ده أنا عمري ما أذيتك، ولا يوم فكرت أزعلك، وحتى لما كنت بتعاملني وحش كنت بقول معلش، يمكن يتغير، يمكن في يوم يحس بيا!كنت سامعها، لكن بدل ما أحس بالذنب، اتضايقت من أسئلتها، وقلت بعصبية:- أنا مش بحبك يا شروق! هو لازم أكرر الكلام ده كل يوم؟
أنا اتجوزتك غصب عني، ومش هفضل طول عمري محبوس في جوازة مش عايزها!دموعها نزلت وهي بتقول:- غصب عنك؟ هو أنا اللي جيت لحد عندك وطلبت منك تتجوزني؟ ده أبوك وأبويا اللي اتفقوا، وأنا لما اتجوزتك كنت فاكرة إنك هتديني فرصة، لكن إنت من أول يوم قفلت كل الأبواب في وشي.
استحملت إهمالك، واستحملت كلام أمك، واستحملت إني أعيش في بيت مش حاسة فيه إني مرغوب فيا، وكل ده على أمل إنك في يوم تحس إني مراتك بجد. وبعدين أشارت للورقة وقالت:- ودلوقتي بترميني بالشكل ده؟ بعد كل السنين دي؟ حتى مش قادر تقعد معايا وتفهمني قبل ما تاخد قرارك؟
رديت بحدة:- أنا مش مطالب أبررلك حاجة، والطلاق حصل، ومش هغير رأيي. قومي لمي هدومك. بصتلي بصدمة، وبعدها قالت:- وبيتي؟ أنا أروح فين؟ دي شقتي زي ما هي شقتك، وأنا داخلاها على سنة الله ورسوله، مش داخلاها ضيفة عندك عشان تطردني وقت ما تحب!
ضحكت بسخرية وقلت:- شقتي أنا، وأنا حر فيها. وبعدين إنتِ مالكيش قايمة ولا ليكي ورقة واحدة تثبتي بيها إن ليكي حاجة هنا، فبلاش تدخلي نفسك في مشاكل إحنا مش ناقصينها. وقتها شروق مسحت دموعها وبصتلي نظرة عمري ما شفتها منها قبل كده، نظرة فيها وجع وصدمة وكرامة اتكسرت بعد ما فضلت سنين بتحاول تحافظ على بيتها.
قالت بصوت هادي رغم دموعها:- إنت فاكر إن عشان أبويا وثق في عمك ومكتبش قايمة، يبقى أنا مليش حق؟ إنت فاكر إن سكوتي على معاملتك ليَّ معناه إني ضعيفة ومليش أهل يقفوا جنبي؟ أنا عمري ما طلبت منك حاجة، ولا عمري حسستك إنك مقصر معايا، لكن إنت النهارده بتثبتلي إن كل اللي عملته عشانك كان غلط.
ما رديتش عليها، ودخلت أوضتنا وطلعت شنطة كبيرة من الدولاب، ورميتها قدامها وقلت:- يلا، خلصي بقى، أنا مش فاضي للكلام ده. شروق فضلت واقفة مكانها لحظات، وبعدها دخلت الأوضة وبدأت تلم هدومها بإيدين بتترعش. كانت كل شوية تمسك حاجة وتبص لها، كأنها بتفتكر أيام كانت بتحلم فيها إن البيت ده يبقى بيتها بجد، وإن الراجل اللي عاشت معاه هييجي يوم ويحبها.
وأنا واقف على الباب براقبها، بدل ما أساعدها أو حتى أسيبها تجمع حاجتها في هدوء، كنت مستعجلها.- خلصي يا شروق، مش هنقضي اليوم كله هنا!بصتلي وقالت:- متقلقش، أنا مش هفضل في مكان إنت مش عايزني فيه، بس افتكر إنك إنت اللي اخترت تطلعني من حياتك بالطريقة دي، وأنا مش هنسى اللي حصل طول عمري.
لم تطلب مني فرصة أخيرة، ولا حتى حاولت تتمسك بيا زي كل مرة. لمَّت هدومها وحاجتها الشخصية، وخرجت من الأوضة وهي شايلة الشنطة، لكن قبل ما تفتح باب الشقة وقفت وبصت للبيت كله، وبعدها لفت ناحيتي.
تعرف إيه أكتر حاجة وجعتني؟ مش إنك طلقتني، لأن الحب عمره ما كان بالغصب، لكن إنك استرخصتني للدرجة دي، لدرجة إنك حتى مش شايف إني أستاهل أخرج من بيتك بكرامتي. وبعدها فتحت الباب وخرجت. قفلت الباب وراها، وخدت نفس طويل وأنا حاسس إني أخيرًا بقيت حر، لكن الحرية اللي كنت فاكر إني حصلت عليها كانت مبنية على إني كسرت قلب إنسانة ملهاش ذنب في أي حاجة.
اتصلت بماما وقلتلها إني خلصت الموضوع، وإن شروق خرجت من الشقة، وإننا نقدر نبدأ نجهز لجوازي من هنا. فرحت وقالتلي:- ألف مبروك يا حبيبي، أخيرًا هتعيش حياتك زي ما إنت عايز. سيبك بقى من اللي فات، وأنا هكلم أختي ونحدد معاد الفرح.
قفلت معاها، وكنت لسه هبدأ أرتب الشقة عشان أغير العفش وأجهزها لهنا، لكن بعد أقل من ساعة سمعت صوت جرس الباب. فتحت، لقيت أبويا واقف قدامي، ووشه أحمر من الغضب، وأول ما دخل بصلي وقال بصوت عالي:- إنت عملت إيه يا بني آدم؟!استغربت وقلت:- في إيه يا بابا؟
مالك بتزعق ليه؟قرب مني وقال:- بتسألني في إيه؟ إنت طلقت شروق وطردتها من البيت بشنطة هدومها؟!اتنهدت بضيق وقلت:- أيوه يا بابا، طلقتها، وده حقي. أنا مش بحبها، ومش هفضل عايش معاها طول عمري عشان أرضي الناس. بصلي بصدمة، وبعدها قال:- وحقها إيه بقى في اللي عملته ده؟
! هو إنت فاكر إن الجواز لعبة، تتجوز واحدة ولما تزهق منها ترميها في الشارع؟!عليت صوتي وقلت:- يا بابا، أنا مش عيل صغير، وده قراري، ومحدش له دعوة بيه. ظهر عليه الضيق وقال:- قرارك؟ طب ماشي، أنا مش جاي أقولك تحبها بالعافية، لكن جاي أفهمك إنت عملت إيه!
إنت فاكر إن شروق ملهاش حق عشان مفيش قايمة؟!قلت بثقة:- أيوه، ما هي دي الحقيقة. أنا ممضيتش على حاجة، وشقتها مش موجودة أصلًا، والعفش كله بتاعي، يعني هي مش هتعرف تعمل حاجة. في اللحظة دي أبويا قرب مني، وبصلي في عيني وقال بغضب:- إنت عارف عمك ممضاش قايمه وكان واثق فيه سكت، لأنه لأول مرة من ساعة ما بدأت الحكاية أحس إن فيه حاجة أنا معرفهاش.
كمل أبويا كلامه وكان كلامه اكبر صدمه ليه
