روايات وقصص

أنا موافقة على الطلاق

خرجت والدته وقفلت الباب وراها بعصبية، وساعتها البيت كله سكت، الهدوء كان غريب. تقيل، لأن لأول مرة محدش بيهرب من الحقيقة._____________________________________فضل إلياس واقف مكانه شوية، وبعدين بصلي وقال:
ـ ممكن نتكلم؟ضحكت وقتها:
ـ بعد خمس سنين؟

نزل عينه للأرض. ـ أيوة بعد خمس سنين. دخلنا الصالة، وقعد كل واحد فينا في ناحية، المسافة اللي بين الكنبتين كانت صغيرة جدًا، بس حسيتها أكبر من أي مسافة عشناها. سكت شوية، وبعدين قال:
ـ أنا آسف.

نزلت عيني، لأن الجملة اللي كنت مستنياها سنين طويلة، لما سمعتها محستش بالراحة اللي كنت متخيلاها، يمكن عشان الوجع كان أقدم من الاعتذار. قال بصوت هادي:
ـ وعارف إن كلمة آسف متأخرة. ـ أيوة. ـ وعارف إنها مش هتمحي حاجة. ـ أيوة. ـ وعارف إنك مش مطالبة تسامحيني دلوقتي.

سكت، وأنا لأول مرة لقيته بيتكلم من غير ما يدور على مبرر، مقالش أصل الشغل، مقالش أصل الضغوط، مقالش أصل مكنتش أقصد. بس قال:
ـ أنا كنت فاكر إني زوج كويس. رفعت عيني له، فكمل بابتسامة حزينة:

ـ يمكن كنت شايف نفسي أكتر ما كنت شايفك. بلعت ريقي، لأن الجملة دي كانت الحقيقة كلها. ـ فاكرة لما تعبتي في السنة التانية من جوازنا؟اتصدمت. ـ فاكر؟ـ فاكر أكتر ما تتخيلي. فاكر إنك كلمتيني وقولتِلي تعالى بدري، وفاكر إني مجتش.

د، وفاكر إني لما رجعت لقيتك نايمة من التعب، وفاكر إني حضنتك واعتذرت. سكت لحظة. ـ ووقتها افتكرت إن الموضوع انتهى، لكن واضح إنه منتهيش. نزلت دمعة مني، لأنه لأول مرة فهم، فهم إن الاعتذار مش دايمًا بيعالج الأثر.______________________________________

قعدنا ساعات بنتكلم، ساعات فعلًا، أول مرة من سنين، قولتله عن مواقف هو نسيها وأنا لسه فاكراها. قولتله عن كل مرة كنت محتاجة زوج يدافع عني، عن كل مرة كنت برجع فيها من عند أهله مكسورة، عن كل مرة كنت أعيط فيها وهو يقولي:

“كبري دماغك.”
لحد ما كبرت دماغي فعلًا عن حاجات كتير، يمكن أكتر مما ينبغي. وهو كان ساكت، ساكت وبيسمع، بس وكان ده كفاية بالنسبة ليا وقتها._______________________________________
الأيام اللي بعدها مكانتش سهلة، ودي أهم حاجة لأن الحياة مش رواية، مفيش مشهد اعتذار واحد بيرجع كل حاجة زي الأول.

صحينا اليوم اللي بعده ولسه في وجع، ولسه في زعل، ولسه في خوف، بس كان في حاجة مختلفة. إلياس بطل يتعامل مع اللي حصل كـ خناقة وعدت. بطل يتصرف كأن بكرة كل حاجة هترجع طبيعي، لأول مرة حسيت إنه شايف حجم المشكلة.

وفي يوم رجعت من الحضانة اللي بشتغل فيها ولقيته في المطبخ. بيحاول يعمل أكل، كارثة طبعًا بس بيحاول. ضحكت غصب عني، فبصلي وقال:
ـ والله الوصفة كانت أسهل في الفيديو. ولأول مرة من فترة طويلة، ضحكت من قلبي.

مش عشان الأكل أد ما هو عشان المحاولة._______________________________________
ومرة تانية كنا عند أهله، وقالت والدته كلمة ضايقتني، الكلمة نفسها اللي كان زمان يعديها. لكن المرة دي قال بهدوء:
ـ يا أمي بلاش الكلام ده. بصتله باستغراب، وأنا بصيتله أكتر، مش لأن الموقف كبير بس لأن الموقف الصغير ده كان المفروض يحصل من سنين.

عدى شهر، وبعدين شهر تاني. ومكنتش سامحته بالكامل، ودي الحقيقة كان لسه في حاجات بتوجعني، وكان لسه في أيام بصحى فيها وأسأل نفسي إذا كان ينفع أصلًا نرجع زي الأول. لكن مع الوقت اكتشفت إني مش عايزة أرجع زي الأول، لأن الأول هو اللي وصلنا لهنا.

أنا عايزة حاجة جديدة، علاقة فيها كلام أكتر، وفيها اهتمام أكتر. وفيها خوف علينا أكتر من الخوف على شكل البيت قدام الناس. وفي ليلة بعدها بحوالي شهرين، كنت قاعدة في البلكونة. الجو كان هادي، والشارع شبه فاضي.

طلع إلياس وقعد جنبي، زي ما بقى يعمل كتير الفترة الأخيرة. من غير ما يتكلم، من غير ما يحاول يصلح الدنيا في خمس دقايق. قعدنا ساكتين شوية، وبعدين قال:
ـ لسه زعلانة مني؟بصيتله، وقولت بصراحة:
ـ أيوة. ضحك ضحكة صغيرة. ـ طب كويس. عقدت حاجبي. ـ كويس؟

ـ أيوة. ـ ليه؟بص قدامه وقال:
ـ عشان طول ما أنتِ زعلانة يبقى لسه فارق معاكِ وأنا هفضل أحاول عشانك. سكت لحظة، وبعدين كمل:
ـ أنا بس مش عايزك تبقي لوحدك تاني. والله كانت جملة بسيطة، بس يمكن كانت أكتر جملة كنت محتاجة أسمعها.

مش “بحبك”، ولا “هجيبلك الدنيا”، ولا أي كلام كبير. بس:”مش عايزك تبقي لوحدك.”
لأن الوحدة هي أكتر حاجة وجعتني أصلًا، بصيت قدامي. وحسيت لأول مرة من سنين إن الحمل اللي فوق قلبي أخف شوية. مش راح، بس أخف، إحنا مرجعناش زي زمان ومكنتش واثقة إننا هنرجع بس لأول مرة من سنين محستش إني شايلة الجواز لوحدي.

ولأول مرة من سنين، حسيت إن إلياس واقف في نفس الصف بتاعي، مش الصف اللي قدامي، ومش الصف اللي ضدي. يمكن عشان الحب عمره ما كان مشكلتنا، المشكلة كانت إننا نسينا نحافظ عليه، ولأول مرة من سنين، حسيت إننا بطلنا نحارب بعض، وبدأنا نحارب عشان بعض.

3 من 3التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى