#مشيره_محمد
الدكتور بص لجوزي وقال له بهدوء شديد
«أستاذ حسام أنا هطلب منك تسيب المفاتيح مكانها وتخرج بره الأوضة لأن مراتك محتاجة رعاية طبية ومش من حقك تضغط عليها أو تجبرها على أي قرار وهي في الحالة دي»
حسام ضحك بسخرية وهو بيبص للدكتور من فوق لتحت
«إنت شكلك فاهم الموضوع غلط يا دكتور دي مراتي وأنا أولى الناس بيها وأنا اللي هخرجها من هنا وأرجعها بيتي»
الدكتور ما اتعصبش ولا رفع صوته لكنه قرب خطوة وقال له
«كونها مراتك مش معناه إنك تملكها»
حسام اتجمد مكانه للحظة وبعدين لف ناحيتي
«إنتِ اللي وصلتي الموضوع لكده يا مريم؟ إنتِ عايزة تفضحيني قدام الناس؟ بعد كل اللي عملته عشانك ده جزاتي؟»
بصيت له وأنا حاسة إن جسمي كله بيوجعني وإن نفسي بيتقطع من أقل حركة
كنت نفسي أقوم وأصرخ في وشه وأقوله إنه هو السبب في كل اللي حصل لكن حتى الكلام كان محتاج مني مجهود
فقلت بصوت ضعيف
«أنا ما فضحتكش يا حسام أنا بس حكيت اللي إنت عملته فيا»
قرب مني بسرعة لكن الممرضة وقفت بينه وبين السرير
«لو سمحت ارجع لورا»
حسام بص لها بغضب
«إنتِ مالكيش دعوة بمشاكلنا»
ردت عليه بثبات
«لما يبقى فيه مريضة في المستشفى بتقول إنها مش عايزاك تدخل عليها يبقى دي مش مجرد مشكلة عائلية»
في اللحظة دي حسام حس إن السيطرة اللي متعود عليها بدأت تفلت من إيده
طلع موبايله واتصل بوالدته
«أيوه يا أمي تعالي المستشفى حالًا مرات ابنك اتجننت وعايزة تلبسني مصيبة»
كنت سامعة كل كلمة وهو بيتكلم
وبعد حوالي نص ساعة وصلت حماتي نوال وهي داخلة المستشفى بخطوات سريعة ووشها كله غضب
أول ما شافتني على السرير قربت مني وقالت
«إيه اللي إنتِ عملاه ده يا مريم؟ عايزة تضيعي مستقبل ابني؟»
بصيت لها وأنا مش مصدقة إنها لسه بتلومني حتى بعد اللي حصل
قلت لها
«ابنك هو اللي آذاني يا طنط نوال»
هزت راسها بعصبية
«أكيد إنتِ استفزيتيه هو عمره ما كان بيعمل كده من غير سبب»
الجملة دي كانت بتتكرر على لساني من سنين
كل مرة يزعق كانت تقول إني استفزيته
كل مرة يكسر حاجة كانت تقول إني عصبيته
وكل مرة يمد إيده عليا كانت تقول لي استحملي عشان بيتك
لكن المرة دي كان فيه فرق
المرة دي ما كنتش واقفة في مطبخي لوحدي وهي بتزعق لي
كنت في مستشفى وفيه دكتور وممرضة وناس سمعوا الحقيقة
الدكتور قال لها
«يا مدام نوال إحنا مش هنا عشان نلوم المريضة إحنا هنا عشان نعالجها ونضمن إنها تقدر تاخد قراراتها بأمان»
حماتي رفعت حاجبها وقالت
«يعني إيه بأمان؟ دي مراته مش واحد غريب عنها»
الدكتور رد
«التقرير الطبي هيوضح الإصابات اللي عندها والسبب اللي حكت عنه بالتفصيل وأي اشتباه في إساءة خطيرة لازم يتعامل معاه بجدية»
أول ما سمعت كلمة تقرير طبي بصيت لحسام
وشه اتغير
كان فاكر إن بمجرد ما يوصل المستشفى هياخدني ويرجعني البيت زي كل مرة
ما كانش متخيل إن المرة دي كل حاجة هتتسجل
ولا كان متخيل إن فيه ناس هتسمعني من غير ما تطلب مني أبرر له تصرفاته
