“أنا طايش ومغرور وبحب الستات وكداب وخاين، وده باختصار رأي مراتي فيا، والحقيقة إن رأيها صح!”
أنا اسمي كريم، عندي ٣٩ سنة، ومتجوز من ست اسمها ندى، ست أصيلة عمري ما هعرف أوفيها حقها، حتى لو فضلت باقي عمري كله أحاول أعوضها عن اللي عملته فيها.
بس المشكلة إن الواحد ساعات بيبقى في إيده كنز، ويفضل يدوس عليه برجله لحد ما يضيعه، وساعتها بس يعرف قيمته.
ندى استحملت معايا حاجات محدش يستحملها. لما عرفت إن عندي مشكلة في الإنجاب وإن الموضوع محتاج علاج وصبر، عمرها ما حسستني إني ناقص، ولا في يوم عايرتني، ولا حتى حكت لحد من أهلها علشان تحافظ على كرامتي.
كانت بتقولي: _ يا كريم، إحنا مالناش غير بعض، وربنا لو كاتب لنا طفل هيرزقنا، ولو اتأخر يبقى لحكمة عنده، وأنا مش متجوزاك علشان أخلف وبس.
الكلام ده كان المفروض يخليني أشيلها فوق راسي، لكن أنا للأسف كنت أناني، شايف إن الدنيا كلها لازم تلف حواليا.
وبعد سنين علاج وتعب، ربنا رزقنا ببنتنا ليلى، وأول ما شيلتها بين إيديا، ندى كانت بتعيط من الفرحة، وأنا وعدتها إني هعوضها عن كل لحظة وجع عاشتها.
لكن الوعود عندي كانت بتتبخر أول ما أقابل واحدة جديدة تعجبني!
كنت بخون، وأكدب، وأرجع البيت أتصرف كأن مفيش حاجة حصلت.
ولما ندى كانت تواجهني، كنت أقلب الترابيزة عليها.
_ إنتِ بتفتشي ورايا ليه؟ هو أنا مسجون عندك؟
كانت ترد وهي بتحاول تمسك دموعها: _ أنا مش بفتش وراك يا كريم، أنا بس كل مرة بصدقك، وكل مرة بتثبت لي إني غلطانة.
_ أهو إنتِ بنفسك بتقولي، إنتِ بتصدقي! يبقى المشكلة عندك مش عندي.
_ يعني إنت شايف إن الكدب والخيانة عادي؟
_ أنا راجل يا ندى، ومش هقعد طول عمري أحاسب نفسي على كل حاجة بعملها.
كانت تسكت، وتبص لي بنظرة عمري ما فهمتها غير متأخر.
نظرة واحدة بتقول إنها لسه بتحبني، بس كل يوم جزء من الحب ده بيموت.
لحد ما قررت أتجوز عليها.
دخلت عليها في يوم وقلت لها بكل برود: _ أنا اتجوزت يا ندى.
كانت واقفة في المطبخ، وفي إيديها طبق، أول ما سمعتني الطبق وقع واتكسر على الأرض.
بصت لي وهي مش مستوعبة: _ إنت بتقول إيه؟
_ اللي سمعتيه، اتجوزت، ودي حياتي وأنا حر فيها.
_ طب وأنا؟ أنا كنت إيه في حياتك يا كريم؟ أنا اللي وقفت جنبك لما كنت بتتعالج، وأنا اللي كنت بخاف على زعلك أكتر من زعلي، وأنا اللي كنت بداري عليك قدام الناس!
_ ما أنا مقصرتش معاكي في الأكل والشرب!
ضحكت ضحكة وجعتني بعدين، وقالت: _ الأكل والشرب يا كريم؟ هو أنا كنت شغالة عندك علشان تديني آكل وأشرب؟ أنا كنت مراتك!
قربت منها وقلت بتهديد: _ اسمعي يا ندى، أنا مش ناقص وجع دماغ. لو فكرتي تطلبي الطلاق أو تسيبي البيت، ليلى هتفضل معايا، ومش هتشوفي خيالها طول عمرك.
هنا وشها اتغير.
مسحت دموعها بسرعة، وقالت: _ ليلى؟ إنت هتدخل بنتك بينا يا كريم؟
_ أيوه، واللي هقول عليه هيتنفذ.
_ طب وأنا أعمل إيه؟
_ تتصرفي، وتقبلي الوضع، وبدل ما نكبر الموضوع، خليكي عاقلة.
ماكنتش أعرف إن الكلمة دي هتفضل ترن في ودانها سنين.
خليكي عاقلة!
يعني أجرحك، وأخونك، وأتجوز عليكي، وإنتِ المطلوب منك تبقي عاقلة!
ندى فضلت في البيت، لا طلبت الطلاق ولا عملت مشكلة كبيرة، لكنها من اليوم ده منعت نفسها عني، وبقت تعاملني بحدود شديدة.
عدى شهر ورا شهر، وأنا كنت فاكر إنها مع الوقت هتنسى، خصوصًا إني كنت غرقان في حياتي الجديدة.
وفي يوم دخلت عليها أوضة ليلى، لقيتها قاعدة جنب بنتنا وبتذاكر لها.
قلت لها: _ إيه يا ندى، هنفضل عايشين كده لحد إمتى؟
رفعت عينيها من الكتاب: _ عايشين إزاي؟
_ يعني كل واحد في أوضة، ولا كأننا متجوزين.
_ وإنت كنت فاكر إن الجواز ورقة في المحكمة وخلاص يا كريم؟ إنت كسرت حاجات جوايا مش عارف حتى تتخيلها.
_ يعني إنتِ مش ناوية ترجعي زي الأول؟
بصت لي وقالت: _ الأول ده مات من زمان.
الكلمة ضايقتني، لكن كبريائي منعني أعتذر.
وبدل ما أراجع نفسي، عملت اللي أنا شاطر فيه: هربت من المشكلة لست تانية.
واتجوزت للمرة التالتة!
أيوه، للمرة التالتة، وكأني بتحدى الدنيا كلها، وكأني ضامن إن ندى هتفضل واقفة مكانها مهما عملت فيها.
ولما عرفت، ما صرختش ولا عيطت ولا حتى واجهتني.
كل اللي عملته إنها دخلت أوضة ليلى، وقعدت معاها وقت طويل.
بعدها بأيام، بنتي جات لي وقالت: _ بابا، هو إنت ليه بتزعل ماما على طول؟
اتضايقت وقلت: _ مين قالك الكلام ده؟
_ محدش يا بابا، أنا بشوفها وهي بتعيط بالليل.
_ مامتك بتكبر المواضيع، وإنتِ ملكيش دعوة بالكلام ده.
بصت لي ببراءة وقالت: _ طب هو إنت لما بتتجوز كل مرة، بتحب مراتك الجديدة أكتر من ماما؟
اتجمدت مكاني.
مكنتش متخيل إن بنت عندها السن ده ممكن تسألني سؤال بالشكل ده.
زعقت فيها: _ عيب يا ليلى! إنتِ لسه صغيرة على الكلام ده.
جريت على أوضتها وهي بتعيط، وأنا بدل ما أروح أصالحها، خرجت من البيت.
كنت جبان، بهرب من أي مواجهة تخليني أشوف نفسي على حقيقتها.
عدت سنة ونص، وندى عايشة في البيت علشان بنتها، وأنا عايش حياتي كأنها مش موجودة.
لحد اليوم اللي كل حاجة فيه اتقلبت.
كنت بره البيت لما أخو ندى اتصل بيا، وصوته كان متوتر جدًا.
_ إنت فين يا كريم؟
_ بره، في إيه؟
_ إنت لازم تيجي المستشفى حالًا.
