حضرتله الأكل وحطيته قدامه، وقعدنا نتعشى، وكان بيتكلم عن السفر والأماكن اللي راحها، وكل شوية يجيب سيرة شادية ويحكيلي كانت مبسوطة إزاي، وإزاي إنها أخيرًا خرجت من الحالة النفسية اللي كانت فيها. كنت بسمعه من غير ما أعلق، لحد ما قال فجأة:
\- على فكرة، شادية بتسلم عليكي، وبتقولك إنها نفسها تشوفك قريب. بصيتله وقلت:
\- وهي عايزة تشوفني ليه؟استغرب سؤالي وقال:
\- إيه السؤال الغريب ده؟ إنتوا ضراير، والمفروض تبقوا أصحاب، وأنا نفسي أشوفكم قريبين من بعض. حطيت المعلقة وقلت:
\- أنا مش داخلة الجوازة دي عشان أكسب صاحبة، أنا اتجوزتك عشان أبقى مراتك، مش عشان أبقى صاحبة مراتك. اتضايق من ردي وقال:
\- إنتِ ليه مصممة تعقدي الأمور؟ شادية ست طيبة، وهي أصلًا كانت موافقة على جوازي منك. قلتله:
\- موافقتها مش معناها إني ملزمة أحبها أو أكون صاحبتها، زي ما أنا مش مطالبة أبررلك كل مرة إني عايزة حقي كزوجة. قام من على السفرة وقال:
\- خلاص، أنا مش هتكلم في الموضوع ده دلوقتي. بعد العشا دخل أخد دش وخرج، وبعدها لقيته بيقولي إنه هينزل يجيب شوية حاجات من بره.
سألته:
\- هتتأخر؟قال وهو بيلبس ساعته:
\- مش عارف، ممكن أعدي على شادية وأطمن عليها، أصلها من ساعة ما رجعنا وهي بتكلمني وبتقولي إنى وحشتها. بصيتله وأنا مش مصدقة، لسه راجع من السفر معاها، ولسه ما قعدش معايا ساعتين، ومع ذلك مستعجل يروح لها تاني. قلتله:
\- براحتك. وقف وبصلي وقال:
\- إنتِ بتقوليها بجد ولا بتتريقي؟رديت بهدوء:
\- هو أنا لو قلتلك ما تروحش هتسمع كلامي؟ما ردش، وأخد مفاتيحه ونزل. فضلت قاعدة مكاني، وبعد شوية دخلت أوضة النوم وفتحت الدولاب، وبدأت أبص على هدومي وحاجاتي اللي لسه ما رتبتهاش.
كنت بحاول أتخيل شكل حياتي بعد كده، وهل هفضل كل يوم مستنية جوزي يقرر ييجي إمتى ويمشي إمتى؟بعد حوالي ساعتين رجع، وكان ماسك كيس هدايا، دخل وهو مبتسم وقال:
\- شوفي جبتلك إيه!فتحت الكيس ولقيت علبة برفان غالية، فبصيتله باستغراب. قال:
\- دي هدية ليكي عشان أصالحك، وبعدين أنا مش عايزك تزعلي مني. بصيتله وقلت:
\- وإنت فاكر إن كل حاجة ممكن تتحل بهدية؟قرب مني وقال:
\- طب أعملك إيه بس؟ أنا بحاول أرضيكي وأرضيها، ومش عايز أخسر حد فيكم. ساعتها سألته سؤال كنت بفكر فيه من يوم الفرح:
إنت لما جيت تتقدملي، كنت ناوي تعيش معايا فعلًا؟ ولا كنت محتاج تتجوز وخلاص، بشرط إن حياتك مع شادية تفضل زي ما هي من غير أي تغيير؟اختفت ابتسامته، وفضل ساكت شوية قبل ما يرد:
\- أنا اتجوزتك عشان بحبك وعايزك، لكن ده مش معناه إني هتخلى عن شادية أو أقصر في حقها. قلتله:\- وأنا عمري ما طلبت منك تتخلى عنها، بس إنت لازم تفهم إنك لما اتجوزتني بقيت مسؤول عن بيت تاني وست تانية، مش مجرد واحدة مستنياك لما تفضى من بيتك الأول.
ما ردش، واكتفى إنه يدخل يغير هدومه، وأنا فضلت واقفة مكاني، لأول مرة أحس إن المشكلة مش في شادية ولا في غيرتها، المشكلة في راجل عايز يحتفظ بكل امتيازات حياته القديمة، ويضيف عليها زوجة جديدة من غير ما يتحمل مسؤولية التغيير اللي حصل في حياته.
