مصطفى بعد ما اتفق مع جهاد إن الجواز يبقى حقيقي حس إنه شال جبل من على صدره. كان كل يوم بيحس إنه بيخون حبه ليها عشان مينفعش يقولها وهو متجوزها صوري. وجهاد نفس الحكاية كانت كل ما تشوفه بيضحك مع عماد قلبها يدق وتقول لنفسها: يا بت اتلمي، ده جوزك على الورق بس. لحد ما الحقيقة طلعت. وفي ليلة الفرح الصغير جهاد لبست فستان أبيض بسيط كانت سميرة جايباه ليها، ومصطفى لبس قميص أبيض وعماد كان مبسوط وبيسقف، وسميرة عملت صينية بسبوسة وجات الجيران تبارك. مفيش دي جي ولا رقص، بس كان فيه فرحة مالية البيت أحسن من ألف فرح كبير.
ميادة في الوقت ده كانت قاعدة في اوضتها بتعيط لوحدها. عرفت إنها خسرت الاتنين، خسرت صاحبتها وخسرت الراجل اللي بتحبه، وفضلت أيام مش بتخرج ولا بترد على حد، لحد ما مامتها قالت لها: فوقي لنفسك يا ميادة، الحب مش بالعافية وربنا هيعوضك بواحد يحبك بجد. وميادة بدأت تفوق وتعرف إن اللي عملته كان غلط كبير، وإن الغيرة أكلت قلبها وخلتها تعمل حاجات عمرها ما كانت تتخيلها، وقررت تبعد وتسافر عند خالتها في اسكندرية شهرين تغير جو.
مصطفى وجهاد بدأوا حياتهم من جديد. بقوا يصحوا سوا ويشربوا الشاي بلبن الصبح ويفطروا سوا. مصطفى بقى ياخد جهاد معاه يشتروا بضاعة للمحل، وجهاد بقت تساعده في الحسابات عشان هي شاطرة في الحساب. وعماد دخل حضانة كويسة ومصطفى هو اللي بيوديه ويجيبه كل يوم ويقعد يذاكرله الحروف. وكل يوم قبل ما ينام يحكي له حدوتة عن بطل اسمه عواد كان طيب وشجاع، عشان الواد يفضل فاكر أبوه الحقيقي ويعرف إن أبوه الحقيقي كان راجل جدع. وجهاد لما كانت بتسمعه بيحكي كده كانت بتعيط من جوه بس بتبقى مبسوطة إن ابنها هيكبر عارف قيمة أبوه وقيمة الراجل اللي رباه.
والحياة مشيت. مصطفى بقى أب بجد مش كلام، وجهاد بقت زوجة بتحب جوزها بجد وبتخاف عليه. وكل ما حد يسألهم اتجوزتوا إزاي، يضحكوا ويقولوا: دي حكاية طويلة، حكاية وصية وورث وقلب اتعلق بقلب. وعواد بقى ذكرى حلوة في قلوبهم بيزوروه كل جمعة وياخدوا عماد معاهم يقرا الفاتحة لأبوه.
وربنا عوضهم خير بعد الصبر والوجع، وعماد كبر وهو شايف قدامه اتنين رجالة: واحد في السماء وواحد شايله على الأرض بيحبه. والحمد لله ربنا كريم وبيجبر بخاطر الطيبين دايماً.
