أبني متجوز من شهر ولسه مراته منزلتش عندى، وكل يوم ينزلوا ويسلموا عليا من على الباب ويروحوا يسهروا عند أمها.. ولما واجهته قالى: دي عروسة يا أمي، سيبيها تعيش حياتها!
أنا أم وعندي ابن وحيد، ابني ده حتة من قلبي، ولما اتخطب كنت فرحانة بيه أوي، ولما اتجوز قولت أخيرًا هيفرح قلبي وأشوفه مستقر في بيته، وكنت فاكرة إن مراته هتبقى زي بنتي، وإن البيت هيفضل مفتوح بينا، لكن اللي حصل بعد الجواز خلاني أحس إني بقيت غريبة عن ابني اللي ربيته وكبرته على إيدي.
بقالهم شهر متجوزين، وكل يوم ينزلوا من شقتهم، يبصوا عليا من على الباب ويقولوا: إزيك يا ماما، عاملة إيه؟ أقولهم: الحمد لله يا حبايبي، طب ما تيجوا اقعدوا معايا شوية! ترد مراته وهي بتبص في الموبايل: معلش يا طنط، أصل ماما مستنيانا، هنروح نقعد معاها شوية ونرجع.
وياخدوا بعض ويمشوا! في الأول قلت معلش، العروسة لسه جديدة، ويمكن مش متعودة على بيتنا، وأمها وحشاها، لكن لما الموضوع زاد عن حده بدأت أزعل. واللي كان بيزعلني أكتر إن الجيران بقوا يتكلموا عن مرات ابني، وكل شوية واحدة تقف معايا وتقول لي كلام يضايق.
لحد ما في يوم جارتي قالت لي: بقولك إيه يا أم أحمد، هو ابنك مش بيغير على مراته؟ بصيت لها باستغراب وقلت: ليه؟ مالها مراته؟ قالت: يا ستي أنا مش عايزة أتكلم في حاجة تخصك، بس البنت بتحط مكياج كتير أوي وهي ماشية في الشارع، والناس بتتكلم، وابنك ماشي جنبها ولا كأن فيه حاجة!
أنا اتكسفت من كلامها، وقلت لها: يا أختي ربنا يهدي الجميع، كل بيت أدرى بظروفه. بس الكلام فضل يلف في دماغي، ولما ابني رجع من الشغل كلمته بهدوء. قلت له: بص يا أحمد، أنا مش عايزة أتدخل في حياتك، ولا أقولك تعمل إيه مع مراتك، بس خلي بالك من نفسك ومن بيتك، الناس بقت تتكلم على المكياج اللي بتحطه وهي نازلة معاك.
بص لي باستغراب وقال: وإيه المشكلة يا أمي؟ دي عروسة! قلت له: يا حبيبي أنا عارفة إنها عروسة، وربنا يسعدكم، بس في فرق بين إنها تتزين لجوزها في بيتها وبين إنها تنزل الشارع بمكياج مبالغ فيه والناس تفضل تبص وتتكلم. اتنرفز وقال: يعني أقولها إيه؟ امسحي وشك عشان الجيران مش عاجبهم؟ قلت له: أنا بقولك النصيحة يا ابني، وإنت حر، بس متجيش بعد كده تقول محدش نصحني.
سابني ومشي، وأنا قلت معلش، أكيد مع الوقت هيفهم. لكن اللي حصل بعدها كان أغرب! في يوم جارتنا اللي ساكنة قصادهم خبطت عليا، وكانت مترددة وهي بتتكلم. قالت: يا أم أحمد، أنا مش عايزة أعمل مشكلة، بس لازم تعرفي إن مرات ابنك بتقف في البلكونة بالقميص بتاع البيت، والناس اللي في العمارات اللي قصادكم شايفينها. أنا حسيت إن الأرض بتلف بيا، مش عشان كلام الناس وبس، لكن عشان أنا خايفة على ابني وبيته من المشاكل.
