ينب قالت بتردد
ـ بس أنا عمري ما اشتغلت قبل كده
آدم رد
ـ محدش بيتولد عارف كل حاجة إحنا هنتعلم سوا
وبالفعل بدأت زينب تتدرب وتتعلم إدارة المشروع وتتعامل مع المدرسين والمتدربين
وفي أول يوم ليها في المركز وقفت قدام مجموعة من الشباب المكفوفين وقالت
ـ أنا مش جاية أقولكم إن الحياة سهلة ولا إن الناس كلها هتعاملكم كويس أنا جاية أقولكم إنكم تستحقوا فرصة وإن فقدان البصر مش معناه فقدان الأحلام
واحد من الشباب سألها
ـ طب لو أهلنا نفسهم مش مؤمنين بينا نعمل إيه
زينب سكتت لحظة وقالت
ـ متخلوش حكم حد عليكم يبقى هو الحقيقة بتاعتكم إنتوا أدرى بنفسكم وبقدراتكم ومش لازم تستنوا موافقة حد علشان تبدأوا
الكلام أثر في الموجودين وآدم اللي كان واقف بعيد كان فخور بيها بشكل عمره ما حسه قبل كده
بعد فترة انتقلوا لبيت جديد قريب من المركز
لكن زينب طلبت منه يحتفظوا بالعشة القديمة
آدم استغرب وقالها
ـ إنتي عايزة نحتفظ بالمكان ده ليه
قالتله
ـ علشان هنا عرفت يعني إيه أمان وهنا أول مرة حد يسألني أنا بحب إيه ونفسي في إيه وهنا بدأت أحس إني إنسانة مش عبء على حد
آدم ابتسم وقال
ـ يبقى هنخليه مكان جميل ونرجعله كل فترة
روايات_مشيره_محمد
مرت سنة كاملة واتغيرت حياة الاتنين
آدم بقى ناجح في شغله من جديد وزينب بقت ليها مكانة كبيرة في المركز وبقت معروفة بين الناس بسبب مجهودها
وفي يوم رجعت زينب البيت وهي مبسوطة بشكل غير طبيعي
آدم سألها
ـ مالك يا ست البنات شكلك مخبية مفاجأة
ضحكت وقالت
ـ عندي خبر عايزة أقولهولك
ـ خير
مدت إيده وحطتها على بطنها وقالت بصوت مليان فرحة
ـ إحنا هنكون أب وأم
آدم فضل ساكت لحظة كأنه مش مستوعب وبعدها حضنها بفرحة كبيرة
ـ بجد يا زينب
ـ أيوه يا آدم
قعد جنبها وفضل يدعي ربنا إن الطفل ييجي للدنيا بصحة وعافية
لكن زينب كانت عندها أمنية تانية
قالتله
ـ أنا نفسي ابننا لما يكبر يعرف إن أمه كانت كفيفة وإن ده عمره ما منعها تكون قوية وتنجح وتبني حياة
آدم باس راسها وقال
ـ وهيعرف إن أبوه اتعلم منها معنى القوة
بعد شهور رزقهم ربنا ببنت جميلة وسموها مريم
آدم كان شايلها بين إيديه ومش عارف يبعد عينه عنها
وزينب كانت بتلمس وش بنتها الصغير وصوابعها بحنان وبتضحك وهي بتقول
ـ دي أكيد واخدة منك العند
آدم ضحك وقال
ـ لأ دي واخدة منك القوة
كبرت مريم وسط أب وأم بيحبوها وبيحترموها وكان آدم دايما يعلمها إن الاختلاف مش عيب وإن الإنسان ميتقاسش بشكله ولا بقدرته على الرؤية
أما زينب فكانت بتقضي وقت كبير في المركز وبتساعد الأطفال اللي اتولدوا فاقدين البصر وبتعلمهم يعتمدوا على نفسهم
وفي يوم دخلت المركز لقت بنت صغيرة قاعدة لوحدها وبتعيط
قربت منها وسألتها
ـ مالك يا حبيبتي
البنت قالت
ـ بابا بيقول إني مش هعرف أعمل حاجة في حياتي علشان أنا مش بشوف
زينب قعدت جنبها ومسحت دموعها وقالت
ـ تعرفي أنا كمان كنت كفيفة وبابا كان فاكر إني مش هقدر أعيش من غيره وكان بيخجل مني
البنت رفعت وشها ناحيتها وقالت
ـ وبقيتي إيه دلوقتي
زينب ابتسمت وقالت
ـ بقيت إنسانة عندها شغل وبيت وجوز بيحبها وبنت بتفرح بيها وبساعد ناس كتير يعرفوا إنهم يقدروا يعيشوا ويحققوا أحلامهم
البنت سألتها
ـ يعني أنا كمان ممكن أبقى زيك
زينب مسكت إيديها وقالت
ـ ممكن تبقي أحسن مني كمان بس أهم حاجة متصدقيش أي حد يقولك إنك أقل من غيرك
وفي نفس اللحظة دخل آدم المركز وكان معاه مريم
البنت الصغيرة سمعت صوته فسألت زينب
ـ ده مين
زينب ابتسمت وقالت
ـ ده آدم جوزي وأكتر إنسان علمني إن الحب الحقيقي مش بيبص للشكل ولا للفلوس
آدم قرب منهم وقال
ـ بتعلميها إيه يا زينب
ردت عليه
ـ بقولها إن الإنسان مش محتاج يشوف الدنيا بعينيه علشان يعرف قيمتها
آدم ابتسم وقال
ـ وأهو أنا اتعلمت من واحدة كانت فاكرة إن الدنيا كلها ظلم إن لسه فيها ناس تستاهل نعيش علشانهم
بعدها بسنين زينب رجعت تزور بيت أبوها وكانت مريم معاها
أبوها كان كبر في السن وبقى ضعيف وعايش لوحده بعد ما أختيها سافروا واتجوزوا
لما سمع صوتها قال
ـ زينب إنتي جيتي
قربت منه وقالت
ـ أيوه يا بابا وجبتلك مريم
