خرج صلاح من العمارة وهو حاسس إن الأرض بتلف بيه، ماسك شنطة هدومه وإيده بترتعش، بس رغم صدمة التمكين كان لسه عنده أمل أعمى في شهد. كان بتقول لنفسه إن شهد هي الحب الحقيقي اللي مستنيه من 10 سنين، وأكيد هي مش زي هنا، أكيد هتقدر التضحية دي وتقف جنبه.
وصل تحت عمارتها وطلبها في التليفون بنبرة مكسورة ومستنجدة:
ـ “شهد.. أنا تحت العمارة، انزليلي يا شهد أنا نفذت كل اللي طلبتيه.. أنا طلقت هنا!”
بعد دقايق، نزلت شهد بخطوات هادية، لقت صلاح واقف بالشنطة على الرصيف، وشكلاً متدمر وشه باين عليه الكسرة. أول ما قربت منه، صلاح اتعدل وحاول يبتسم بضعف، وبص للشنطة وقيلها بنبرة ترجي:
ـ “شهد.. أنا طلقت هنا خلاص وبقيت حر عشانك، بس هي عملت حركة غادرة وطلعت أذكى منا.. راحت القسم وعملت تمكين للشقة وأخدتها بحكم القانون بصفتها حاضنة للبنات. بس ولا يهمك يا شهد! إحنا هنأجر شقة تانية أحسن منها ونبدأ فيها حياتنا.. المهم إننا أخيرًا بقينا سوا بعد 10 سنين انتظار!”
في اللحظة دي، ملامح شهد اتغيرت تماماً! الضحكة الرقيقة والعيون الدافية اختفت، وحل مكانها قسوة وسخرية لئيمة:
ـ “نبدأ من جديد في شقة إيجار؟! أنت بتستعبط يا صلاح؟! أنا أرجعلك وأسيب دنيتي عشان تقعدني في إيجار وتعيشني في الهم ده تاني؟ أنا شرطي كان واضح.. شقة ملك باسمي وباسم بنتي تضمن مستقبلي، إنما تقولي تمكين وشنطة هدوم في الشارع؟!”
ساعتها صلاح اتصدم، بس بدل ما يعتز بكرامته، الحب الأعمى والـ 10 سنين اللي ضاعوا خلوه ينهار قدامها! نزل على ركبه تقريباً على الرصيف، ومسك إيدها بلهفة ودموعه نزلت قدام الناس في الشارع وبدأ يتذلل لها بنبرة تقطع القلب:
ـ “عشان خاطر ربنا يا شهد ما تعمليش فيا كده! بلاش تقسي عليا أنتِ كمان.. ده أنا غيرت حياتي كلها عشانك، 10 سنين مغيرتش رقم موبايلي على أمل كلمة منك! 10 سنين عايش على ذكراكي وصورتك جوة المحفظة ما فارقتنيش لحظة! أنا مستعد أشتغل شغلتين وثلاثة وأجيبلك كل اللي تطلبيه، هعيشك ملكة في الإيجار والله، بس ما تبعديش عني تاني.. أنا من غيرك أموت يا شهد! التضحية دي كلها عشانك أنتِ، حرام تضيعيني!”
شهد بصتله بنظرة قرف واحتقار، وسحبت إيدها من بين إيديه بحدة وكأنها بتبعد عن شيء ملوث، وقالتله بنبرة جافة كالحديد:
ـ “أنت عبيط يا صلاح؟ 10 سنين صور ورقم موبايل ده كلام أفلام هندية لا يأكل عيش ولا يدفع إيجار! أنت كنت بالنسبة لي كارت مضمون أأمن بيه مستقبلي أنا وبنتي بعد طلاقي، إنما كارت محروق ومعندوش شقة تضمنلي حقي؟ تلزمني بإيه؟! اعقل ورش وشك بشوية مية.. وانسى الرقم ده وانساني خالص!”
قالت كلمتها ولفت ظهرها ومشيت، وطلعت العمارة ورزعت الباب، وسابته واقف في الشارع وسط الذهول والدموع بتغرق وشه.
صلاح بقى واقف لوحده في الشارع، ماسك الشنطة السودا، لا طال الشقة، ولا كسب احترامه لنفسه، ولا طال الحب القديم اللي عاش ينسج فيه أوهام 10 سنين وتذلل عشانه في الشارع.. خسر بيته، وبناته، وكرامته، واكتشف في النهاية إنه ضحى بالحقيقة عشان سراب حقير!
صلاح ما قدرش يستوعب الخيبة، ولا عقله المريض بالوهم قدر يقتنع إن كل اللي عاشه كان سراب. وبدل ما يرجع لربنا أو يحاول ينقذ اللي فاضل من كرامته، جري أجر أوضة وشقة صغيرة على قد فلوسه في منطقة بعيدة، ومابقاش وراه شغلانة في الحياة غير شهد.
بقى كل يوم، من أول ما النهار يطلع، يروح يقف تحت عمارتها بالساعات. أول ما تنزل عشان تشتري حاجة أو تودي بنتها، يفضل ماشي وراها زي الخيال، يتوسل لها بنبرة ترجي تكسر النفس:
ـ **”حرام عليكي يا شهد.. والله شقة الإيجار دي مؤقتة، أنا هشتغل شغلانتين وتلاتة وهجيبلك أحسن شقة ملك، بس حني عليا وما تسيبنيش! أنا بعت كل حاجة عشانك، ما تكسرينيش كده!”**
