لفيت وشي لقيت أمي بتبصلي بذهول ودموعها بتنزل، مسكت إيدي وقالتلي بصوت مخنوق: «عملتي إيه يا بنتي؟ خربتي بيتك تاني؟ الناس هتقول عليكي إيه؟». نزلت بوست إيدها المرتعشة وقولت بحسم لأول مرة أمي تسمعه مني: — «الناس مكنتش هتدخل القبر معايا يا أمي، والناس مش هي اللي كانت هتدفن بنتي لو ماتت.. بنتي أهم من الدنيا كلها، ومن اللحظة دي مفيش راجل هيدخل حياتي ولا هيتحكم في ضنايا، بنتي هتعيش في حضني، ولقمة بملح وإحنا سوا بالدنيا وما فيها».
في اللحظة دي بالظبط، اتفتح باب الرعاية المركزة، وخرجت ممرضة بتجري وبتنادي بلهفة: — «مين والدة الطفلة نور؟ فينك يا مدام؟». قلبي وقع في رجلي، جريت عليها وقولت بفزع: — «أنا! أنا أمها.. خير يا رب، في إيه؟ بنتي جرالها حاجة؟!». الممرضة ابتسمت بتعب وطبطبت على كتفي: — «اهدي يا ستي، البنت بدأت تفوق من الغيبوبة.. شفايفها بتتحرك وبتنده باسمك، والحرارة نزلت، الدكتور بيقول تدخلي لها فوراً وبلاش عياط قدامها».
دخلت جري، عقمت إيدي ولبست البالطو الأزرق، ورجليا كانت بتسابق الريح لحد سريرها الصغير. نور كانت هناك.. وشها لسه شاحب وعينيها نص مقفولة، بس رموشها بتتحرك بضعف، والخراطيم بدأت الممرضة تشيل منها شوية. قربت منها براحة، مسكت إيدها الصغيرة اللي كانت متوصلة بالمحلول، وبوستها، وحطيت خدي على كفها الدافي ودموعي بتنزلق: — «نور.. نور عيني، أنا هنا يا قلبي.. ماما جنبك ومش هتمشي تاني أبداً».
البنت فتحت عينيها ببطء شديد، أول ما ميزت وشي، صوابعها الصغيرة قفلت على صباعي بكل الضعف اللي باقي فيها، وطلعت همسة مبحوحة: — «ماما.. إنتي جيتي؟ مش هتروحي عند الراجل الوحش تاني؟». ضميتها لحضني بحذر، ودفنت وشي في رقبتها وأنا بشم ريحتها، وقولتلها بصوت طالع من قاع قلبي: — «مش هروح في حتة يا نور.. ماما خلاص رجعتلك، ومفيش حد في الدنيا هيفرقنا تاني أبداً.. أنا هنا في حضنك لحد ما تكبري».
عدت الساعات في المستشفى، واليومين اللي بعدهم مسبتش إيدها لحظة، كنت بنام على كرسي حديد، بس مرتاحة، مبقتش أسرق الساعات ولا بخاف من رنة تليفون. نور بدأت تسترد عافيتها واحدة واحدة، وشها رجع فيه الدم، وبدأت تضحك ضحكتها الرقيقة، وكانت كل شوية تتأكد إني لسه ماسكة إيدها وتقولي: «إحنا هنروح بيتنا عند تيتا سوا؟» وأرد عليها: «سوا يا قلب ماما.. ومحدش هيقفل الباب في وشك تاني».
في اليوم التالت، دخل الدكتور عشان يكتبلها إذن خروج، بص على التحاليل وابتسم: — «معجزة الطفلة دي كانت وجودك، نفسيتها لما استقرت سكرها اتظبط.. خدي بنتك وروحي يا ست الكل، بس اوعي تزعليها تاني، البنت دي روحها معلقة في رقبتك». شكرته، جهزت حاجتها، ولبستها فستانها الصغير، وخرجت شايلاها على دراعي وأمي ماشية جنبي ساندة عليا وفخورة بيا.
وصلنا بيت أمي القديم، الحيطان اللي كنت شيفاها زمان سجن، شوفتها النهاردة أوسع من قصر، عشان فيها أماني وأمان ضنايا. دخلت الأوضة، حطيت نور على السرير، ونامت وهي مبتسمة وضامة عروستها.. قعدت على طرف السرير، وبصيت لنفسي في المراية؛ ست تعبانة، وشها مهدود، مطلقة مرتين، معندهاش قرش في جيبها، بس عينيها فيها لمعة كبرياء وشرف مكنتش موجودة زمان.
قررت في اللحظة دي إني مش هستنى رحمة من حد، ولا هستنى نفقة، هنزل من الفجر، هدور على شغل، هشتغل في مصنع، هنضف بيوت، المهم أربي بنتي بلقمة حلال وبكرامة متهدرش تاني.
لكن الهدوء ده مكنش مقدر له يطول كتير.. بعد أسبوعين بالظبط من اليوم ده، وأنا راجعة من أول يوم شغل ليا في مشغل خياطة صغير، وشايلة في إيدي كيس فاكهة صغير جايباه لنور من أول يومية ليا، وفرحتي مش سايعاني.. وصلت عتبة البيت، لقيت الحارة مقلوبة، وناس متجمعة، وعربية فخمة واقفة تحت الباب مش غريبة عليا، وعصام واقف ساند عليها..
بس الصدمة الأكبر مكنتش عصام! الصدمة كانت الراجل التاني اللي واقف جنبه، راجل مكنتش شوفته ولا سمعت صوته من أربع سنين.. راجل رمى بنته من يوم ما اتولدت ومسألش عنها بجنيه.. «طارق».. طليقي الأول، وأبو نور!
عصام شاور عليا أول ما شافني، وابتسم ابتسامة كلها غل، وقال بصوت عالي سمّع الحارة كلها: — «أهي وصلت الهانم أهي.. ادخل خد بنتك يا طارق يا أخويا، ما دام أمها دايرة تشتغل في المشاغل وسايباها، القانون معاك والحضانة بقت من حقك رسمي بعد ما اتطلقت مني.. وريني بقى هتربيها إزاي يا نجوى بعد ما ورقة الحضانة دي تسحبها منك النهاردة!».
طارق طلع من جيبه إعلان من المحكمة ورماه في وشي بنظرة تحدي، وأنا الكيس وقع من إيدي والفاكهة اتدحرجت على الأرض، وسمعت صوت صريخ نور من بلكونة أمي وهي بتنادي عليا ومرعوبة من صوت الدوشة في الشارع.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
