كلام الدكتور نزل على قلبي زي المية الباردة، سجدت على البلاط من الفرحة إنها عايشة، وقولت بصوت عالي: «الحمد لله يارب.. هفضل معاكي يا نور، مش هسيبك دقيقة، هنام على البلاط ده جمبك لحد ما تفتحي عينك». قومت مسحت دموعي، ولفيت عشان أدخل الأوضة.. لكن فجأة، لقيت إيد مسكت دراعي بقوة ولفتني ليها بعنف. كان عصام. عينه كانت حمرا، ملامحه ناشفة.
شدني من دراعي وزقني ناحية السلم بعيد عن أوضة الرعاية وعن أمي، وقفت أقاومه ودموعي بتنزل: — «سيبني يا عصام! سيب دراعي الدكتور قال لازم أكون جمبها! البنت هتموت لو مفتحتش لقتني في وشها، دي مسألة حياة وموت!». ضغط على دراعي أكتر، وقرب وشه مني، وقال بصوت واطي بس كان حازم وعنيف:
«دكتور مين وحياة وموت مين؟ إنتي سامعة نفسك بتقولي إيه؟ اسمعي الكلمتين دول وحطيهم في ودنك عشان أنا فاض بيا الكيل.. إنتي مش هتقعدي معاها في المستشفى دي دقيقة واحدة، هتروحي بيتك دلوقتي حالا! هي ليها أبوها ييجي يقف جنبها، إحنا مش فاضيين للمرمطة دي، ولا البيت هيتساب.. يلا قدامي على البيت حالا، ولو رجلك خطت خطوة تانية ناحية الباب ده، متلوميش غير نفسك!».
الكلمة نزلت على دماغي، وحسيت إن وداني بتصفر وصوت الأجهزة يتلاشى. بصيت في عينيه، كنت شايفية قسوة وراجل شايف روحي وروح بنتي مجرد تفصيلة تافهة بتعطل راحته.
حاولت أشد دراعي من قبضته، الوجع في جسمي مكنش يجي ذرة جنب الوجع اللي شق صدري. همست بصوت بيترجف: — «إنت بتقول إيه؟ بنتي بين الحياة والموت جوة! الدكتور لسه قايل لو فاقت وملقتنيش هتموت.. إنت قلبك ده معمول من إيه؟ حجر؟ ده حتى الغريب بيحن!».
زاد ضغطته على دراعي لدرجة خلتني أصرخ، وقرب وشه أكتر: — «قولتلك رجلك على البيت! صوتك ميعلاش هنا عشان مفضحكيش.. أبوها ييجي يغور يقعد جنبها، إنتي على ذمة راجل، وكرامتي وراحتي قبل أي حد في الدنيا.. يا تمشي قدامي بهدوء دلوقتي حالا، يا تخرجي من الباب ده بورقتك، ومفيش رجوع!».
في اللحظة دي، شريط حياتي كله عدى قدام عيني: خوفي من كلام الناس، زن أهلي، التنازلات اللي قدمتها لحد ما رميت بنتي عشان أرضي راجل مبيشوفش غير نفسه. فجأة، كل الخوف ده داب، واتحول لنار قادت في عروقي.. بصيت على لوح الإزاز اللي وراه نور، الطفلة اللي ملهاش ذنب، وافتكرت صوابعها الصغيرة وهي متبتة في هدومي وبتقولي: «أنا بحبك أوي يا ماما، متسيبينيش».
رفعت عيني في عينه، وشديت دراعي بكل عزمي، لحد ما صوابعه فلتت، ورجعت خطوة لورا ووقفت في نص الطرقة بطولي. مسحت دموعي بطرحتي، وبصيتله بنظرة خليته يبرق ويرجع خطوة لورا. قولتله بصوت عالي، ثابت، رج الطرقة وخلى الكل يبصولنا: — «ورقتي توصلني عند أمي يا عصام.. والشارع اللي هترميني فيه أشرف وأرحم ألف مرة من بيتك اللي مفهوش ريحة الرحمة.. بنتي هي حياتي اللي أنا فرطت فيها بغبائي، ولو كان التمن إني أعيش خدامة عشان أربيها، أنا قابلة.. لكن مش هبيع ضنايا عشان أنام في شقة مفروشة مع راجل ميسواش في عيني مليم!».
وشه جاب ألوان، الغضب عماه، ورفع إيده لفوق عشان ينزل بكفه على وشي: «يا…»، لكن قبل إيده ما تلمسني، كانت إيد تانية قوية مسكت معصمه ولفت دراعه لورا. كانت الممرضة الكبيرة بتاعة القسم ومعاها اتنين من أمن المستشفى اللي جريوا على الصوت. زعق رئيس الأمن بصوت خشن: — «إنت فاكر نفسك فين؟ دي مستشفى حكومة مش زريبة! نزل إيدك بدل ما نطلبلك النجدة!».
عصام اتلوى من الإحراج، نتر إيده من الأمن وبصلي بقرف وهو بيعدل جاكتته: — «بقى كدة؟ بتبيعي راجلك عشان حتة عيلة؟ ماشي يا نجوى.. اعتبري نفسك طالق، وورقتك هتوصلك على بيت أمي، ومش هتشوفي مني مليم، وهتلفي على البيوت تشحتي أنتي وبنتك!». لف ضهره ورزع كعبه في الأرض ومشي. وقفت مكاني، النفس كان داخل خارج من صدري، بس لأول مرة من سنين أحس إن الهوا نظيف.. مكنش فيه خوف، مكنش فيه ذل، كان فيه وجع بس معاه راحة غريبة.
