روايات_مشيره_محمد
آدم فضل واقف قدام مكتبه ماسك كارت الميموري بين صوابعه وكأنه ماسك قنبلة ممكن تنفجر في أي لحظة
كان مستغرب إصرار ليلى إنها تسيبله الكارت ده بالذات قبل ما تسافر من غير ما تقوله هي راحت فين ولا حتى تسيبله رقم تليفون يقدر يوصلها بيه
بص لمساعده وقال بعصبية
ـ إنت متأكد إنها قالتلك تسلمهولي بنفسي؟
رد المساعد
ـ أيوه يا فندم وقالتلي بالحرف إن حضرتك لازم تشوف اللي عليه بنفسك ومحدش غيرك يفتحه
ـ وكنت عارف إنها حامل؟
ـ لا يا فندم دي أول مرة أسمع فيها الموضوع
آدم صرفه بإشارة من إيده وقعد قدام الكمبيوتر وركب الكارت
ظهر قدامه ملف فيديو واحد متسجل بتاريخ ليلة الحريق
ضغط عليه
وفي أول ثواني ظهرت ليلى وهي قاعدة في أوضة المكتب وبتتكلم بصوت هادي مع نفسها
ـ لو أنا في يوم اختفيت أو حصلي حاجة ومقدرتش أتكلم بنفسي يبقى لازم الحقيقة دي توصل لآدم مهما حصل
آدم قرب وشه من الشاشة
ليلى كملت
ـ أنا مش عارفة هقدر أواجهه بالحقيقة دي ولا لأ بس تعبت من إني أعيش وسط ناس بتضحك في وشي وبتخبي عني حاجات كتير
وبعدها ظهر فيديو تاني من كاميرا مراقبة في الممر المؤدي لأوضة النوم
آدم اتعدل في قعدته
الكاميرا كانت بتصور الممر قبل الحريق بساعات
ظهرت نادين وهي داخلة الأوضة وباصة حواليها بتوتر
وبعدين طلعت موبايلها واتصلت بحد
قرب آدم من الشاشة أكتر
كان صوتها واضح
ـ أيوه أنا عملت اللي اتفقنا عليه بس لازم تفهمني إحنا هنخلص من الموضوع ده إزاي
سكتت شوية وهي بتسمع الطرف التاني وبعدين قالت
ـ متقلقش أنا هتصرف بس أهم حاجة آدم ميفهمش حاجة
الفيديو انتهى
آدم فضل باصص للشاشة مش قادر يستوعب
رجع شغله تاني
لكن المرة دي ركز في الوقت اللي ظهر على التسجيل
كان قبل الحريق بحوالي ساعة
فتح ملف تاني لقى تسجيل من كاميرا المطبخ
نادين كانت بتتكلم مع واحدة من العاملات وبتديها تعليمات إنها متقربش من جناح النوم وإنها تبلغ الأمن إن فيه مشكلة في لوحة الإنذار لو سمعت أي صوت
آدم حس إن الدم اتسحب من وشه
ضغط على الملف الأخير
وكان ده اللي قلب حياته كلها
تسجيل صوتي قصير من موبايل نادين وهي بتتكلم مع شخص مجهول
قالت فيه
ـ أنا مش هفضل مستنية أكتر من كده يا ريتك تخلص الموضوع قبل ما ليلى تكتشف كل حاجة
وجاله صوت الراجل
ـ اهدي يا نادين كل حاجة هتمشي زي ما اتفقنا
نادين ردت
ـ بس لو حصلها حاجة آدم هيشك فيا
الراجل ضحك وقال
ـ آدم مش هيشك فيكي طول ما إنتي بتعيطي قدامه وبتعملي نفسك الضحية
آدم وقف فجأة وخبط بإيده على المكتب
ـ مستحيل
فتح الباب ونادى على مساعده
ـ عايز أعرف نادين فين دلوقتي حالا
المساعد رد
ـ في القصر يا فندم
ـ خليها تيجي مكتبي فورا
ـ حاضر
لكن قبل ما نكمل لازم تعرفوا إن ليلى مكنتش وصلت للحقيقة دي بالصدفة
الحكاية بدأت قبل الحريق بشهرين
وقتها ليلى لاحظت إن نادين بقت بتدخل القصر في أوقات غريبة وبتقعد مع آدم بالساعات بحجة إنها محتاجة مساعدته في مشروع خاص بيها
في الأول ليلى مكنتش بتشك في حاجة
نادين كانت صاحبتها من أيام الجامعة وكانت أقرب واحدة ليها بعد جوازها
كانت بتدخل بيتها من غير استئذان وعارفة تفاصيل حياتها كلها
لكن الغريب إن نادين بدأت تتغير
بقت بتسألها أسئلة ملهاش لازمة عن أملاك آدم وحساباته وعن تفاصيل التأمين على القصر
وفي مرة قالتلها وهي بتشرب القهوة
ـ إنتي عارفة يا ليلى إن آدم لو حصله حاجة إنتي هتبقي أغنى واحدة في البلد؟
ليلى ضحكت باستغراب
ـ هو إنتي بتقولي إيه؟ ربنا يديه الصحة
نادين ابتسمت ابتسامة غريبة
ـ أنا بس بقول إنك محظوظة
ليلى وقتها عدت الكلام لكنها بدأت تاخد بالها من تصرفات صاحبتها
وفي يوم كانت راجعة من المستشفى بعد ما عملت تحاليل روتينية بسبب تعب مستمر
الدكتور قالها إن فيه احتمال كبير تكون حامل وطلب منها تعيد التحليل بعد كام يوم
فرحت جدا وقررت تعمل مفاجأة لآدم
لكنها مكنتش تعرف إن المفاجأة دي هتكون بداية الكارثة
رجعت القصر وطلعت أوضة المكتب تدور على علبة هدية صغيرة كانت مخبياها
وفجأة سمعت صوت نادين في أوضة آدم
كانت بتتكلم في التليفون
ـ لازم نتصرف بسرعة قبل ما تخلف وتبقى ليها حجة أقوى تفضل في القص
