ولما تتجاهله وتمشي أسرع، كان بيوصل بيه العجز إنه يوقفها في أي شارع فاضي، وينزل على ركبه قدامها في الأرض، يمسك إيدها بحرقة ويبوسها بشرخ في صوته ودموعه نازلة على إيدها:
ـ **”أبوس إيدك يا شهد.. حني عليا! اعتبريني خدامك وخدام بنتك، بس وافقي نكتب الكتاب ونكون سوا.. أنا ١٠ سنين عايش على أملك، لو سبتيني دلوقتي أنتهي!”**
شهد كانت بتبصله بنظرة قرف واشمئزاز شديد، تسحب إيدها بقوة وتزقه بعيد عنها، وتقول له بصوت واطي ومسموم عشان محدش ياخد باله:
ـ **”أنت إيه؟ مفيش في وشك نقطة دم؟! إيه الذل ده؟! قولتلك مليون مرة أنا مش بتجوز شحاتين ولا هعيش في إيجار! ابعد عني وإلا قسماً بالله هلم عليك الشارع وأعملك محضر تعرض!”**
وترزعه الكلمة وتمشي وتسيبه مرمي في الأرض، ماسك إيده اللي كانت ماسكة إيدها، وعينيه رايحة جاية في الفراغ. بقى صلاح صورة حيّة للراجل اللي خسر بيته العمار، وبناته اللي من صلبه، وكرامته اللي رمى بيها في التراب، عشان يدور على حب وهمي أداه القلم اللي أفاقه على حقيقته.. بس بعد ما كان فوات الأوان خلاص!
مع تكرار الصد والمهانة، عقله ما بقاش قادر يتحمل حجم الصدمة والكسرة. الـ 10 سنين اللي عاشهم يبني فيهم صنم وهمي اسمه “حبيبة العمر”، مع خسرانه لبيته وعياله وكرامته، خلو كل أسلاك عقله تضرب ويدخل في حالة ذهان وهوس صريح.
بقى صلاح يقعد في أوضته المستأجرة يكلم نفسه بالساعات، يتخيل شهد بتضحك عليه وبتشاور عليه للناس بتقول “الهبيل أهو”. صوت الضحكة بقى يتردد في ودنه 24 ساعة، ما بينامش وما بياكلش، وعينيه بقت جاحظة وشكله بقى أقرب للمجانين.
في ليلة ضلماء، العقل الطار ساب مكانه للشيطان. صلاح مسك س/كينة مطبخ قديمة، وحطها بين هدومه، ونزل يتسحب زي الأشباح ناحية شارع شهد.
استناها تحت العمارة وهو مستخبي في ضل السلم، أول ما نزلت الصبح بدري عشان تودي بنتها المدرسة، خرج لها فجأة من الضلمة. شهد اتخضت وبصتله بقرف وقالت بنفس النبرة المستعلية:
ـ **”أنت تاني يا صلاح؟! مش قولتلك هعملك محضر مش هتخرج منه؟!”**
صلاح ما نطقش كلمة.. ملامح وشي كانت خالية تماماً من أي تعبير إنساني، عينيه كانت ثابته بجمود مرعب. في ثانية واحدة، سحب الس/كينة وانقض عليها بغل ومرض وسنوات قهره المكتومة!
الصرخة اتخنقت في زور شهد، وضربه فيها كذا ضربة ورا بعض وهو بيكرر بصوت هادي ومرعب:
ـ **”عشان ترتاحي.. عشان ما تحتاجيش شقة تاني.. عشان نكون سوا..”**
الشارع اتملى بالصرخات، والناس اتلمت وجريوا عليه مسكوه بالعافية وشالوا الس/كينة من إيده وهو مبيقاومش أساساً، كانت شهد وقعت على الأرض ولفظت أنفاسها الأخيرة في ثواني.
صلاح كان واقف وسط الناس بيضحك ضحكة هيستيرية طالعة من واحد عقله غاب عن الوجود تماماً.
بعد ساعات، كان صلاح قاعد في التخشيبة، لابس البدلة البيضاء ومكلبش، عينيه باصة للفراغ ومش دريان باللي حواليه. القاضي أوقع عليه أقصى العقوبة بعد ما أثبتت التقارير إنه ارتكب الج/ريمة بكامل ترصده، وصدر الحكم بسجنه.
وانتهت قصة صلاح.. الراجل اللي كان عنده بيت دافي، وزوجة صاينة، وبنات زي الورد، فباع كل ده عشان يجري ورا سراب، وكانت النهاية: واحدة في القبر، وهو ورا القضبان مسلوب العقل والكرامة، و”هنا” وبناتها عايشين في أمان بعيد عن جنونه.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
