ليلى وقفت مكانها
قربت من الباب وسمعت نادين بتقول
ـ آدم مش بيحب المواجهات وهيصدق أي حاجة أقولهاله
بعدها سمعت صوت حركة فقامت رجعت بسرعة وخرجت من الممر من غير ما حد يشوفها
قلبها كان بيدق بعنف
مش مصدقة إن صاحبتها اللي كانت بتنام جنبها في نفس السرير أيام الجامعة ممكن تكون بتتكلم عنها بالطريقة دي
لكنها قررت متواجههاش غير لما تعرف الحقيقة
ابتدت تلاحظ إن نادين بتدخل مكتب آدم وهو مش موجود وإنها بتستخدم جهاز الكمبيوتر بتاعه
وفي يوم لقت ورقة مطبوعة فيها تفاصيل بوليصة التأمين على القصر وبعض الأوراق الخاصة بأملاك آدم
صورتها بالموبايل واحتفظت بيها
وبمساعدة فني كاميرات كانت تعرفه من شغل آدم قدرت تكتشف إن فيه كاميرا صغيرة في المكتب بتسجل الصوت والصورة وبتحتفظ بنسخة احتياطية من التسجيلات
ومن هنا بدأت تجمع كل حاجة
كانت فاكرة إن الموضوع مجرد محاولة من نادين إنها تستغلها أو تسرق فلوس من جوزها
لكن اللي اكتشفته كان أخطر بكتير
في التسجيلات اكتشفت إن نادين مش لوحدها
كان فيه راجل اسمه فؤاد الديب وهو شريك قديم لآدم في إحدى الشركات قبل ما يحصل بينهم خلاف كبير وينفصلوا عن بعض
فؤاد كان خسر مبالغ ضخمة بسبب قرارات آدم وفضل شايل منه سنين
لكن نادين كانت بتلعب على الناحيتين
كانت بتوهم آدم إنها بتحبه وبتخاف عليه وإنها مش لاقية حد تلجأ له غيره وفي نفس الوقت كانت بتتفق مع فؤاد على إنها تساعده يوصل لمعلومات سرية عن شركات آدم مقابل مبلغ كبير
ولما ليلى بدأت تشك في تصرفاتها قرروا يتخلصوا منها بطريقة تخلي آدم يبعد عنها تماما
كانت الخطة إن يحصل حريق في جناح النوم وتتقفل الأبواب الإلكترونية من بره بحيث ليلى متقدرش تخرج بسهولة
وكانوا متوقعين إن آدم هيخرج نادين الأول لأنها هتكون موجودة في نفس المكان وهي هتدعي إنها اتخضت ومش قادرة تتحرك
لكنهم مكنوش متوقعين إن ليلى تكون حامل
ولا إن فيه كاميرات احتفظت بكل حاجة
والأخطر إن نادين كانت عارفة إن آدم هيصدقها مهما حصل
نرجع لآدم اللي كان لسه قاعد قدام الكمبيوتر لما الباب اتفتح ودخلت نادين
كانت لابسة فستان هادي ووشها عليه ملامح التعب المعتادة
قالت بابتسامة
ـ خير يا حبيبي؟ طلبتني ليه؟
آدم ماردش
فضل باصصلها لحد ما ابتسامتها اختفت
قالت باستغراب
ـ مالك؟ فيه حاجة حصلت؟
لف الشاشة ناحيتها وشغل التسجيل اللي كانت بتتكلم فيه مع فؤاد
وشها اتغير في ثانية
حاولت تضحك وقالت
ـ إيه ده؟ إنت جبت الكلام ده منين؟
آدم قال بصوت هادي لكنه مرعب
ـ أنا اللي المفروض أسألك بتعملي إيه في بيتي وبتخططي لإيه مع فؤاد؟
نادين قربت من المكتب وقالت بسرعة
ـ اسمعني الأول التسجيل ده متفبرك وأنا أقدر أثبتلك
ـ تثبتي إيه؟ إنك كنتي بتتكلمي معاه عن ليلى؟ ولا إنك كنتي عايزة تتخلصي منها؟
بدأت تعيط
ـ آدم أنا كنت بحاول أحميك
ضحك بسخرية
ـ تحميني من مراتي؟
ـ إنت مش فاهم فؤاد كان بيهددني
ـ وموضوع الباب اللي اتقفل؟
سكتت
آدم وقف من مكانه وقال
ـ ردي عليا
نادين بدأت تتراجع خطوة
ـ أنا مكنتش أقصد إنها تموت
ـ يعني كنتي قاصدة تحبسيها جوه؟
صرخت وهي بتعيط
ـ أنا كنت عايزة أخوفها بس! مكنتش أعرف إن النار هتنتشر بالسرعة دي
آدم حس إن الأرض بتتهز من تحته
قال بصوت مخنوق
ـ وإنتي لما خرجتي من الأوضة ليه مقولتليش إنها لسه جوه؟
ـ أنا خفت
ـ خفتي من إيه؟ من إنك تخسري اللي كنتي بتخططي له؟
نادين سكتت
وبعدها حاولت تقرب منه
ـ آدم أرجوك افتكر كل حاجة عملتها معاك أنا كنت جنبك في أصعب أوقاتك
رجع خطوة لورا وقال
ـ إنتي عمرك ما كنتي جنبي إنتي كنتي بتستخدمي ثقتي فيكي علشان تدمري بيتي
ضغط على زر الاتصال الداخلي وطلب الأمن
بعد دقائق دخل اتنين من رجال الأمن
قال آدم
ـ محدش يسمح للست دي تخرج من القصر قبل ما الشرطة توصل
نادين صرخت
ـ إنت بتعمل إيه؟ إنت مش هتقدر تحبسني!
رد آدم
ـ أنا مش هحبسك أنا هسيب القانون ياخد مجراه
خرجت وهي بتصرخ وبتحاول تقنعه إنها بريئة لكنه مكنش بيسمع
أول ما الباب اتقفل رجع آدم للكمبيوتر وفتح آخر ملف على الكارت
كان تسجيل لليلى قبل سفرها بيوم واحد
ظهرت قاعدة على سرير المستشفى ووشها شاحب وإيديها على بطنها