_ مستشفى إيه؟ مين اللي تعبان؟
سكت ثواني، وبعدها قال: _ ندى جالها جلطة، وإحنا لسه عارفين إن حالتها صعبة.
حسيت إن الأرض بتتهز من تحتي.
_ جلطة إيه؟ إنت بتهزر؟ ندى مالهاش في الكلام ده!
_ تعالى يا كريم، بدل ما تضيع وقت في الأسئلة.
وصلت المستشفى وأنا مش شايف قدامي. لقيت أخوها واقف قدام العناية المركزة، وأول ما شافني وقف في وشي.
_ إنت جاي تعمل إيه هنا؟
_ أنا جوزها، عايز أشوف مراتي!
مسكني من دراعي وقال بغضب: _ مراتك؟ إنت فاكر كلمة مراتك دي لسه ليها معنى عندها بعد كل اللي عملته؟
_ يا أخي أنا مش جاي أتشاكل، أنا عايز أطمن عليها!
_ تطمن عليها؟ كانت بتتعب قدامك كل يوم، وإنت ولا هنا! كانت بتموت بالبطيء، وإنت كل اللي شاغلك مراتك الجديدة هتلبس إيه وتخرج معاها فين!
وطى صوته، وعينيه دمعت: _ ندى عمرها ما اشتكت منك لحد. حتى لما كانت بتتكسر، كانت بتقول لي: ادعي لكريم ربنا يهديه.
حطيت إيدي على وشي وقلت: _ أنا غلطان، والله أنا غلطان.
_ الاعتراف دلوقتي مش هيرجع اللي ضاع منها.
بعد ساعات، الدكتور خرج وقال إن الجلطة أثرت على الكلام والحركة، وإن ندى محتاجة علاج طبيعي وتأهيل ومتابعة مستمرة، وإن التحسن ممكن يحصل تدريجيًا، لكن محدش يقدر يوعدنا بموعد محدد.
كنت واقف مش قادر أتكلم، لحد ما أخوها قال لي: _ هي فاقت وسألت عن بنتها، ولما عرفت إنك هنا قالت إنها مش عايزة تشوفك.
حاولت أدخل، لكنه منعني.
_ مش هتدخل لها غصب عنها يا كريم.
_ دي مراتي!
_ ولما كنت بتهددها ببنتها، كنت فاكرها إيه؟ ملك من أملاكك؟
رجعت خطوة لورا، لأول مرة في حياتي مش لاقي رد.
وبعد يومين، جت الصدمة اللي كسرت ندى أكتر.
أمها ماتت!
كانت أمها أكتر واحدة بتطمن عليها، وأكتر واحدة بتحاول تخفف عنها، ولما عرفت بخبر وفاتها وهي لسه في المستشفى، حالتها النفسية اتدهورت جدًا، وبقت حركتها أصعب، خصوصًا في رجلها.
ندى كانت بتعيط من غير صوت، وبتبص للسقف، وأخوها بيحاول يطمنها، وهي بتشاور بإيدها ناحية الباب.
كانت عايزاني أمشي.
وقفت بعيد، وكنت سامع أخوها بيقول لها: _ حقك عليا يا ندى، والله ما هسيبك، وهفضل جنبك لحد ما تقفي على رجلك تاني.
بصت له، وبعدها أشارت ناحية بنتها اللي كانت واقفة بتعيط.
وقتها فهمت إن ندى مش بتفكر في نفسها أصلًا، كل اللي شاغلها بنتها هتعيش إزاي لو هي فضلت تعبانة.
خرجت من المستشفى بعد فترة، وراحت تعيش عند أخوها، وعدى شهر ونص وأنا مش عارف أشوفها.
كنت ببعت لها رسائل، مفيش رد.
أقول لها إني ندمان، مفيش رد.
أطلب من أخوها يسمح لي أزورها، يرفض.
