امانى السيد
بابا توفى وبعد وفاته ، جدتي من ناحية بابا جت تعيش معانا. الأول افتكرنا انها جايه زياره او عشان تخلى بالها مننا لكن اكتشفنا أنها جايه تعيش معانا على طول وشقتها ادتها لعمى الصغير انه يتجوز فيها وكأن وفاة أبويا كانت فرصة إنها تفضّي الشقة لابنها.
المشكلة إن وجودها معانا ماكانش بالبساطة اللي تخيلناها. كانت بتاخد من فلوس البيت وتدي لابنها بحجه انه محتاج يوضب شقته وان أخوه لو عايش كان هيساعده ده غير إنها كانت بتديه معاشها كله، وفي المقابل عايشة معانا من معاش أبويا.
الوضع استمر سنتين، خلال السنتين دول كانت هى اللى ممشيه البيت وماما بتحاول تستحمل عشان خاطرنا وكان دايما تقولنا محدش ليه جميله عندى أنا عايشه فى نصيبى فى بيت ابنى هو خيره عليكم وهو حى وهو ميت
ماما كانت بتسكت ولما اجى اتكلم تقولى عيب وده خلى تيتا تتمادى اكتر اختى نجحت فى الاعداديه بمجموع كبير وقررت تدخل ثانوى عام علمى لانها نفسها تطلع دكتوره
لكن تيتا عملت مشكله كبيره جداً وقالت استحالة ده يحصل الثانويه العامه عايزه مصاريف كتيره هتجيبى منين وانتى يا دوب المعاش بيكفى أكل وشرب
كان نفسي ارد عليها واقولها إن معاش بابا كبير لكن مصاريفك هى اللى كبيره وخصوصا انك بتدى مرتبك لعمى لكن ماما مانعتنى وقالتلها
ـ يا حماتى لو سمحت انا لو هنزل الشارع وهشحت هعمل كده عشان بنتى تتعلم احسن علام وتدخل الكليه اللى بتحبها
لكن تيتا ماسكتتش وكان بالنسبالها دخول اختى الثانويه العامه تحدى مننا ليها واتصلت بعمى جابته عشان يتصرف معانا ويمنع دخول اختى الثانويه العامه لكن اللى حصل بعد كده
عمّي وصل البيت بعد أقل من ساعة من مكالمة تيتا، ودخل وهو باين عليه إنه جاي مجهز كلامه ومتفق معاها على اللي هيقوله.
قعد في الصالة، وتيتا طبعًا ما ضيعتش وقت، راحت جابتله الشاي وقعدت جنبه، وبعدها بص لماما وقال:
ـ أنا سمعت إن فيه مشكلة بسبب موضوع ثانوي عام، وإنتوا مكبرين الموضوع ليه؟ البنت تدخل أي مدرسة تانية وخلاص، مش لازم علمي ولا ثانوي عام.
ماما كانت قاعدة ساكتة، لكن واضح من ملامحها إنها متضايقة، وهو كمل كلامه:
ـ وبعدين يا مرات أخويا، إنتِ لازم تفكري بعقل شوية، الثانوية العامة مصاريفها كتير، وبعدها هتدخل كلية، والكليات دلوقتي محتاجة فلوس، يعني مش هتخلص عند المدرسة. وإنتِ عندك بنت تانية لسه هتكبر وتحتاج مصاريف، غير إنك إنتِ نفسك محتاجة علاج، وكل ما سنك يكبر مصاريفك هتزيد، يبقى ليه نحمل نفسنا فوق طاقتنا؟ لا احلل قرائتها غير على صفحه قصص وروايات أمانى سيد تيتا هزت راسها بتأييد وقالت:ـ أهو ده الكلام اللي بقوله من بدري، بس هي مش عايزة تسمع، فاكرة إن الفلوس بتطلع من الحيطان.
كنت واقفة جنب أوضة أختي، وسمعت الكلام كله، وكنت خلاص هخرج أرد عليه، لكن ماما سبقتني المرة دي.
بصت له وقالت بهدوء غريب:
ـ إنت كلامك صح يا أخو جوزي، فعلًا المصاريف كتير، والبنت محتاجة تعليم، وأنا محتاجة علاج، وكل واحد فينا عنده مسؤولياته.
عمّي ابتسم، وافتكر إنها أخيرًا اقتنعت، لكن ماما كملت:
ـ بس فيه حاجة إنت نسيتها، إنت راجل كبير، وعندك شغل وبيت، ورغم كده أمك لسه بتصرف عليك، وبتاخد معاشها كله وتديهولك، وأنا مش فاهمة إزاي بتتكلم عن المصاريف وإنت أولى واحد عارف إن أمك محتاجة فلوسها لنفسها.
اتغيرت ملامحه وقال بضيق:
ـ إنتِ بتدخلي موضوع أمي في الكلام ليه؟
ماما ردت عليه من غير ما تتراجع:
ـ عشان الموضوع بقى يخصني أنا كمان. أمك بقالها سنتين عايشة في بيتي، بتاكل وتشرب من فلوس بيتي، وبتاخد من معاش أبو البنات وتديهولك، وفوق ده كله أنا عمري ما اتكلمت ولا طلبت منك تساعد في مصاريف البيت، مراعاة لظروفك، لكن من النهارده الوضع ده انتهى.
تيتا قامت من مكانها وقالت بعصبية:
ـ يعني إيه انتهى؟ هو إنتِ بتمنّي عليا بأكل وشرب؟ ده بيت ابني وأنا قاعدة في خيره!
ماما بصتلها وقالت:
ـ وأنا عمري ما منعتك من حاجة يا حماتي، ولا عمري قلت إنك غريبة عن البيت، لكن أنا كمان عندي بنات ومسؤولة عنهم، ومش هقبل إن بنتي تتحرم من تعليمها عشان ابنك ياخد معاش أمه، ولا هقبل إني أستلف وأستدين عشان أوفر مصاريف علاج وبيت، وفيه فلوس المفروض إنها موجودة معانا.
عمّي اتنحنح وقال:
ـ يعني إنتِ عايزاني أصرف على أمي؟
ماما ردت فورًا:
ـ أيوه، طالما إنت شايف إن أمك محتاجة، يبقى إنت أولى بيها، بدل ما تاخد معاشها وتسيبها تعيش على معاش أخوك. واللي جاي ده واضح، أنا مش هجيب حاجة من فلوسي ولا من معاش أبو البنات عشان أصرف على حد تاني، لأن زي ما إنت قولت بنتي محتاجة مصاريف، وأنا أولى ببناتي.
سكتت الصالة كلها، وعمّي بص لأمه مستني منها تتكلم، لكنها كانت متفاجئة إن ماما لأول مرة تواجهها بالشكل ده.
أما أنا فكنت واقفة مش مصدقة اللي بسمعه، دي أول مرة أشوف ماما بتحط حدود بالشكل ده، وأول مرة تحسّسنا إنها مش هتسمح لحد ياخد حقنا بالساهل.
عمّي قام من مكانه وقال بغضب:
ـ واضح إن القعدة هنا مبقتش تنفع، وإنتِ يا أمي تعالي معايا.