دخل أوضة النوم ونام، وأنا فضلت قاعدة في الصالة شوية، مش قادرة أصدق إن دي بقت حياتي بعد يومين بس من جوازي. كنت مستنية منه يحاول يصالحني، أو حتى يفتح معايا كلام ينسيني اللي حصل، لكنه كان بيتعامل بمنتهى الطبيعية، وكأن الأيام اللي فاتت دي كانت مجرد ظرف وعدّى.
دخلت الأوضة بعده، لقيته ماسك الموبايل وبيتكلم، وأول ما شافني قفل المكالمة. سألته:
\- شادية؟ابتسم وقال:
\- أيوه، كانت بتطمن عليا، وبتسألني وصلت بالسلامة ولا لأ. قلتله:
\- ربنا يخليكم لبعض. بصلي باستغراب، لكنه ما علقش، وبعد شوية نام، وأنا فضلت صاحية لحد الفجر.
تاني يوم الصبح صحيت على صوته وهو بيتكلم في التليفون، وكان بيقول:
\- خلاص يا حبيبتي، هاجيلك النهارده بعد العصر، ما تقلقيش، انتى كمان وحشتيني. خرجت من الأوضة لقيته بيجهز نفسه للخروج، فسألته:
\- إنت نازل؟قال وهو بيحط مفاتيحه في جيبه:
\- أيوه، عندي شوية مشاوير، وبعدها هعدي على شادية. سألته بهدوء:
\- وهتبات هناك؟بصلي وقال:
\- أيوه، النهارده دوري عندها، وإنتِ عارفة إني لازم أراعي العدل بينكم. ضحكت بمرارة وقلت:
\- العدل؟ هو إحنا بدأنا نقسم الأيام من أول أسبوع جواز؟اتنهد وقال:
\- أرجوكي ما ترجعيش للكلام ده، أنا من البداية كنت واضح معاكي، وإنتِ وافقتي على جوازي وأنا متجوز. قلتله:
\- أنا وافقت أتجوز راجل متجوز، لكن ما وافقتش أبقى ضيفة في حياته، ولا أعيش مستنية اليوم اللي يفضى فيه من مراته الأولى عشان يفتكرني.
إنتِ عايزاني أعمل إيه يعني؟ أسيبها لوحدها وأقعد معاكي طول الوقت؟ دي ست عاشت معايا سنين، ومش هقدر أكسر خاطرها. قلتله:
\- وأنا خاطري مش بيتكسر؟سكت لحظة، وبعدها قرب مني وقال:
\- بصي، أنا مش عايز أخسر شادية ولا عايز أخسرك، فخلينا نريح بعض، كل واحدة فيكم ليها أيامها، ومش عايز مشاكل ولا مقارنات.
خرج وسابني واقفة مكاني. وبعدها بساعتين، لقيت رسالة من شادية على الموبايل، كانت أول مرة تبعتلي بنفسها من يوم الجواز. فتحت الرسالة، ولقيتها بتقول:
«صباح الخير يا عروسة، عاملة إيه؟ معلش لو جوزك قصّر معاكي في الأيام اللي فاتت، أصل أنا كنت محتاجاه جنبي، وإن شاء الله تتعودي على نظام حياتنا، وتفهمي إن جوزك ليه بيت ومسؤوليات، وربنا يقدرني وأسعده زي ما كنت دايمًا».
فضلت باصة للرسالة، وقلبي بيدق من الغيظ. هي مش بتعتذر، ولا حتى بتتكلم معايا باعتباري زوجة زيها، دي بتفهمني من أول أسبوع إن حياتي معاه هتكون بالشروط اللي هي حطاها. قفلت الموبايل من غير ما أرد، لكن قبل ما أحطه لقيت رسالة تانية منها:
«على فكرة، جوزك قال لي إنك زعلانة من موضوع السفر، بس صدقيني هو بيحبك، وأنا مش عايزة أكون سبب في أي مشكلة بينكم».وقتها ابتسمت بسخرية وقلت لنفسي:
واضح إن جوازي مش بيني وبين جوزي وبس…
دي حياة كاملة أنا دخلتها، وكل واحد فيها مستني مني أتنازل عن حاجة عشان التاني يفضل مبسوط. عدى شهر كامل على جوازي، شهر كنت فيه عايشة كأني مش متجوزة. جوزي كان بييجي يقضي معايا يوم أو يومين، وباقي الأسبوع عند شادية، وحتى لما كان بييجي كنت بتجنب إني أقعد معاه لوحدنا أو أسمحله يقرب مني.