طلعت عندهم، ولقيت ابني قاعد على الكنبة ومراته في البلكونة. ناديت عليه وقلت: يا أحمد، تعالى عايزاك في كلمتين. دخل وهو متضايق وقال: خير يا أمي؟ هو فيه إيه تاني؟ قلت له: يا ابني، مراتك لازم تاخد بالها من لبسها في البلكونة، مش كل الناس اللي حوالينا محارم، وأنا مش عايزة حد يتكلم عليها.
رد عليا بكل برود: دي شقتي أنا ومراتي، وهنلبس فيها اللي إحنا عايزينه، وإنتِ مالك يا أمي؟ الكلمة دي وجعتني أوي! بصيت له وقلت: أنا مالي؟ أنا أمك يا أحمد، وخايفة عليك وعلى بيتك، هو أنا لما أنصحك أبقى بتدخل في حياتك؟
قال بعصبية: أيوه يا أمي، إنتِ بقيتي بتدخلي في كل حاجة، من ساعة ما اتجوزت وإنتِ عايزة تتحكمي فينا! سكت، ومقدرتش أرد عليه. نزلت شقتي وأنا بعيط، وقلت لنفسي يمكن أنا فعلًا بضغط عليه من غير ما أحس، وقررت أبعد عنهم شوية، وأسيبهم يعيشوا حياتهم زي ما هو عايز.
لكن والله العظيم ما كنت أعرف إن البُعد ده هيكشف لي حاجة عمري ما تخيلت إنها تحصل! عدت يومين، لا أحمد سأل عليا ولا مراته نزلت حتى تسلم عليا. وفي اليوم التالت، الساعة كانت حوالي اتناشر الضهر، رنيت على ابني. قلت له: إزيك يا حبيبي؟ عامل إيه؟ ومراتك عاملة إيه؟ قال بسرعة: الحمد لله يا أمي، خير؟ قلت له: مفيش خير ولا شر يا ابني، أنا بس بطمن عليكم، وبقولك إيه، انزلوا اتغدوا معايا النهارده، أنا لوحدي ومش عايزة آكل لوحدي.
اتنهد وقال: والله يا أمي مراتي تعبانة أوي ونايمة، مش هنعرف ننزل. قلت له: سلامتها يا حبيبي، طب أنا أطلع أطمن عليها وأشوف لو محتاجة حاجة. قال بسرعة: لا يا أمي، سيبيها ترتاح. بس أنا قلقت، وقلت يمكن البنت فعلًا تعبانة ومحتاجة حد يساعدها.
طلعت وخبطت على الباب، وابني فتح لي، ودخلت لقيت مراته قاعدة على السرير، ماسكة الموبايل وبتضحك، ولا شكلها تعبانة ولا حاجة. بصت لي وقالت: أهلًا يا طنط، خير؟ بصيت لها وقلت: ألف سلامة عليكي يا بنتي، أحمد قالي إنك تعبانة، قلت أطلع أشوفك، ولو محتاجة حاجة أعملهالك. قالت وهي لسه بتبص في الموبايل: لا يا طنط، أنا كويسة الحمد لله.
قلت لها: طب ما تيجي ننزل نجهز الغدا سوا، أنا عاملة أكل حلو النهارده. ردت بكل بساطة: لا يا طنط، إحنا هنجيب حواوشي. فضلت باصة لها كام ثانية، مش عارفة أقول إيه! حتى مجاملتنيش وقالت لي: اتفضلي اتغدي معانا، أو تعالي نقعد شوية.
حسيت إني تقيلة عليهم، فقمت وقلت: براحتكم يا حبايبي، ألف هنا وشفا. وأنا خارجة سمعت صوتها بتقول لأحمد: هي مامتك هتفضل كل شوية تطلع لنا كده؟ وقفت مكاني، وقلبي اتقبض، لكن كملت نزول من غير ما أتكلم.