وفي يوم، رحت له البيت، ووقفت قدامه وقلت: _ والنبي يا أخي، خليني أشوفها خمس دقايق. مش عايز منها حاجة، أنا بس عايز أطمن عليها.
رد عليا بحدة: _ وإنت ضامن إنها عايزة تشوفك؟
_ أنا عارف إني ظلمتها، بس أنا بحبها.
_ بتحبها؟ إنت عارف إن أمها ماتت وهي في المستشفى؟ عارف إنها كل ما تشوف بنتها بتعيط، بتفتكر كل اللي حصل؟ عارف إنك بقيت آخر شخص نفسها تشوفه؟
حطيت إيدي على قلبي وقلت: _ أنا مستعد أعمل أي حاجة علشانها.
بص لي وقال: _ طيب، لو فعلًا ندمان، ابدأ من غير ما تطلب منها أي مقابل. بنتك محتاجاك، وندى محتاجة علاج ورعاية، ومش محتاجة ضغط جديد.
ومن اليوم ده، بطلت أهددها، وبطلت أقول إن ليلى هتعيش معايا غصب عنها. بدأت أتحمل مسؤولية بنتي، وأتابع مصاريف علاج ندى من غير ما أفرض عليها إنها ترجع لي.
كنت ببعت لها رسالة كل يوم، وأحيانًا كنت بكتب الكلام وأمسحه عشر مرات قبل ما أبعت.
لحد ما في ليلة، كتبت لها:
«يا ندى، أنا مش هطلب منك تسامحيني، ولا هطلب منك ترجعي لي. أنا بس عايزك تعرفي إنك كنتِ أحسن حاجة حصلت لي في حياتي، وأنا اللي ضيعتها بإيدي. لو ربنا كتب لك تقفي على رجلك تاني، أتمنى تكون أول خطوة ليكي بعيد عن الوجع اللي سببتهولك. وأنا هفضل مسؤول عن بنتنا، سواء سامحتيني أو لأ».
بعت الرسالة، وقعدت مستني أي رد.
مفيش رد.
قلت خلاص، يمكن دي النهاية.
لكن تاني يوم الصبح، أخو ندى اتصل بيا، وقال لي بصوت غريب:
_ كريم، لازم تيجي عندي النهارده، في موضوع مهم.
_ ندى حصل لها حاجة؟
_ تعالى، وهتفهم كل حاجة.
وصلت وأنا قلبي مقبوض. لقيته قاعد في الصالة، وقدامه ظرف بني، وعلى الترابيزة ملف طبي.
قلت له: _ في إيه؟ ندى كويسة؟
بص لي طويلًا، وبعدها قال: _ ندى بدأت تتحسن شوية، والدكتور قال إن العلاج الطبيعي ممكن يساعدها تستعيد جزء من حركتها تدريجيًا. بس هي طلبت مني أديك حاجة.
مد إيده ناحية الظرف.
مسكته، ولقيت عليه اسمي بخط ندى.
إيدي كانت بتترعش وأنا بفتحه.
جواه ورقة واحدة، مكتوب فيها:
«يا كريم، أنا سمعت رسالتك، وعارفة إنك ندمان، بس الندم لوحده مش بيرجع الأمان اللي راح.
أنا مش قادرة أتكلم كويس، ومش قادرة أتحرك زي الأول، لكن عقلي لسه فاكر كل حاجة.
فاكر لما كنت بتهددني بليلى، وكنت بتنام مرتاح وأنا أفضل صاحية أخاف من بكرة.
وفاكرة إني كنت كل مرة أقول لنفسي يمكن يتغير، لحد ما بقيت أنا اللي بتغير، وبقيت مش عارفة نفسي.
أنا مش همنعك عن بنتك، ومش هحرمها منك، لكن متطلبش مني أرجع لك لمجرد إنك بقيت خايف تخسرني.
أنا محتاجة أتعالج، وأتعلم أقف على رجلي، وأربي بنتي في أمان.