حسام حاول يرجع لنبرة صوته الهادية
«يا جماعة أنا كنت مضغوط نفسيًا موضوع الولد ده كان مأثر عليا وإحنا كنا بنتخانق بس أنا ما كنتش أقصد إن الموضوع يوصل لكده»
بصيت له وقلت
«إنت علقتني من رجلي وآذيتني بالساعات يا حسام إيه الجزء اللي ما كنتش تقصده؟»
سكت
ولأول مرة من سنين ما لقيش رد جاهز يقوله
السر اللي كان حسام مخبيه عن أمه
بعد شوية الدكتور طلب من الممرضة تتأكد إن حالتي مستقرة وبعدها خرج يتكلم مع الفريق الطبي
حماتي استغلت خروجه وقربت مني وهي بتتكلم بصوت واطي
«بصي يا مريم أنا عارفة إن اللي حصل كان غلط بس إنتِ كمان فكري بعقلك لو الموضوع دخل في محاضر وقضايا هتضيعي نفسك وابني هيُحاسب وإنتِ هتفضلي لوحدك»
ضحكت ضحكة صغيرة من كتر الوجع
«هو إنتِ خايفة عليا يا طنط نوال ولا خايفة على ابنك؟»
اتعصبت وقالت
«أنا أم وخايفة على ابني»
قلت لها
«وأنا كنت أم يا طنط»
الكلمة خرجت مني ووقعت بينا زي حجر تقيل
بصت لي ومقدرتش تتكلم
كملت وأنا دموعي نازلة
«أنا كنت مستنية أشيل ابني وأحضنه وأشوفه بيكبر قدامي كنت متخيلة أول يوم مدرسة وأول مرة يناديني يا ماما كنت بحلم بحاجات بسيطة أوي لكن ابنك أنهى كل الأحلام دي بإيده»
حماتي رجعت خطوة لورا
ما كنتش عارفة إذا كانت حاسة بالذنب ولا بس اتضايقت من الكلام اللي سمعته
لكن حسام اللي كان واقف عند الباب قال بعصبية
«كفاية تمثيل بقى!»
بصيت له
«تمثيل؟»
قال
«أيوه تمثيل إنتِ عارفة كويس إن موضوع الولد ده كان شاغلني وإن كل الرجالة بتحلم تخلف ولد يشيل اسمها»
قلت له
«وأنا مالي؟ هو أنا اللي قررت إن الجنين بنت؟»
اتلخبط للحظة
كنت عارفة إن السونار ما كانش أكد لنا نوع الجنين بشكل نهائي وإنه كان مصر من البداية إن الحمل ده لازم يكون ولد
لكنه كان بيتعامل معايا كأني مسئولة عن حاجة خارجة عن إرادتي
قال بعصبية
«أنا كنت عايز ولد وبس»
رديت عليه
«حتى لو كنت عايز ولد إنت ما عندكش حق تأذيني ولا تأذي طفل لسه ما شافش الدنيا»
حماتي نوال بصت لابنها باستغراب
«إنت كنت بتضربها عشان موضوع الولد؟»
حسام لف ناحيتها بسرعة
«يا أمي ما تسمعيش كلامها هي بتكبر الموضوع»
لكن أمه ما ردتش عليه
ولأول مرة شفت الشك يدخل عينيها
مش لأنها صدقتني بالكامل
لكن لأنها بدأت تفهم إن الموضوع أكبر من خناقة بين زوجين
وفجأة موبايل حسام رن
بص للشاشة واتحرك ناحية الشباك عشان يرد
«أيوه يا سامح»
سكت شوية وبعدين قال بصوت واطي
«أنا في المستشفى دلوقتي ومش هعرف أجي النهارده»
سمع الرد وبعدين اتنرفز
«بقولك إيه أنا قلت لك هتصرف في موضوع الفلوس متقلقش»
قلبي دق بسرعة
فلوس إيه؟
حسام كان دايمًا بيقول لي إن شغله واقف وإننا مديونين وإن أي مصاريف زيادة هتدمرنا
حتى مصاريف متابعة الحمل كان بيتخانق معايا عليها
لكنه كان بيتكلم عن فلوس بصوت شخص عنده حاجة كبيرة بيخبيها
قفل المكالمة ولما لف لقى عيني في عينه
قال بسرعة
«مالك بتبصي لي كده ليه؟»
قلت
«مين سامح؟»
رد بعصبية
