جميعاً، بس ياريت متجيش تاني.
خرج محمود، وأنا قفلت الباب وفضلت واقفة ورا الباب شوية. كنت حاسة إن قلبي تقيل، مش عشان رفضته، لكن عشان كنت بتخلص من حلم كنت فاكرة إنه هيكمل معايا.
رجعت الصالون، ولقيت العريس الجديد واقف باحترام، وأول ما شافني ابتسم وقال أنا آسف لو وجودي جه في وقت مش مناسب، بس حابب أقولك حاجة، أنا مش جاي أختار شكل ولا وزن، أنا جاي أتعرف على إنسانة، ولو حصل نصيب فده هيكون عشان شخصيتها وأخلاقها.
الكلام ده خلاني أبتسم لأول مرة من قلبي من فترة طويلة.
قعدنا نتكلم، وعرفت إن اسمه كريم، عنده شغله الخاص، وبيساعد والده في تجارته، وشخصيته هادية ومحترمة. والأهم من كل ده إنه كان بيسمعني باهتمام، ومفيش مرة حسسني إني تحت التقييم أو إن شكلي موضوع للنقاش.
بعد ما مشي، عمتي فضلت تسألني إيه رأيك يا بنتي؟
بصيت لأمي، لقيتها مبتسمة وبتقول أنا مش هضغط عليكي، المهم تختاري اللي يصونك.
ابتسمت وقلت أنا مرتاحة لكريم يا ماما، وحابة أدي لنفسي فرصة.
وبالفعل، بعد كام يوم كريم رجع مع أهله، واتفقنا على الخطوبة.
وفي يوم الشبكة، دخلنا محل الصاغة، وقلبي كان بيدق بسرعة. افتكرت اللي حصل المرة اللي فاتت، لكن كريم لاحظ توتري ومسك إيدي وقال اختاري اللي يعجبك، ومتبصيش للسعر، المهم تكوني مبسوطة.
اختارت أمي خاتم جميل على مقاسي، ولما الصائغ قال السعر، كريم دفع من غير تردد، وبصلي وقال كده إيدك اتزوقت، وعقبال ما أشوفك أسعد عروسة.
أمي دمعت من الفرحة، وأنا حضنتها وقلت لها شايفة يا ماما؟ الحمد لله إن ربنا نجانا من اللي فات.
وبعد شهور اتجوزنا، والحمد لله كريم طلع أحن وأطيب مما كنت أتخيل. عمره ما عايرني بوزني، ولا حسسني إني
أقل من غيري، بالعكس كان دايماً يشجعني أهتم بصحتي عشان نفسي، مش عشان أرضي حد.
وفي يوم وإحنا قاعدين في بيتنا، لقيته بيضحك وبيقولي عارفة إيه أكتر حاجة عجبتني فيكي من أول مرة؟ إنك رغم اللي حصلك، لسه عندك قلب طيب ولسه بتعرفي تدي فرصة للناس.
ضحكت وقلتله بس المرة دي اخترت صح.
ومن يومها فهمت إن مش كل واحد يرجع ندمان يبقى لازم نرجعله، ومش كل هدية غالية تقدر تصلح چرح كبير.
أنا مش ندمانة إني رفضت محمود، بالعكس، بقيت أحمد ربنا إنه كشفلي الحقيقة قبل ما أعيش عمري كله في بيت مش حاسة فيه بالأمان.
والأجمل إني عرفت إن قيمتي مش في مقاس هدومي، ولا في وزني، ولا في خاتم يلمع في إيدي.
قيمتي في نفسي، وفي اللي يحبني ويحترمني من غير ما يطلب مني أتغير عشان أستحق حبه.
والحمد لله ربنا عوضني بإنسان شافني بعينه وقلبه، مش بميزان
ولا بمقاس خاتم.
