عروسة بقالي 3 أيام.. وحماتي قررت تحوّلني لخدامة من أول أسبوع!
أنا اتجوزت ابنك عشان أبقى مراته، مش عشان أبقى خدامة عندك وعند إخواته!
عمري ما كنت أتخيل إن فرحتي بجوازي هتتقلب بالشكل ده، وإن أول مشكلة بيني وبين حماتي هتحصل وأنا لسه مكملتش تلات أيام في بيت جوزي!
أنا اسمي ياسمين، عندي 25 سنة، ولسه عروسة جديدة. كنت داخلة حياتي الجديدة وأنا كل اللي في بالي إني أكسب جوزي وأهله، وأعيش معاهم في محبة واحترام، وكنت مستعدة أعمل أي حاجة ترضي ربنا وتخليني مرات وأم وزوجة ناجحة.
بس واضح إن حماتي كان ليها رأي تاني خالص!
في عيلتنا عندنا عادة إن أهل العروسة يفضلوا يبعتولها أكل وحلويات وأكل بيتي أول عشر أيام بعد الفرح، عشان البنت لسه جديدة وماتتعبش نفسها في المطبخ، وكل واحد على قد استطاعته.
وفي اليوم التالت من جوازي، كنت قاعدة في أوضتي برتب حاجتي، وفجأة حماتي خبطت على الباب ودخلت وهي بتقول
ياسمين، إحنا هنتغدى مع بعض النهارده تحت.
ابتسمت وقلت
حاضر يا طنط، هنتغدى عندكم؟
ردت باقتضاب
أيوه، انزلي على الغدا.
قولت لنفسي دي فرصة حلوة أقرب منها وأقعد معاهم شوية، خصوصًا إني مش عايزة حد يحس إني بعزل نفسي عن العيلة.
خدت الأكل اللي أهلي كانوا باعتينهولي، وقلت أنزل بيه معاهم بدل ما أنزل بإيدي فاضية.
لكن أول ما دخلت المطبخ، لقيت حماتي بتبص للأكياس اللي في إيدي بوش متغير، وقالت باستنكار
إيه ده؟ إنتِ جايبة الأكل ده ليه؟
رديت بابتسامة
ده أهلي باعتينهولي يا طنط، قولت أشارككم فيه.
بصتلي من فوق لتحت، وبعدها قالت بنبرة آمرة
بصي يا ياسمين، من النهارده تعملي حسابك إنك كل يوم تنزلي الساعة سبعة الصبح. كفاية عليكي دلع لحد كده، ومفيش حاجة اسمها تاكلي لوحدك فوق وإحنا تحت!
اټصدمت من كلامها، وفضلت باصة لها ثواني مش مستوعبة هي بتقول إيه.
قلت
معلش يا طنط، هو أنا فهمت غلط؟ أنزل الساعة سبعة أعمل إيه؟
ردت بكل برود
تساعديني في شغل البيت، وتجهزي الفطار، وتساعديني في الغدا. إنتِ بقيتي واحدة من البيت، ولازم تشيلي مسؤوليتك.
حاولت أتكلم بهدوء
بس أنا لسه عروسة يا طنط، بقالي تلات أيام بس متجوزة، وبعدين أنا معنديش مشكلة أساعدك من نفسي، لكن مش معنى كده إني أبقى مسؤولة عن خدمة البيت كله.
وشها اتقلب، وقالت بعصبية
أمال فاكرة الجواز فسح وخروجات؟ مش عاجبك الكلام يبقى على بيت أبوكي!
ساعتها اتغيرت ملامحي، وقلت لها بثبات
بيت أبويا مفتوحلي في أي وقت، ومش عيب إني أروحه. أنا اتجوزت ابنك، مش اتجوزت العيلة كلها، ومحدش من حقه يقررلي حياتي هتمشي إزاي.
وفجأة لقيت جوزي داخل المطبخ، واضح إنه سمع آخر كلامي.
بصلي پغضب وقال
إنتِ إزاي تكلمي أمي كده يا ياسمين؟
لفيت له وقلت
وإنت إزاي تسمح
إن حد يكلمني بالطريقة دي؟ أنا مراتك، مش خدامة عند حد!
حماتي بدأت تمثل دور الضحېة، وفضلت تقول
أهو ده اللي كنت خاېفة منه! لسه متجوزة ابني من تلات أيام وبترد عليا، أومال لما تعدي سنة هتعمل فيا إيه؟
جوزي قرب مني وقال بحدة
اعتذري لأمي، ومتكبريش الموضوع.
بصيتله پصدمة، وقلت
أعتذر عن إيه؟ عشان مش قابلة حد يفرض عليا أخدمه؟ لو إنت شايف إن ده الطبيعي، يبقى إحنا لازم نقف ونتكلم.
طلعت موبايلي واتصلت بأبويا، وأول ما رد قلتله
يا بابا، ممكن تيجي تاخدني؟ أنا مش قادرة أكمل هنا.
