل.. وأنتِ يا خالة.. اعذروني، أعصابي خانتني ومكنش مفروض أسيبكم وأمشي في وقت زي ده. أنا رجعت.. ومش هتحرك من هنا غير لما تبقي كويسة يا خالة.
بص لها عادل بنظرة امتنان دمعت لها عينه، وحس إن الهوا رجع لصدره، أما الحاجة فحركت شفايفها بكلمة مش واضحة، بس كأنها نزلت على قلب أميرة برضا وسلام.
رفعت الحاجة راسها بصعوبة على المخدة، ونظرت لها بنظرة حادة كأنها بتتحداها، وقالت بصوت خشن ومبحوح
اعتذارك ده خليه لنفسك.. ميهمنيش! رجعتي ليه؟ مفكرة عشان دموعك نزلت هنسى كل اللي قلتيه ولسانك الطويل؟! اللي يخرج من دارة من غير طردة، ملوش مكان يرجع له.. اطلعي
