لكن تيتا بصت له بتردد، لأنها كانت عارفة كويس إنه مش عايزها تعيش معاه، وإن كل اللي كان عايزه منها هو الفلوس.
ماما استغلت سكوته وقالت:
ـ القرار قرارك يا حماتي، بس من النهارده كل واحد مسؤول عن نفسه، وأنا مش هحرم بناتي من حقهم عشان أرضي حد.
وفي اللحظة دي، أختي خرجت من أوضتها وهي ماسكة شهادة نجاحها، وقالت بصوت مكسور:
ـ يعني أنا هكمل ثانوي عام يا ماما؟
ماما قامت حضنتها وقالت:
ـ هتكملي يا حبيبتي، وهتدخلي الكلية اللي بتحلمي بيها كمان، طول ما أنا فيا نفس مش هسمح لحد يطفي حلمك.
ولأول مرة من سنتين، حسيت إن البيت رجع لأصحابه، وإن ماما اللي كانت بتسكت عشان خاطرنا قررت أخيرًا تتكلم عشان خاطرنا.
بعد الخناقة دي، تيتا فضلت يومين متضايقة ومش بتكلم ماما، وكانت كل شوية تدخل أوضتها وتقفل على نفسها، لحد ما في اليوم التالت قررت تاخد شنطتها وتروح مع عمّي.
قبل ما تمشي، وقفت قدام ماما وقالت لها: ـ أنا رايحة لابني، واللي مش عايزني في بيته أنا مش هفرض نفسي عليه.
ماما ردت بهدوء: ـ ربنا يريح قلبك يا حماتي، وبيتك مفتوح ليكي في أي وقت، بس المهم كل واحد يعرف حقوقه وواجباته.
تيتا أخدت شنطتها ومشيت، وأنا كنت فاكرة إن كده المشكلة انتهت، لكن اللي حصل بعدها كان مختلف تمامًا.
بعد حوالي أسبوع، اتصلت تيتا بماما وهي بتعيط وبتشتكي من معاملة عمّي ومراته، وقالت إنهم مش مقدرين سنها، وإن مرات عمّي مش بتعملها الأكل اللي بتحبه، وإنها حاسة إنها تقيلة عليهم.
ماما سمعتها للآخر، وما حاولتش تدخل في مشاكلهم، لكن تيتا فضلت تشتكي وتقول: ـ أنا مش عارفة ابني اتغير عليا ليه، ده أنا اديته كل اللي معايا، وفي الآخر مش لاقية راحتي عنده.
ماما قالت لها: ـ يمكن دلوقتي حسيتي إن اللي كنتِ بتعمليه معايا مش سهل، وإن اللي بيصرف على البيت من حقه يكون ليه كلمة فيه.
تيتا اتعصبت وقالت: ـ يعني إنتِ كمان هتعايريني؟ أنا أم جوزك الله يرحمه!
ماما ردت: ـ محدش بيعايرك يا حماتي، بس أنا مش هقبل أرجع لنفس الوضع القديم.
بعد يومين، تيتا رجعت البيت تاني، دخلت وهي شايلة شنطتها، وكأنها راجعة من مشوار عادي، وقالت لماما:
ـ خلاص يا بنتي، أنا رجعت، الواحد ملوش غير بيته في الآخر.
ماما كانت واقفة في المطبخ، بصتلها وقالت: ـ نورتي يا حماتي، بس قبل ما تستقري لازم نتفق على شوية حاجات.
تيتا استغربت: ـ نتفق على إيه؟ هو أنا غريبة عشان نتفق؟
ماما قالت: ـ لأ، إنتِ مش غريبة، لكن أنا كمان مش هقدر أشيل مسؤولية البيت لوحدي، خصوصًا إن عندي بنتين في مراحل تعليم مختلفة، ومصاريفهم بتزيد.
تيتا ردت بضيق: ـ يعني إنتِ عايزاني أدفعلك فلوس عشان أقعد في بيت ابني؟
ماما قالت بحزم: ـ أنا مش بطلب منك إيجار، ولا بطلب منك حاجة مش من حقك، أنا بطلب إنك تشاركي في مصاريف أكلك وشربك واحتياجاتك، زي ما كل واحد في البيت ليه مسؤولياته. معاشك مش قليل، وإنتِ طول السنتين اللي فاتوا كنتِ بتديه كله لابنك، وأنا مش ملزومة أصرف على أكلك وشربك من معاش أبو عيالي، وفي نفس الوقت إنتِ بتدي فلوسك لابنك.
تيتا رفعت صوتها: ـ يعني هتحاسبيني على اللقمة اللي باكلها؟
ماما ردت: ـ لأ، أنا هحافظ على حق بناتي. الأولوية لولادي يا حماتي، وفلوس أبوهم المفروض تتصرف عليهم وعلى تعليمهم وعلاجهم، مش على مصاريف حد تاني. ولو إنتِ عايزة تعيشي معانا، يبقى تشاركي في البيت، ومحدش فينا يبقى شايل التاني لوحده.
تيتا سكتت شوية، وبعدها قالت: ـ طب وفلوسي أعمل بيها إيه؟ أديها لابني ولا أصرفها على نفسي؟
ماما قالت: ـ دي فلوسك وإنتِ حرة فيها، لكن طالما بتختاري تديها لابنك، يبقى هو كمان يتحمل مسؤوليتك، مش أنا اللي أشيل النتيجة.
