قلت لها:
— غريبة، ده جوزي مشغول بالشغل طول اليوم ومش بيبطل كلام عن ضغط الشغل!
سكتت.
ولأول مرة حسيت إنها مش عارفة ترد.
قفلت معاها بعد شوية، وأنا متأكدة إن الخوف بدأ يدخل قلبها.
عدت أيام قليلة، وبدأ شريف يحس إن فيه حاجة مش طبيعية.
بقى يسألني عن مشاويري، وعن سبب خروجي بدري، وعن مكالماتي.
وفي يوم، وأنا قاعدة على السفرة، قال لي:
— هدير، إنتِ متغيرة معايا اليومين دول.
رفعت عيني من الطبق.
— متغيرة إزاي؟
— مش عارف، حاسس إنك مشغولة عني، ومش بتتكلمي زي الأول.
قلت بهدوء:
— يمكن عشان أنا اللي شايلة مسؤولية البيت من فترة طويلة، ومحتاجة أرتاح شوية.
قال بنبرة فيها ضيق:
— يعني لسه هتفضلي تعايريني إني كنت قاعد من غير شغل؟
حطيت الشوكة وقلت:
— أنا ماعيرتكش بحاجة. أنا بس بقول الحقيقة.
قام من مكانه ودخل الأوضة.
وبعدها بساعتين، سمعت صوته وهو بيتكلم في التليفون.
ماقربتش منه، لكن سمعت اسمي.
— لازم نخلص بسرعة. هدير بدأت تسأل كتير، وأنا مش مرتاح.
وبعدها سكت شوية وقال:
— لا، مدحت وقف الموضوع، بس فيه طريقة تانية.
قلبي اتقبض.
يعني لسه بيفكر في طريقة تانية!
وفي اللحظة دي قررت إن المواجهة لازم تحصل، لكن بشروطي أنا.
يوم السبت، اتصلت بنسرين وقلت لها:
— إيه رأيك تيجي تتغدي عندي بكرة؟ بقالي كتير ماشفتكيش.
فرحت جدًا.
— طبعًا يا حبيبتي، هاجي من بدري.
قلت لها:
— وخلي شريف ييجي معاكي لو حابب.
سكتت فجأة.
— شريف؟ ليه؟
ضحكت وقلت:
— إيه يا بنتي؟ ده جوزي، ومش غريب يعني. وبعدين أنا عايزة أشوفه وأشوفكوا كلكوا.
قالت بتوتر:
— آه طبعًا، هكلمه.
قفلت، وبعدها بعت رسالة لشريف:
«بكرة أختي جاية تتغدى معانا، أتمنى تكون موجود.»
رد عليا بعد دقيقة:
«حاضر يا حبيبتي.»
كنت عارفة إن الليلة دي مش هتعدي بسهولة.
الصبح جهزت الأكل، ورتبت السفرة، وحطيت كل حاجة بشكل طبيعي.
نسرين وصلت الأول، لابسة لبس جديد وماسكة شنطة غالية.
حضنتني وقالت:
— وحشتيني يا هدهد.
حضنتها من غير ما أقول حاجة.
وبعد شوية وصل شريف.
أول ما شاف نسرين، حصلت لحظة صمت صغيرة جدًا، لكن عيني ما فاتتهاش.
بص لها بسرعة، وبعدها بص لي.
— إزيك يا نسرين؟
ردت وهي بتبتسم ابتسامة متوترة:
— الحمد لله يا شريف، إنت عامل إيه؟
قلت وأنا بشاور للسفرة:
— يلا يا جماعة، الأكل هيبرد.
قعدنا التلاتة.
حاولت أفتح مواضيع عادية، عن الشغل والبيت والأسعار، لكن شريف كان واضح عليه التوتر.
ونسرين كانت كل شوية تبص له وبعدين تبص لي.
بعد الغدا، دخلت المطبخ وجبت ظرف كبير، وحطيته قدامي على الترابيزة.
قلت:
— بما إننا كلنا قاعدين مع بعض، فيه موضوع مهم لازم نتكلم فيه.
شريف رفع عينه.
— موضوع إيه؟
بصيت له وقلت:
— موضوع الشقة.
وشه اتغير.
نسرين حطت الكوباية من إيدها.
— مالها الشقة يا هدير؟
ابتسمت وقلت:
— مفيش، أنا بس اكتشفت إن فيه ناس كانت بتخطط تبيعها من ورايا.
شريف حاول يتكلم:
— إنتِ تقصدي إيه؟
فتحت الظرف وطلعت صورة التوكيل.
— أقصد الورق اللي مضيتني عليه من غير ما أعرف محتواه الحقيقي.
مد إيده ناحية الورق، لكني سحبته.
— استنى، لسه مخلصتش.
طلعت صورة تانية فيها بيانات الوسيط العقاري، وبعدها حطيت الموبايل على الترابيزة.
قلت:
— وفيه كمان تسجيل لمحادثة حصلت جوه الشقة.
نسرين اتجمدت.
أما شريف فقام من مكانه بعصبية.
— إنتِ بتراقبينا؟! إنتِ وصلتي للدرجة دي؟
بصيت له وقلت:
— أنا ماكنتش محتاجة أراقبك. إنت اللي نسيت إنك بتخونني في شقتي، وبصوت عالي كمان.
وشه اصفر.
نسرين بدأت تعيط.
— هدير، استني، إنتِ فاهمة الموضوع غلط!
ضحكت ضحكة قصيرة وقلت:
— غلط؟ طيب اسمعي بنفسك.
شغلت التسجيل.
صوت نسرين خرج واضح:
«أنا مش مصدقة إنها صدقت الحكاية بسهولة كده! دي حتى بعتتلي أكل بحوالي تسعة آلاف جنيه في أقل من تلات أسابيع.»
وبعدها صوت شريف:
«مش كريمة وبس، دي كمان مش بتسأل كتير.»
فضل التسجيل شغال لحد ما وصلنا للكلام عن بيع الشقة والطلاق.
نسرين غطت وشها بإيديها.
أما شريف ففضل واقف مش قادر ينطق.
لما التسجيل خلص، بصيت لهم وقلت:
— عندكم حاجة تقولوهالي؟
شريف حاول يستعيد هدوءه.
— هدير، الموضوع مش زي ما إنتِ متخيلة.
قلت له:
— طيب فهمني. إيه اللي مش زي ما أنا متخيلة؟ إنك كنت بتقول إنك في الشغل وإنت عند أختي؟ ولا إنك كنت بتجهز تسرق شقتي؟ ولا إنك بتخطط تطلقني بعد ما تاخدها؟
قال بعصبية:
— أنا ماكنتش بسرقك! أنا كنت بحاول أضمن مستقبلي.
رديت عليه:
— ومستقبلك ده كان لازم يتبني على سرقة مراتي؟
نسرين قامت وقربت مني.
— هدير، أرجوكي اسمعيني. أنا غلطت، بس الموضوع بدأ من غير قصد.
بصيت لها.
— من غير قصد؟ يعني لما طلبتي مني الشقة وفضلتي تعيطي، كان من غير قصد؟ ولما كنتِ بتاخدي مني فلوس وأكل كل يومين، كان من غير قصد؟ ولما كنتِ بتقابلي جوزي من ورايا، كان من غير قصد؟
