
سمعت صوت باب الحمام بيتفتح. في ثانية مسحت دموعي، ورميت نفسي على السرير وعملت نفسي نايمة. طارق طلع، مسك موبايله، وشاف الرسايل. حسيت بيه وهو بيقرب مني، وهز كتفي بالراحة عشان يتأكد إني نايمة. كتمت نفسي وماتحركتش، لحد ما اطمن إني في سابع نومة، وخرج بره الأوضة.
تاني يوم الصبح، الكل كان بيستعد. طارق قال إنه رايح شقة أخته يجهز هناك عشان زحمة البيت. وحماتي وسلفتي لبسوا واتشيكوا، وقبل ما ينزلوا، عدوا على باب أوضتي وبصولي بنظرات كلها شماتة وانتصار، كأنهم بيقولولي: “موتي بغيظك، إحنا رايحين نفرح وإنتي خليكي هنا.”
قفلوا باب الشقة وراهم، وفاكرين إن سلمى الخرسا هتقعد تعيط وتندب حظها وهي مش فاهمة حاجة.
وطارق فاكر إنه استغفلني، وهيدخل عليا بضرة وهيحطني قدام الأمر الواقع.
بس هما نسيوا حاجة واحدة.. إن اللي ربنا بياخد منه نعمة، بيديله قصادها دهاء وقوة تهد جبال. قمت من مكاني، مسحت آخر دمعة نزلت من عيني، وبصيت في المراية بابتسامة باردة.
قررت إني هروح الفرح.. هروح أبارك لجوزي وأهله بنفسي، وأعرفهم إيه اللي ممكن تعمله مراته اللي لا بتتكلم ولا بتسمع، وازاي هخليهم يندموا على عملتهم، بطريقة متخطرش على بال إبليس!!!!!!
قمت من السرير وأنا حاسة إن في نار قايدة جوه صدري، بس دماغي كانت شغالة بهدوء مرعب. فتحت الدولاب، وطلعت الفستان اللي كنت مجهزاه من أيام، فستان لونه أسود ملكي، شيك جداً ومحتشم، يبين إني ست ليها هيبة وكرامة، مش واحدة مكسورة ولا مقهورة. لبست، وحطيت ميكب خفيف يداري أي أثر للعياط، ولميت شعري بتسريحة راقية، وبصيت لنفسي في المراية… لأول مرة من شهور، شفت “سلمى” القوية، مش سلمى اللي بتسكت على الغلط.
قبل ما أنزل، مسكت ورقة وقلم، وكتبت بخط واضح وكبير:
“اللي بيفتكر إن السكوت ضعف، بيصحى على صدمة عمره.”
حطيت الورقة في نص السرير في مكان باين، وقفلت باب الشقة ورايا، ونزلت.
ركبت عربية وطلعت على القاعة اللي فيها الفرح. طول الطريق، كنت بفكر: أعمل إيه بالظبط؟ لو هجمت أو عملت خناقة، هيقولوا “مجنونة” أو “مش فاهمة”. لكن لو ضربتهم في مـ.ـقـ.ـتـ.ـل، في الحتة اللي توجعهم بجد، وقتها هيتمنوا الأرض تنشق وتبلعهم!
دخلت القاعة، والأنوار والمزيكا شغالة، والناس متجمعة. عيني راحت على الكوشة… شفت طارق لابس البدلة وشيك، وجنبه ندى بفستان الفرح الأبيض، وبتضحك بدلع كأنها ملكة متوجة. وتحت الكوشة، كانت حماتي وسلفتي قاعدين في الصف الأول، وشهم منور بالشماتة والانبساط.
مشيت بخطوات ثابتة وهادية، والكل بيبص لي باستغراب؛ أصل مين دي اللي داخلة لوحدها ووشها جامد كده؟ أول ما وصلت عند الصف الأول، حماتي بصتلي وعينيها وسعت من الصدمة، وسلفتي خبطتها في دراعها وهي بتقول بخفوت: “إلحقي… دي سلمى!”
قربت منهم، وبدل ما أعمل أي صوت أو أتعصب، طلعت الموبايل اللي كنت مصورة عليه الشاشة بتاعة واتساب طارق وندى بالليل، وفتحت الصور والفيديوهات اللي لحقت أصورها قبل ما يخرج من الحمام، وبدأت أوريها للناس اللي قاعدة حوالين حماتي وسلفتي… قرايبهم وجيرانهم اللي جايين يباركوا!
الناس بدأت تقرا الرسايل وتبص لبعض بصدمة: “إيه ده؟! ده العريس باعت لبنت عم مراته؟! ومراته الأولى ماتعرفش؟!”
الهمس بدأ يعلى، والنظرات اتغيرت في ثانية من نظرات تهنئة لنظرات فضيحة واستحقار! حماتي قامت واقفة ووشها بقى أحمر زي الطماطم، وحاولت تاخد الموبايل من إيدي، بس أنا كنت أسرع منها، لفيت وطلعت على سلم الكوشة…
طارق شافني طالع، وشه جاب ألوان، وقام وقف بسرعة وندى مسكت إيده بخوف. وقفت قدامهم، وابتسمت ابتسامة هادية جداً، ورفعت إيدي بلغة الإشارة، وكتبت في نوتة صغيرة معايا بالقلم العريض عشان الكل يشوفها بوضوح:
“ألف مبروك يا عريس… مبروك على الخيانة، ومبروك على العروسة اللي باعت بنت عمها وصاحبتها عشان راجل متجوز.”
وبعدين لفيت النوتة ناحية المعازيم والناس اللي واقفة تحت الكوشة، وبدأت أرفع صور الرسايل اللي بتثبت إن ندى كانت بتتفق معاه من ورايا وبتتريق عليا عشان “طرشة”!

