وايات_مشيره_محمدبصيت للشرط التامن، وبعدها رفعت عيني لعمر اللي كان قاعد قدامي بكل ثقة، كأنه مش بيطلب مني أتجوزه، ده كأنه بيطلب مني أمضي على عقد بيع نفسي فيه. قلتله بهدوء: — خلصت؟ابتسم ابتسامة صغيرة وقال: — أيوه، بس طبعًا دي مجرد شروط لتنظيم حياتنا.
أنا مش عايزك تفهمي الموضوع غلط، يا حبيبتي. بصيت للورقة تاني، وقلّبتها على ضهرها، يمكن ألاقي شرط تاسع بيقول إني لازم أتنفس بإذنه!قلتله: — عمر، إنت كاتب هنا إن لو أنا مت قبلك، كل ميراثي يروح لك إنت، وأهلي ماياخدوش جنيه. طب لو إنت مت قبلي؟
اتعدل في قعدته وقال بمنتهى البرود: — دي حاجة تانية، نتكلم فيها وقتها. ضحكت ضحكة قصيرة من غير نفس.— يعني لو أنا عشت معاك، فلوسي ليك، ومرتبي ليك، والعقارات باسمك، ولو اتطلقنا أتنازل عن حقي، ولو مت قبلك تورثني وتمنع أهلي من الميراث.
.. لكن لو إنت اللي مت، نتكلم وقتها؟هز كتفه وقال: — هو إنتِ ليه مكبرة الموضوع؟ ما إحنا هنتجوز ونعيش مع بعض العمر كله، إن شاء الله. إنتِ ناوية على الطلاق من دلوقتي ليه؟سألته وأنا لسه باصة في عينيه: — وإنت ناوي على إيه يا عمر؟
وشه اتغير للحظة، لكنه رجع ابتسم بسرعة.— أنا راجل عملي، وبحب أكون ضامن مستقبلي. وبعدين إنتِ بنت ناس، وأكيد مش هتزعلي من جوزك لما يحاول يحافظ على بيته. في اللحظة دي، موبايلي نور تاني. رسالة من بابا.«يا بنتي، الفلوس وصلتك؟
دي حاجة بسيطة من اللي قدرت أوفرهولك. كنت أتمنى أكون جنبك النهارده، بس إنتِ عارفة ظروف الشغل. ربنا يرضي عنك ويسعدك يا حبيبتي.»
قلبي وجعني. بابا قضى عمره كله يشتغل ويتعب علشان يوفر لنا حياة كويسة.
بعد وفاة ماما، كان بيحاول يعوضني عن كل حاجة، حتى لما كنت بقوله إني مش محتاجة حاجة. المليون جنيه دول ماكانوش مجرد فلوس. دول تعب سنين، وعرق، وحرمان، وحب أب خايف على بنته من الدنيا.
وعمر، اللي المفروض يكون شريك حياتي، كان مستني مني أحوّلهم لحسابه بعد شهر واحد من الجواز!قفلت الموبايل، ورفعت عيني ليه.— عمر، إنت عارف أنا ليه وافقت أتجوزك؟ابتسم وقال: — علشان بتحبيني. هزيت راسي ببطء.— كنت بحبك فعلًا. اختفت ابتسامته.— كنتِ؟— أيوه، كنت.
لأن الراجل اللي بيحب واحدة، مش بيطلب منها تسلمه مفاتيح حياتها قبل ما يدخل معاها بيت واحد. قرب مني وقال بصوت واطي: — اهدي، الناس بتبص علينا. بصيت حواليّا. ناس كتير فعلًا كانت بتبص، خصوصًا إن صوتنا بدأ يعلى شوية.
رجعت بصيتله وقلت: — كويس إن الناس بتبص. يمكن حد منهم يشهد إني كنت هتجوز راجل طالب مني أمضي على ورقة بالشكل ده. خ. طف الورقة من فوق الكرسي، وبدأ يطويها بعصبية.— إنتِ بتفضحيني يا سارة؟!كانت دي أول مرة من ساعة ما قعدنا يناديني باسمي بالشكل ده.
قلتله: — أنا اللي بفضحك؟ مش إنت اللي جايب ورقة فيها تمن شروط علشان تضمن إنك تاخد كل حاجة مني؟رد بعصبية: — أنا ماجبرتكش على حاجة! مش عاجبك، خلاص!سكت لحظة، وبعدين مال ناحيتي وقال بنبرة تهديد مغلفة بالهدوء:
— بس خلي بالك، أنا مش بحب حد يرجع في كلامه.