أنا كنت واقفة بسمع الحوار، وحسيت إن ماما اتغيرت فعلًا، مش لأنها بقت قاسية، لكن لأنها أخيرًا فهمت إن السكوت ساعات بيخلي الناس تفتكر إن حقوقنا مباحة.
ومن يومها بدأت تيتا تحسب كل حاجة قبل ما تطلبها، وبقت مضطرة تتعامل مع ماما على أساس إن البيت مش تحت سيطرتها زي الأول، وإن فيه أم قررت تحمي حق بناتها مهما حصل.
الأيام اللي بعدها ما كانتش سهلة، تيتا كانت متضايقة من الوضع الجديد، وكل شوية تحاول ترجع تفرض سيطرتها على البيت زي زمان، لكن ماما كانت ثابتة على موقفها.
في يوم، أختي رجعت من المدرسة مبسوطة، وقالت لماما إن المدرسة أعلنت عن رحلة للمتفوقين، وإنها نفسها تشترك فيها، لكن تيتا أول ما سمعت قالت:
ـ رحلة إيه بس؟ هو إحنا ناقصين مصاريف؟ البنت لسه داخلة ثانوي وعايزة تصرفوا عليها في رحلات!
ماما بصتلها وقالت: ـ دي فلوس بنتي، وأنا اللي هقرر أصرفها في إيه، ومش كل حاجة هتكون محل نقاش.
تيتا اتضايقت وقالت: ـ إنتِ اتغيرتي أوي يا بنتي، زمان ما كنتيش بتردي عليا كده.
ماما ردت: ـ زمان كنت بسكت عشان خاطر جوزي الله يرحمه، وعشان بناتي ما يحسوش إن فيه مشاكل في البيت، لكن سكوتي خلاكي تفتكري إن من حقك تتحكمي في حياتنا وتتصرفي في فلوسنا، وده مش هيحصل تاني.
بعدها بكام يوم، عمّي جه يزورنا، وكان واضح إنه متضايق من إن ماما بطلت تبعتله فلوس، وقعد يتكلم مع تيتا بعيد عنها، لكن صوتهم وصل لنا.
ـ إنتِ بتعملي إيه يا أمي؟ مش اتفقنا إنك تفضلي عندهم عشان معاش أخويا يفضل تحت إيدك؟
تيتا ردت: ـ أعمل إيه؟ مرات أخوك حطتلي حدود ومبقتش عارفة أتصرف.
ـ طب وإنتِ معاشك فين؟ مش كنتِ بتديهولي كله؟
ـ ما هو مفيش حاجة فاضلة، وبقيت مضطرة أشارك في مصاريف البيت.
عمّي اتعصب وقال: ـ يعني إنتِ هتصرفي فلوسك عليهم وتسيبيني أنا؟
ساعتها ماما دخلت عليهم وقالت: ـ هو إنت لسه شايف إن الفلوس دي المفروض تروحلك؟ أمك عندها معاش، ومن حقها تعيش بيه وتوفر لنفسها احتياجاتها، مش تفضل تصرف عليك وهي في السن ده وانا مش هصرف على حد لو عايز تاخد معاشها يبقى خدها تعيش معاك واصرف عليها من معاشا
عمّي بص لها بضيق وقال: ـ إنتِ مالك بيا وبأمي؟
ماما ردت: ـ ماليش بيك، لكن ماليش استعداد أتحمل مسؤولية أمك وأنت تاخد فلوسها، وده آخر كلام عندي.
عمّي مشي وهو متضايق، ومن بعدها تيتا بدأت تفكر في نفسها لأول مرة، وبقت تحتفظ بجزء من معاشها لمصاريفها بدل ما تديه كله لابنها.
ومع الوقت، أختي خلصت السنة الأولى في الثانوية بتفوق، ودخلت السنة التانية وهي من أوائل المدرسة، وماما كانت فرحانة بيها بشكل مش طبيعي، خصوصًا لما بدأت تشوف حلم بنتها بيقرب خطوة بخطوة.
أما أنا، فكنت بشوف ماما وهي بتتعب وتشتغل وتدبر مصاريف البيت، لكن عمرها ما رجعت تشتكي أو تحسسنا إننا عبء عليها.
وفي يوم، تيتا كانت قاعدة معاها وقالت: ـ أنا عارفة إنك اتضايقتي مني، ويمكن أنا غلطت لما كنت باخد فلوس البيت وأديها لابني، بس إنتِ برضه كان ممكن تستحمليني.
ماما بصتلها وقالت: ـ أنا استحملتك سنتين يا حماتي، ومطلبتش منك غير إنك تراعي إن عندي بنات محتاجين يعيشوا ويتعلموا، أنا مش ضد إنك تساعدي ابنك، لكن مش على حساب عيالك التانيين، وخصوصًا إن أبوهم مش موجود يدافع عن حقوقهم.
تيتا ما ردتش، ويمكن لأول مرة استوعبت إن وفاة ابنها مش معناها إن بيته وفلوسه بقوا حق مفتوح لأي حد.
وبعد فترة، أختي حققت حلمها ودخلت كلية الطب، واليوم اللي ظهرت فيه النتيجة ماما فضلت تعيط من الفرحة، وحضنتها وهي بتقول:
ـ أبوكي كان نفسه يشوفك دكتورة، وأنا وعدته إني هعمل كل اللي أقدر عليه عشان حلمك يتحقق.