ولو فعلًا بتحبني، سيب لي حقي أختار حياتي من غير تهديد ولا ضغط.
أما بخصوص بنتنا، ففي حاجة لازم تعرفها قبل ما تقرر إنك فهمت كل حاجة…»
هنا الكلام وقف.
قلبت الورقة، ملقتش حاجة.
بصيت لأخوها وقلت: _ هي تقصد إيه؟ في إيه تاني؟
أخوها مد إيده للملف الطبي، وطلع منه ورقة مطوية، وقال: _ ندى طلبت مني ما أديكش الورقة دي غير لما تقرأ رسالتها للآخر. وهي قالت لي أقولك إن القرار اللي هتاخده بعد ما تعرف الحقيقة، هو اللي هيحدد إذا كان ليك مكان في حياتها بعد كده، ولا لأ.
فتحت الورقة وأنا حاسس إن نفسي بيتسحب مني.
أول سطر قريته خلاني أبص لأخوها بذهول، وأقول:
_ إيه الكلام ده؟! يعني ليلى…؟!
أخوها وقف وقال لي:
_ استنى يا كريم، لسه ما تعرفش المفاجأة الأكبر… لأن ندى كانت مخبية عنك سر بقاله سنين، والسر ده لو اتكشف، حياتكم كلكم هتتغير!
يتبع…
يا ترى إيه السر اللي ندى مخبياه عن كريم؟ وإيه علاقة ليلى بالموضوع؟ وهل كريم يستحق فرصة جديدة، ولا فيه أخطاء مينفعش الندم يصلحها؟
اكتبوا توقعاتكم في التعليقات، وقولوا لنا بصراحة: لو كنتوا مكان ندى، كنتوا هتسامحوا كريم ولا تختاروا تعيشوا في سلام بعيد عنه؟
ومتنسوش تصلوا على النبي ﷺ.
#حكاوي_شيمو
أنا طايش ومغرور وبحب الستات وكداب وخاين، وده باختصار رأي مراتي فيا، والحقيقة إن رأيها صح!
الجزء الثاني
فضلت ماسك الورقة بإيدي، وبقرأ السطور مرة واتنين، ومش قادر أستوعب اللي مكتوب قدامي.
بصيت لأخو ندى وقلت له بصوت بيترعش:
_ إيه الكلام ده؟! يعني إيه ليلى مش عارفة الحقيقة كاملة؟ وإيه السر اللي ندى مخبياه عني كل السنين دي؟
أخوها سحب نفس طويل، وقال لي:
_ اقعد يا كريم، واسمعني للآخر، ومتحاولش تقاطعني.
قعدت وأنا حاسس إن قلبي هيقف من الخوف.
قال لي: _ إنت فاكر إن ندى كانت بتستحملك علشان بتحبك وبس؟ لأ يا كريم، ندى كانت بتحاول تحافظ على بنتها من إنها تكبر وسط أب وأم كل واحد فيهم بيشدها ناحيته. إنت كنت كل ما تزعل منها تهددها بليلى، وهي كانت بتخاف إن البنت تتربى وهي حاسة إنها السبب في خراب البيت.
_ أنا عارف إني غلطت، بس إيه علاقة الكلام ده بالورقة؟
فتح الملف الطبي، وطلع منه جواب قديم، وقال:
_ قبل ما ندى تدخل المستشفى بفترة، كانت راحت لأخصائية نفسية، بناءً على نصيحة دكتور كانت بتتابع معاه. كانت تعبانة من الضغط اللي عايشاه، وخايفة على بنتها، وعايزة تعرف إزاي تحميها من المشاكل اللي بينكم.
حسيت بوجع في صدري.
_ ندى راحت لدكتور نفسي؟ وأنا معرفش؟
_ أيوه، لأنها كانت عارفة إنك لو عرفت هتقول عليها مجنونة، أو هتستخدم الموضوع ضدها زي ما كنت بتستخدم أي حاجة ضدها.
