
نزلت شقتي، وحطيت الأكل اللي كنت عملاه في التلاجة، وقعدت لوحدي على السفرة، وبصيت على الكرسي اللي كان ابني بيقعد عليه وهو صغير. افتكرت لما كان يرجع من المدرسة ويجري عليا ويقول: ماما، أنا جعان، عملتيلي إيه؟ وكنت أسيب كل حاجة في إيدي وأقعد آكله بنفسي.
دموعي نزلت غصب عني، وقلت: يا رب، أنا مش عايزة منه حاجة، أنا بس عايزة أحس إنه لسه ابني، وإن مراته مش شايفاني عدوة ليها. لكن اللي حصل بعد المغرب خلاني أغيّر نظرتي للموضوع كله! كنت قاعدة في الصالة، وفجأة سمعت صوت خبط شديد على باب شقتي.
فتحت، لقيت أحمد واقف قدامي، ووشه متغير، ومراته واقفة وراه وبتعيط. أول ما دخل قال لي: مبروك يا أمي، إنتِ كنتِ عايزة تعرفي كل حاجة عن بيتنا؟ أهو عرفتي! اتخضيت وقلت: في إيه يا ابني؟ مالكم؟ حصل إيه؟
مراته دخلت ووقفت قدامي، وقالت وهي بتعيط: يا طنط، أنا عمري ما كنت عايزة أزعلك، بس في حاجة لازم تعرفيها، وأنا تعبت ومش قادرة أستحمل أكتر من كده! بصيت لابني، لقيته بيبص لها بغضب وبيقول: إنتِ هتتكلمي؟! صرخت فيه وقالت: أيوه هتكلم! كفاية سكوت لحد كده!
أنا قلبي بدأ يدق بسرعة، وقلت لهم: حد يفهمني فيه إيه؟ إنتوا هتجننوني! مراته مسحت دموعها، وطلعت موبايلها، وفتحت رسالة، ومدتهالي وهي بتقول: يا طنط، قبل ما تحكمي عليا إني مش عايزة أنزل عندك، لازم تعرفي إن فيه سبب مخلي أحمد نفسه مش عايزني أقعد معاكي لوحدنا… والرسالة دي هي اللي هتثبتلك كل حاجة!
مسكت الموبايل وأنا إيدي بتترعش، وبدأت أقرأ أول سطر… وفجأة رفعت عيني وبصيت لابني، وقلت له بصوت مبحوح: إنت عملت كده في أمك يا أحمد؟! أحمد خطف الموبايل من إيدي، وصرخ في مراته: إنتِ وعدتيني إنك مش هتفتحي الموضوع ده!
وساعتها عرفت إن الحكاية مش حكاية مكياج ولا بلكونة ولا حواوشي… وإن فيه سر مستخبي في بيت ابني، لو اتكشف ممكن يغيّر علاقتنا ببعض للأبد!
يا ترى إيه الرسالة اللي شافتها الأم؟ وإيه اللي كان أحمد مخبيه عنها؟ وهل مرات ابنها فعلًا هي السبب في بُعده عنها، ولا فيه حكاية تانية محدش يعرفها؟ يتبع…
لو وصلتي لحد هنا، اكتبي لنا توقعك في التعليقات، وقوليلنا: هل الأم من حقها تنصح ابنها، ولا لازم تسيبه يعيش حياته من غير تدخل؟ ومتنسوش تصلوا على النبي ﷺ.
#حكاوي_شيمو
أبني متجوز من شهر ولسه مراته منزلتش عندى.. ولما مسكت الموبايل وقريت الرسالة، اكتشفت إن ابني مخبي عني سر قلب حياتنا كلنا!
الجزء الثاني
مسكت الموبايل من مرات ابني، وكنت لسه هكمل قراءة الرسالة، لكن أحمد خطفه من إيدي بعصبية وقال: خلاص يا أمي، الموضوع انتهى، ومش عايز أتكلم فيه!