في البداية حاول كذا مرة يصالحني ويقرب مني، لكني كنت برفض، وكنت بقوله إن مشاعري ناحيته اتأثرت من اللي عمله معايا في أول أيام جوازنا، وإنه لازم يفهم إن الجواز مش مجرد حقوق جسدية. كان بيتضايق، لكنه مع الوقت بطل يحاول، وبقى يقضي معظم وقته في بيته الأول.
وفي يوم صحيت من النوم على صوت إشعار رسالة من موبايله اللي كان محطوط على الكومودينو جنبي. مددت إيدي أقفله، لكن عيني وقعت على اسم شادية، وظهر جزء من الرسالة على الشاشة.«خلص بقى كل ده، هو إنت مش قادر تقرب منها عشان تحمل وتجبلك عيل؟
هتفضل مأجل الموضوع لحد إمتى؟»
اتجمدت مكاني، وفضلت باصة للشاشة مش مستوعبة اللي أنا قريته. يعني هي كمان عارفة إن جوزي مش بيقرب مني؟ وبتتكلم معاه في علاقتنا الخاصة؟ والأغرب إنها بتطالبه إنه يقرب مني عشان أحمل وأجيب له طفل!
مسكت الموبايل وفتحته، لكن قبل ما أقرأ باقي الرسالة سمعت صوته ورايا:
\- إنتِ بتعملي إيه في تليفوني؟اتخضيت وبصيتله، وقلت:
\- شادية باعتالك رسالة. اتغيرت ملامحه ومد إيده أخد الموبايل بسرعة وقال:
\- وإيه يعني؟ دي مراتي وبتكلمني. قلتله وأنا بحاول أسيطر على أعصابي:
\- وبتتكلم معاها عن علاقتنا الخاصة كمان؟اتنهد بضيق وقال:
\- إنتِ قريتي الرسالة؟\- أيوه، وقريت كفاية عشان أفهم إن حياتي معاك بقت موضوع للنقاش بينك وبينها. قال بعصبية:
\- هي بس بتسألني إمتى هنبدأ نفكر في الخلفة، وإيه المشكلة في كده؟ أنا عايز أخلف منك، وده حقي.
بصيتله بصدمة وقلت:
\- حقك؟ طب وفين حقي أنا؟ إنت فاكر إن الحمل والخلفة هيحلوا كل المشاكل اللي بينا؟ إنت حتى ما ادتنيش فرصة أحس إني مراتك، وعايزني دلوقتي أحمل منك عشان ترضي هي؟قال:
\- شادية مش بتفرض عليكي حاجة، هي بس بتتكلم من باب إنها عايزة تشوفني مبسوط.
ضحكت بمرارة وقلت:
\- لا، هي عايزة تشوفك أب، وعايزة تطمن إن جوازك مني هيجيب نتيجة، لكن محدش فيكم فكر أنا عايزة إيه!سكت شوية، وبعدها قال:
\- أنا مش فاهم إنتِ عايزة توصلي لإيه، هو أنا اتجوزتك عشان أعيش معاكي من غير عيال؟
رديت عليه:
\- وإنت اتجوزتني عشان تخلف مني بس؟ أنا مش ماكينة خلفة، أنا مراتك، ومن حقي أحس إنك بتحبني وعايزني قبل ما تفكر تجيب مني طفل. قام من السر,,ـــــير وهو متضايق، وقال:
\- أنا مش هفضل طول عمري أستنى لحد ما حضرتك ترضي عن جوازك.
أنا راجل وعندي احتياجات، ولو إنتِ مش عايزة تعيشي معايا حياة طبيعية يبقى لازم نراجع حساباتنا. بصيتله وقلت:
\- راجع حساباتك براحتك، بس متحاولش تحملني مسؤولية خراب جوازة إنت من أول يوم قررت تحسسني فيها إني الزوجة اللي ملهاش أولوية.
خرج من الأوضة وهو ماسك موبايله، وبعد دقائق سمعت صوته بيتكلم مع شادية، وكان بيقولها:
\- متقلقيش، أنا هتصرف معاها، بس بطلي تفتحي الموضوع ده كل شوية. وقتها عرفت إن الموضوع أكبر من مجرد رسالة