وطى عينه وكمل:
_ وفي آخر زيارة، الأخصائية نصحتها إنها تبدأ ترتب أمورها القانونية، وتعرف حقوقها وحقوق بنتها، علشان متفضلش عايشة تحت تهديدك.
قمت من مكاني وقلت بعصبية: _ يعني هي كانت بتخطط تاخد ليلى مني؟!
أخوها ضرب كفه على الترابيزة وقال: _ أهو ده اللي إنت لسه مش فاهمه! ندى عمرها ما كانت عايزة تحرمك من بنتك، هي كانت عايزة تحميها من استخدامك ليها كس\لاح في كل خناقة.
سكت، لأني مكنتش لاقي رد.
وبعدين سألته: _ طب هي كاتبة إيه في آخر الورقة؟ وإيه حكاية السر؟
مد لي ورقة تانية.
كانت مكتوبة بخط ندى، وفيها كلام خلاني أحس إني معرفش الست اللي عشت معاها السنين دي كلها.
«يا كريم، فيه حاجة عمري ما حكيتها لك، مش علشان أخدعك، لكن علشان كنت مستنية الوقت المناسب.
فاكر لما كنت بتتعالج علشان تخلف، وكنت بتنهار كل مرة الدكتور يقول إن الموضوع محتاج وقت؟
أنا كنت عارفة إنك موجوع، وكنت بخاف عليك من نظرات الناس وكلامهم، وكنت بقول لك إن ربنا هيكرمنا.
بس الحقيقة إنك في وقت من الأوقات كنت قربت تفقد الأمل، وكنت بتفكر توقف العلاج، وأنا اللي أصريت نكمل.
ولما ربنا رزقنا بليلى، كنت فاكرة إنك هتتغير، وإن إحساسك بالأبوة هيخليك تحافظ على بيتك.
لكن اللي حصل كان العكس.
كنت كل ما أفتكر تعبك القديم، أقول لنفسي: استحملي، ده أبو بنتك، واللي شفته معاه من وجع العلاج يستاهل إني أحافظ على بيتي.
لحد ما اكتشفت إني بحافظ على بيت من طرف واحد.
أنا مش بقول الكلام ده علشان أعايرك، لكن علشان تعرف إن اللي وقف جنبك وقت ضعفك، هو نفسه اللي إنت كسرته وقت قوتك».
خلصت القراءة، وحطيت الورقة على الترابيزة، وفضلت باصص قدامي.
أنا كنت فاكر إن ندى فضلت معايا علشان ضعيفة، وإنها مش هتعرف تعيش من غيري.
لكن الحقيقة إنها كانت قوية، وأنا اللي استغليت حبها وخوفها على بنتها.
سألت أخوها: _ طيب، هي عايزة مني إيه دلوقتي؟
رد: _ هي عايزة تعيش في أمان، وتتعالج، وبنتها تفضل قريبة منها. ولو إنت فعلًا ندمان، أثبت ده بأفعالك، مش بكلامك.
قمت وقلت له: _ أنا عايز أشوفها، حتى لو من بعيد.
هز راسه وقال: _ هسألها، ولو وافقت هبلغك. لكن مش هضغط عليها علشان خاطرك.
خرجت من عنده، وأنا لأول مرة أحس إن كلمة «جوزها» مش كفاية علشان تضمن لي مكان في حياتها.
عدى يومين، وأخو ندى اتصل بيا.
_ ندى وافقت إنك تيجي تشوفها، بس عندها شروط.
_ أي شروط، أنا موافق على كل حاجة.
_ متوعدهاش بوعود كبيرة، ومتطلبش منها ترجع، ومتفتحش موضوع الطلاق أو الجواز تاني. هي لسه بتتعافى، وأي ضغط عليها ممكن يتعبها.
_ حاضر، والله حاضر.
روحت البيت وأنا متوتر.
