أنا واختي متجوزين وأمي جت تعيش معايا، بصراحة أنا وجوزي رفضنا. هي ملهاش حد غيري أنا وأختي.
أختي قالت: أخدها أنا تعيش معايا، دي البركة والخير.
ووالدتي ليها معاش 14 ألف كل شهر، ومن ساعة ما راحت تقعد عند أختي عملت توكيل لأختي علشان تروح تجيب القبض. أمي بتصرف على علاجها الشهري، وكل ما أروح أزورهم ألاقي أمي بتطلب أكل ديلفري للبيت أو تجيب أكل وحاجات، وكله طبعًا من معاش أمي. وأختي وجوزها عادي بالنسبالهم، مهتمين بأمي جدًا، يجيبوا لها دواها ويجيبوا لها الفاكهة والحاجات اللي بتحبها.
لما روحت قولت لجوزي، قالي المفروض لينا في المعاش بتاعها، إنتي بنتها زيك زي أختك.
وكمان البيت بتاعها اللي باسمها ومأجره، لينا حق في الإيجار بتاعه.
البداية
أنا اسمي منى، وأختي الكبيرة اسمها سمر. طول عمرنا عايشين في حتة شعبية، بس ربنا كرمنا واحلوّت في إيدنا وجوازاتنا ميسورة وعال العال. أنا متجوزة أشرف، شغال مقاول حر، والقرش في إيده بفضل الله متوفر، مبيحرمناش من حاجة، وعايشة في شقة ملك وفي منطقة نضيفة. وسمر أختي متجوزة حازم، شغال مهندس في شركة بترول، يعني برضه حالته المادية فوق الممتازة ومعيشها في خير.
القصة بدأت من ست شهور، لما أبويا غاب عن الدنيا وساب أمي لوحدها في الدنيا. أمي ست غلبانة، ملهاش غيرنا أنا وسمر. بس طبعًا بعد غيابه، كان لازم حد فينا يشيلها. لما سمر فتحت معايا الموضوع، أنا بصيت لأشرف جوزي، ولقيته بيرمشلي بعينيه وبوز بوقه، فهمت الإشارة طبعًا.
قعدت ألف وأدور وأقول: “يا سمر، أنا شقتي ضيقة، وعيالي صغار ودوشتهم مبتخلصش، وأمي صحتها على قدها ومش هتستحمل الكركبة دي، وأشرف جوزي بيحب الهدوء وبيجي من الشغل مش طايق هدومه”. أشرف يومها أيد كلامي وقال: “يا سمر يا ختي، العين بصيرة والإيد قصيرة في طاقة الاستحمال، منى مش هتقدر على خدمتها لوحدها”.
سمر بصتلي عتاب طويل، بس مأثّرش فيا، وقالت بقلب راضي: “خلاص يا منى، أمي هتيجي تعيش معايا أنا وحازم، دي البركة والخير كله اللي هيدخل بيتي، واللقمة اللي تاكل منها أمي تزيد مبروك بوجودها”.
وفعلًا، أمي عزلت وراحت قعدت عند سمر. أمي مش جاية بشنطة هدومها وبس، أمي ليها معاش محترم سابهولها أبويا، ربنا يبارك فيه، كان موظف كبير، معاشها 14 ألف جنيه بحالهم كل أول شهر، وكمان عندها شقة تمليك قفلناها وأجرناها إيجار جديد بـ 4 آلاف جنيه في الشهر. يعني الداخل بتاعها 18 ألف جنيه، مبلغ مش قليل.
أمي من أول ما راحت عند سمر، ولأن حركتها تقيلة، عملت لسمر توكيل رسمي في البوسطة والبنك عشان تصرفلها المعاش والإيجار. أنا في الأول قولت في بالي: “يلا، أهي شالت شيلتها، وتصرف عليها وعلى علاجها”.
بس الميزان بدأ يختل في عيني لما بدأت أروح أزورهم..
كل ما أدخل بيت سمر، ألاقي العز والخير مرطّط. أدخل ألاقي أمي قاعدة في الصالة ملوكة، وماسكة التليفون وتطلب ديلفري، أكل من الغالي، مشويات وبيتزا وحلويات شرقية، وتقول: “يلا يا سمر اطلبي ليكي ولجوزك وللعيال على حسابي”. وسمر وجوزها حازم يضحكوا وياكلوا معاها بهزار وفرحة.
مش بس كده، حازم جوز سمر، اللي كنت فاكراه هيتضايق من وجود حماته، لقيت عينه عليها في الرايحة والجاية. ينزل بنفسه يجيب لها الدوا من الصيدلية، ويدخل البيت شايل شنط فاكهة من أنظف الأنواع، المانجا والتفاح المستورد، ويقعد يقشرلها بإيده ويقولها: “دنتي منورة البيت يا ست الكل، البيت من غيرك ضلمة”.
كل ما أشوف المنظر ده، نار تقيد في قلبي. أرجع البيت لأشرف وأنا وشي مقلوب.
في ليلة من كام يوم، كنت قاعدة مع أشرف بنشرب الشاي، قولتله: “أنا كنت عند سمر النهاردة يا أشرف، وشوفت العجب.. أمي ميزانيتها مفتوحة على الآخر، ديلفري وفسح وطلبات، وحازم واخدها تحت باطه وعمال يدلع فيها، وطبعًا كله من فلوس أمي ومعاشها اللي بيقبضوه أول بأول”.