إنتِ عارفة إني اتكلمت مع أهلي، وكل الناس عارفة إننا هنسجل النهارده. بصيتله طويلًا.— ودي مشكلتك يا عمر، إنك فاكر إن كلام الناس أهم من حياتي. وقفت من مكاني. لكنه مسك إيدي.— اقعدي، إنتِ هتعملي إيه؟بصيت على إيده اللي ماسكة رسغي.— سيب إيدي.
— سارة، أنا بقولك اقعدي!سحبت إيدي بقوة ووقفت قدامه.— وأنا بقولك سيب إيدي. إحنا لسه ما اتجوزناش، ودي آخر مرة تسمح لنفسك إنك تمسكني بالطريقة دي. لثواني، فضلت عينيه معلقة بيا، وكأنه مش مصدق إن البنت اللي كانت بتوافقه على كل حاجة، بقت بتكلمه بالطريقة دي.
وبعدين قال الجملة اللي كشفت لي كل حاجة.— إنتِ فاكرة نفسك مين؟ علشان أبوكي بعتلك مليون جنيه، بقيتي شايفة نفسك عليّا؟!اتجمدت مكاني. مش علشان اتعصبت، لكن علشان فهمت فجأة إن المليون جنيه هما اللي كانوا شاغلين باله من أول ما عرف إن بابا ناوي يساعدني.
قلتله: — إنت كنت عارف إن بابا هيبعتلي فلوس النهارده؟ارتبك.— مش موضوعنا.— لأ، ده موضوعنا. إنت عرفت منين؟بص بعيد وقال: — مش فاكر. طلعت موبايلي، وفتحت المحادثة القديمة اللي بيني وبين بابا. قبل أسبوع، كنت حكيت لعمر إن بابا ناوي يديني هدية الجواز، لكني ما قلتلوش المبلغ.
المبلغ ما اتذكرش قدامه أبدًا. رفعت عيني ليه.— أنا عمري ما قلتلك إن بابا هيبعتلي مليون جنيه. إنت عرفت الرقم منين؟وشه شحب للحظة. وبعدين قال: — إنتِ هتعملي تحقيق معايا؟!ما رديتش. لأني في اللحظة دي، كان فيه احتمال بدأ يتشكل في دماغي، واحتمال كنت بتمنى أكون غلطانة فيه.
فتحت تطبيق البنك تاني، وبصيت على تفاصيل التحويل. اسم المرسل: والدي. التوقيت: من عشر دقايق. وتحت الإشعار، لقيت رسالة تانية من رقم مش مسجل عندي. فتحتها. كانت صورة للورقة نفسها. نفس الشروط التمانية. وتحتها رسالة قصيرة:
«لو وافقتي تمضي على الكلام ده، اسألي خطيبك الأول هو ليه طلب نسخة من كشف حسابك البنكي من المكتب اللي بتشتغلي فيه.»
حسيت إن الأرض بتتحرك من تحتي. رفعت عيني لعمر، وقلت: — إنت طلبت كشف حسابي من شغلي؟
حاول يضحك، لكن ضحكته طلعت مصطنعة.— مين اللي بعتلك الكلام ده؟ دي أكيد واحدة بتحاول تبوظ الجوازة.— جاوبني يا عمر.— أنا كنت بسأل عن دخلك علشان نعرف ننظم مصاريف البيت!— وتحتاج كشف حسابي البنكي ليه؟!سكت. ولأول مرة من ساعة ما عرفته، شفت الخوف الحقيقي في عينيه.
مش خوف إنه يخسرني. خوف إن حاجة كنت مخبية عنه، أو بالأصح حاجة هو كان بيحاول يخبيها عني، بدأت تظهر. في اللحظة دي، رن موبايلي. بابا بيتصل. رديت وأنا عيني على عمر.— أيوه يا بابا.
صوته جه من الناحية التانية هادي، لكن أول ما سمع صوتي، عرف إن فيه حاجة غلط.— مالك يا سارة؟ إنتِ بتعيطي؟ما كنتش واخدة بالي إن عيني اتملت دموع. قلتله: — لأ يا بابا، بس محتاجة أسألك سؤال.— اسألي يا حبيبتي.— إنت تعرف عمر شريف كويس؟
سكت بابا ثانيتين. ثانيتين بس، لكنهم كانوا كفاية يخلوا قلبي يدق بعنف. وبعدين قال: — إنتِ فين دلوقتي يا سارة؟— في مكتب تسجيل الجواز. سمعته بياخد نفس عميق.— اسمعيني كويس، ما تمضيش على أي ورقة، وما تحوّليش له أي فلوس. أنا جاي لك. بصيت لعمر، اللي كان بيحاول يسمع المكالمة.