بصيت له وقلبي بيتقطع، وقلت له: انتهى إيه يا أحمد؟ إنت جايلي البيت وبتقول كلام يخوف، ومراتك بتعيط، وأول ما هقرأ الرسالة تخطف الموبايل من إيدي! إنت مخبي عني إيه؟
مراته كانت واقفة ودموعها بتنزل، وقالت له: كفاية بقى يا أحمد! أنا من يوم ما اتجوزتك وأنا ساكتة عشان خاطرك، لكن مش هقبل إنك تخليني أنا الغلطانة قدام أمك، وهي متعرفش الحقيقة!
أحمد بص لها بحدة وقال: إنتِ بالذات آخر واحدة تتكلم عن الغلط! أنا دخلت بينهم وقلت: بس! محدش يزعق للتاني في بيتي. يا أحمد، دي مراتك، وإنت اخترتها، ولو فيه مشكلة بينكم تتحل بالعقل. لكن أنا لازم أفهم إيه اللي بيحصل.
مراته بصت لي وقالت: يا طنط، إنتِ فاكرة إني مش بنزل عندك عشان شايفة نفسي عليكي؟ والله مش ده السبب. أحمد اتلخبط، وبعدها قال: يا أمي، أنا مكنتش عايز أزعلك، بس إنتِ كل شوية بتسأليها عن لبسها وخروجها، وبتكلميها عن المكياج، وبتقولي لها لازم تعملي ولازم متعمليش، وأنا مش عايز مراتي تحس إنها تحت المراقبة.
اتصدمت من كلامه، وقلت: يعني إنت كنت بتخليني أفتكر إنها هي اللي مش عايزة تقعد معايا؟ طب ما كنت تقول لي من الأول! وبعدين أنا لما نصحتها، نصحتها من خوفي عليكم، مش عشان أتحكم فيها.
مراته مسحت دموعها وقالت: أنا عارفة يا طنط، وعشان كده كنت بحاول أعدي الكلام وأسكت. بس فيه حاجة تانية، وهي السبب الحقيقي اللي خلاني أرفض أنزل عندك امبارح. بصيت لها وقلت: إيه هي يا بنتي؟ اتكلمي.
فتحت موبايلها تاني، وطلعت صورة لمحادثة بينها وبين أحمد. وقالت: امبارح لما إنتِ كلمتي أحمد وقلتي له ننزل نتغدى معاكي، هو قال لي إني تعبانة ونايمة، مع إني مكنتش تعبانة. ولما إنتِ طلعتي عندنا، هو اتعصب عليا بعد ما مشيتي، وقال لي إنك بتتعمدي تدخلي في حياتنا، وإنه مش عايزني أقعد معاكي عشان متعرفيش تفاصيل بيتنا.
بصيت لأحمد، لقيته ساكت، فقلت له: الكلام ده صح؟ قال بضيق: أيوه، بس إنتِ مش فاهمة قصدي! قلت له: طب فهمني يا ابني، أنا أمك، مش واحدة غريبة عنك.
مراته كملت كلامها وقالت: يا طنط، أنا والله ما عنديش مشكلة أقعد معاكي ولا أطبخ معاكي ولا أساعدك في أي حاجة، لكن أحمد كان بيقولي إنك لو عرفتي تفاصيل حياتنا هتفضلي تتدخلي، وإننا لازم نخبي عنك كل حاجة.
هنا حسيت إن فيه حاجة أكبر من مجرد خلاف بين أم ومرات ابنها. قلت لأحمد: إنت خايف مني للدرجة دي يا ابني؟ أنا عمري ما طلبت منك فلوس، ولا قلت لك متصرفش على بيتك، ولا طلبت منك تيجي كل يوم تقعد معايا. كل اللي طلبته إنك متحسسنيش إني بقيت غريبة عنك.
أحمد نزل عينه في الأرض، وفضل ساكت شوية، وبعدها قال: أنا آسف يا أمي، بس فيه حاجة إنتِ لسه متعرفيهاش. قلبي اتقبض، وقلت: إيه تاني يا أحمد؟ هو أنا ناقصة وجع قلب؟
بص لمراته، وهي هزت راسها كأنها بتقوله يتكلم، وبعدها قال: يا أمي، قبل ما أتجوز، أنا كنت واخد قرار إني أبيع الشقة اللي فوق وأشتري شقة تانية بعيد عنك، لكن بعد الجواز مراتي قالت لي إنها مش موافقة على الموضوع ده.