أشرف حط كوباية الشاي من إيده، وعينه لمعت بشرر، وقال لي بنبرة حاسمة: “جرى إيه يا منى؟ إنتي هبلة ولا بتستهبلي؟ الـ 14 ألف بتوع المعاش، والـ 4 آلاف بتوع الإيجار، دول حق أمك.. وطالما أمك عايشة وبتصرف، يبقى الفلوس دي مش من حق سمر لوحدها تبهوق بيها في بيتها وتأكل جوزها وعيالها ديلفري!”.
قولتله بتردد: “بس يا أشرف، أمي هي اللي راضية وبتصرف بمزاجها، وسمر هي اللي شايلاها”.
خبط أشرف على التربيزة وقال بعصبية: “تشيلها ولا متشلهاش! إنتي بنتها زيها زي سمر، ليكي في المعاش ده زي ما ليها، وليكي في إيجار البيت النص بالنص! أمك مهووسة جدًا بجمع الفلوس، وسمر وجوزها مقضيينها بدلع أمك عشان يلهفوا القرشين، وإحنا قاعدين نتفرج؟ المفروض لينا نصيب ثابت في الفلوس دي يجيلنا لحد هنا كل شهر.. إنتي مش بنت البطة السودة يا منى!”.
كلام أشرف دخل ودني وعمل زنزانة في دماغي. الشيطان شاطر، والقرش ملوش عزيز، وقولت لنفسي: “فعلاً، دي أمي أنا كمان، والفلوس دي لو اتوفرت، أنا أولى بنصها”.
وتاني يوم، لبست العباية ونزلت، والمطمع في عيني، وقولت لازم أروح أواجه سمر وأمي..
دخلت بيت سمر، لقيت أمي قاعدة وحازم جوز أختي لسه جايب لها علب الدوا الجديدة وبيمضي الدليفري على الباب. قعدت، ونظراتي كانت كلها غل وتفكير. سمر جابت لي الحاجه الساقعة وقعدت جنبي ومبتسمة: “منورة يا منى يا حبيبتي”.
بصيت لأمي، وبعدين بصيت لسمر، وقولت بقلب جامد وبصوت هز جدران الصالة: “بقولك إيه يا سمر.. وبقولك إيه يا أمي.. إحنا لازم نتكلم في الأصول وفي القرشين اللي بيدخلوا هنا كل شهر، المعاش والإيجار دول أنا ليا فيهم نصيب زيي زيك، ومن أول الشهر ده، لازم آخد حقي ونصيبي من الفلوس دي يجيلي لحد بيتي، لإن جوزي قال الكلمة والكلمة مش هتنزل الأرض!”.
الكاتب_رومانى_مكرم
الصالة فجأة هس، والابتسامة اتمسحت من على وش سمر وحازم، وأمي بقها اتفتح من الدهشة..
يا ترى هيحصل إيه؟ هل سمر وحازم هيقفوا لمنى وأشرف ويعاتبوهم على التصرف ده؟ وأمي هتعمل إيه بعد ما شافت طمع بنتها التانية عيني عينك كده؟ والبركة اللي طارت من بيت منى، هتقلب حياتها لصعوبة؟
صمتت الصالة لثوانٍ طويلة، لدرجة إن صوت عقارب الساعة كان مسموع.
أمي بصتلي نظرة عمرها ما بصتهالي قبل كده، نظرة وجع أكتر منها عتاب.
أما سمر ففضلت ساكتة شوية، وبعدها قالت بهدوء:
“انتي بتقولي إيه يا منى؟”
رفعت راسي بعناد وقلت:
“بقول حقي. أنا بنتها زيك. والمعاش والإيجار مش من حقك لوحدك.”
سمر أخدت نفس طويل وقالت:
“وأمك قاعدة عندي من ست شهور. بتصحى بالليل أتطمن عليها أنا. لما الضغط بيعلى أجري بيها المستشفى أنا. لما الدكتور يطلب أشعة وتحاليل بدفع أنا الأول لحد ما الفلوس تتسحب. ولما تقع أو تتعب أنا اللي بسيب بيتي وعيالي وأقعد جنبها.”
قاطعتها بعصبية:
“يعني بتمنني؟”
هنا تدخل حازم لأول مرة وقال بهدوء شديد:
“لا يا منى، محدش بيمن على والدته. لكن انتي جاية تتكلمي عن فلوس أمك وكأنها تركة، وهي لسه عايشة قدامنا.”
الكلمة نزلت عليا تقيلة.
لكن العناد كان راكبني.
بصيت لأمي وقلت:
“قولي يا أمي. مش أنا بنتك برضه؟”
أمي نزلت عينيها في الأرض شوية، وبعدها قالت:
“انتي بنتي يا منى، وغالية عندي. لكن الفلوس دي فلوسي أنا.”
سكتت الصالة كلها.
وكملت أمي:
“أنا اللي تعبت أنا وأبوكي عشان نوفرها. وأنا اللي من حقي أصرفها زي ما أنا عايزة.”
قلت بسرعة:
“بس…”
رفعت إيدها تمنعني.
“اسمعيني للآخر.”
أول مرة أحس إن صوت أمي فيه القوة دي.
قالت:
