بدون قايمه ٢

وبعدين قفل المكالمة في وشها.

ماما كانت هتتجنن من الغضب، ورمت الموبايل على الكنبة وقالت:

شوفتي قلة الذوق؟! يقفل السكة في وشي أنا؟! ده أنا مراته وأم ابنه!
بصيتلها وقلت:

خلاص يا ماما، سيبيه، أنا مش عايز مشاكل أكتر من كده.
لكنها ردت بعناد:

لأ، أنا مش هسيب حقك يضيع! إنت ابني، ومش هسمح لأبوك يذلك بالشكل ده.
وقتها حسيت إن ماما مش شايفة إني غلطت في حق شروق، كل اللي شاغلها إني خرجت من الشقة، وإن أبويا وقف ضدي. وبدل ما تفكر إزاي تساعدني أتصرف بعقل، كانت بتزود النار.

عدت الأيام اللي بعدها وأنا قاعد عند ماما، مستني منها تلاقي حل لموضوع الشقة، وفي نفس الوقت كنت بكلم هنا وأحاول أفهمها إن الجوازة هتتأجل شوية لحد ما أرتب ظروفي. لكن اللي حصل بعد كده كان أسوأ مما توقعت.

في يوم، كنت قاعد مع ماما في الصالة، وسمعنا جرس الباب. فتحت، ولقيت أبويا واقف قدامها، وأول ما دخل بصلي وقال:

إنت لسه هنا؟
استغربت وقلت:

أيوه يا بابا، أروح فين يعني؟ ما إنت اللي طلبت مني أمشي!
رد عليَّ:

أنا طلبت منك تسيب شقة شروق، مش تيجي تقعد عند أمك وتفضل مستنيها تصرف عليك وتدخلها في مشاكل معايا. إنت راجل، وقراراتك مسؤوليتك.
ماما قامت من مكانها وقالت بعصبية:

إنت جاي هنا كمان عشان تطرده؟! ده بيت أمه، ومش من حقك تمنعه يقعد معايا!
أبويا بص لها وقال:

أنا مش بمنعه يقعد معاكي، لكن طالما إنتِ اللي شجعتيه على اللي عمله، وبتحرضيه على إنه يظلم مراته، يبقى إنتِ كمان تتحملي مسؤولية قراراتك. أنا مش هفضل أصلح وراكم طول العمر.
وبعدين لف ناحيتي وقال:

اسمع يا ابني، أنا مش هكرر كلامي تاني. لو إنت مصمم تتجوز هنا، جهز نفسك بنفسك، ودبر مكان تعيش فيه، لكن متجيش تطلب مني فلوس ولا مساعدة عشان تكمل جوازة إنت بدأتها بظلم بنت عمك.
رديت بعصبية:

يعني هتسيب ابنك يتبهدل عشان واحدة مش من عيلتك؟!
أبويا اتعصب وقال:

شروق من عيلتي، وبنت عمي، ومراتك اللي إنت ظلمتها، وحقها عندي زي حقك. ولو إنت شايف إن الدفاع عن المظلوم معناه إني بتخلى عن ابني، فدي مشكلتك إنت!
وبعدين أشار ناحية الباب وقال:

قوم يا ابني، خد شنطتك وامشي. طول ما إنت مصر إنك مش غلطان، مش هتستفيد من وجودك هنا غير إنك هتفضل تلوم الناس على نتيجة أفعالك.
ماما وقفت قدامه وقالت:

إنت مش هتطلع ابني من بيتي!
بصلها وقال:

ده بيتك، وأنا مش هقدر أمنعه يدخل بيت أمه، لكن لو إنتِ مش عايزة تسمعي مني ولا عايزة ابنك يفهم غلطه، يبقى أنا همشي، ومش هفضل أشارك في المهزلة دي.
وبالفعل خرج أبويا، لكن قبل ما يقفل الباب بصلي وقال:

لما تحب تتصرف كراجل وتتحمل مسؤولية قراراتك، ابقى كلمني. إنما طول ما إنت شايف إن الغلط كله في الناس، متستناش مني أجي أطلعك من كل مشكلة إنت دخلت نفسك فيها.
بعد ما مشي، ماما فضلت تعيط وتقول إنه أهانها وإنه اتغير عليها، وأنا كنت قاعد مش عارف أعمل إيه. بقيت محشور بين مشاكل أبويا وماما، وبين جوازة كنت فاكر إني هبدأها بسهولة، وبين شقة اكتشفت فجأة إنها مش ملكي. وفي وسط كل ده، جالي اتصال من هنا.

رديت بسرعة وقلت:

أيوه يا هنا، كنت لسه هكلمك.
لكن صوتها كان مختلف، وقالت:

أنا عايزة أتكلم معاك في موضوع مهم.
قلت بقلق:

خير يا حبيبتي، في إيه؟
سكتت شوية، وبعدها قالت:

أنا عرفت اللي حصل بينك وبين شروق، وعرفت إنك سبت شقتك وقاعد عند خالتى.
اتضايقت وقلت:

ماما قالتلك؟ بصي يا هنا، الموضوع كله إن فيه خلاف بيني وبين أبويا، وإن شاء الله هيتحل، وأنا هجهز شقة ونتجوز زي ما اتفقنا.
ردت بهدوء:

وإنت متوقع إني هفضل مستنياك لحد ما تحل مشاكلك؟ أنا وافقت على الجواز لأنك كنت بتقول إن عندك شقة ومستقر، وإنك جاهز تبدأ حياة جديدة. دلوقتي اكتشفت إنك مش عارف حتى هتعيش فين!
قلت بسرعة:

يا هنا، كل الناس بتعدي بظروف، وأنا هتصرف، بس اديني فرصة.
لكنها قالت الكلام اللي كنت خايف أسمعه:

أنا مش عايزة أتجوز وأعيش مع أمي وخالتي في نفس البيت، ومش عايزة أبدأ حياتي وسط مشاكل عائلية بالشكل ده. أنا آسفة، بس أنا مش هكمل في الجوازة دي.
صرخت فيها:

يعني إيه مش هتكملي؟! إنتِ كنتِ موافقة، وأهلك وافقوا، إيه اللي اتغير؟!
ردت:

اللي اتغير إني عرفت الحقيقة. أنا مش هقدر أعيش معاك بالشكل ده، ومش عايزة أكون سبب في مشاكل بينك وبين أهلك أكتر من كده. خلينا ننهي الموضوع أحسن.
وقبل ما ألحق أرد، قفلت المكالمة.

فضلت ماسك الموبايل وأنا مش قادر أصدق إنها تخلت عني بالسهولة دي، وإن البنت اللي كنت فاكر إني هبدأ معاها حياة جديدة، قررت تمشي أول ما اكتشفت إني مش مستقر زي ما كانت متخيلة. بصيت لماما وقلت بمرارة:

شوفتي يا ماما؟ حتى هنا سابتني!
ماما قربت مني وقالت:

معلش يا حبيبي، هي مش نصيبك، وربنا يعوضك بالأحسن.
لكن كلامها ما ريحنيش، لأن لأول مرة بدأت أحس إن كل اللي خسرته مش بسبب أبويا ولا بسبب شروق ولا حتى بسبب هنا. أنا اللي اخترت أسمع كلام ماما، وأنا اللي قررت أطرد شروق من غير ما أفكر في حقها، وأنا اللي كنت متخيل إن عدم وجود قايمة معناه إني أقدر أعمل اللي أنا عايزه من غير ما حد يقف في وشي.

وفي الوقت اللي كنت فيه قاعد عند أمي، مش عارف هعمل إيه في حياتي، كانت شروق بترجع لشقتها، البيت اللي أبويا اشتراه وكتبه باسمها عشان يحميها من اليوم اللي أنا نفسي بقيت فيه سبب وجعها.

رجعت شروق ومعاها ولادها، وكانت شايلة حاجتها اللي خرجت بيها من البيت، لكن المرة دي ما كانتش راجعة مكسورة زي ما خرجت. كانت عارفة إن جوازها انتهى، وإن الراجل اللي استحملته سنين ما بقاش ليه مكان في حياتها، لكنها على الأقل رجعت لبيت تقدر تعيش فيه هي وولادها من غير ما تخاف إن حد يرميها في الشارع تاني.

وأبويا لما عرف إنها رجعت، راح زارها واطمأن عليها وعلى الولاد، وقال لها إنه آسف على اللي حصل، وإنه كان يتمنى إن ابنه ما يوصلش بيها للحال ده. أما أنا، ففضلت عند أمي، أسمعها كل يوم وهي بتتكلم عن أبويا بغضب، وأحاول أقنع نفسي إن اللي حصل كله ظلم ليا، لكن كل ما أفتكر شروق وهي خارجة من البيت بشنطة هدومها، كنت بحس إن الصورة اللي رسمتها لنفسي عن إني صاحب الحق بدأت تتكسر.

كنت فاكر إني لما أتخلص من شروق هكسب حريتي، لكن في لحظة واحدة خسرت بيتي، وأبويا وقف ضدي، وهنا سابتني، وما بقاش معايا غير أمي اللي شجعتني على قرار كنت فاكر إنه هيخليني أسعد واحد في الدنيا