وبالفعل، بعد أقل من نص ساعة، بابا وماما وإخواتي وصلوا.
أمي أول ما عرفت اللي حصل، بصت لحماتي وقالت بجدية
بنتي مش هتعيش خدامة لحد! ولادك وبناتك يخدموا نفسهم، وبنتي مش مسؤولة عن حد غير جوزها. ولو ساعدتك في يوم يبقى من ذوقها وأصولها، مش فرض عليها.
وبعدين بصتلي وقالت
يلا يا ياسمين، لمي هدومك وتعالي معانا.
لمېت حاجتي وأنا قلبي مكسور، مش مصدقة إن أول أيام جوازي انتهت بالشكل ده.
ومن ساعتها وأنا في بيت أبويا، وجوزي بيتصل بيا كل شوية ويقول
أنا هاجي أخدك ونرجع بيتنا، ومش عايز نفتح أي كلام حصل.
لكن أنا رفضت وقلتله
أنا مش راجعة غير بشروط واضحة. أولها إننا نسكن في شقة لوحدنا، وتاني حاجة إنك تفهم إن ليا كرامة وحدود، ومش هقبل إن حد يتحكم فيا أو يفرض عليا حاجة.
سكت شوية، وبعدها قال ببرود إنتِ فاكرة إنك لما تسكني لوحدك كده هتخلصي من أمي؟ إنتِ لسه متعرفيش هي ممكن تعمل إيه!
اتعصبت من طريقته وقلتله أنا مش فاهمة إنت بتهددني ولا بتفهمني؟ وعلى العموم أنا مش هرجع غير لما نتفق على شروط واضحة.
قفل المكالمة في وشي، وبعدها بدقايق لقيت حماتي باعتالي رسالة، فتحتها لقيتها بتقولي
يا ياسمين، إنتِ فاكرة إنك لما خرجتي من بيتي كده كسبتي؟ استني لما تعرفي أنا هعمل إيه عشان أخلي ابني يرجعك ڠصب عنك!
وقتها عرفت إن الموضوع مش مجرد خلاف بيني وبين حماتي، وإن رجوعي لجوزي مش هيكون بالسهولة اللي هو متخيلها… لكن اللي حصل بعدها كان أكبر من كل توقعاتي!
إيدي كانت بتترعش والموبايل في إيدي، فضلت باصة للشاشة ومش مستوعبة الجبروت! يعني بدل ما تتكسف من اللي عملته، أو حتى تسكت وابنها يصلح اللي انكسر، بتبعت تهددني عيني عينك؟
قفلت الشاشة وأنا حاسة بڼار قايدة في صدري. قومت وقفت في نص أوضتي القديمة في بيت بابا، الأوضة اللي سيبتها من تلات أيام بس بفستان أبيض وزفة وطرحة، ورجعتلها بشنطة هدومي وكسرة نفسي.
ماما دخلت عليا بهدوء، شايلة كوباية ليمون دافي، حطتها قدامي على الكومودينو وبصت في وشي بحنية الدنيا كلها وقالت بتفكري في إيه يا ياسمين؟ روقي دمك يا بنتي، محدش
، واللي باعك بالفول بيعيه بقشره.ماما مسكت الموبايل، وشها احمر وعينيها برقت پغضب مكتوم، لكن مسكت نفسها وطبطبت على كتفي وقالت سيبيها تغلي في عرقها يا ياسمين. الكلب اللي بيهوهو ميعضش، هي بس مفروقة إنك وقفتي قدامها وكسرتي كلمتها، كانت فاكرة إنك هتنكسري وټعيطي وتبوسي إيدها عشان تسيبي ابنها راضي عنك.. بس هي متعرفش إن وراكي رجالة وسند، وإنك مش مقطوعة من شجرة.
كلام ماما هدّاني شوية، بس كان جوايا حړقة على طارق.. طارق اللي اختارته من بين الكل، اللي وعدني إنه هيكون ضهري وأماني، أول ما جت اللحظة الحقيقية باعني في ثانية ووقف في صفي أمه وهو عارف إنها ظالماني!
عدت الليلة دي وأنا عيني ما شافتش النوم. كل دقيقة أبص في السقف وأفتكر تفاصيل الساعات اللي فاتت. أفتكر ضحكته في الفرح، وأفتكر صوته الحاد وهو بيقولي اعتذري لأمي ومتكبريش الموضوع. هو أنا كنت بكبر الموضوع؟ ولا كنت بدافع عن إنسانيتي وكرامتي؟
تاني يوم الصبح، الساعة كانت يدوبك عشرة، ولقيت جرس الباب بيرن رن متواصل كأن فيه حريقة في البيت. أخويا الصغير جرى يفتح، ولقيت صوت عالي في الصالة قلب كيان البيت كله..
يا أهل البيت! يا ناس يا اللي هنا!
قومت مڤزوعة من مكاني، وخرجت
