قررت أختبر خطيبي بوزة بلدي بدل الورد ج 1 حكـايات مني السيد

البابين الكبار بتوع القاعة اتفتحوا على مصراعيهم. صوت أغنية الزفة اشتغل بهدير عالي، الدخان الأبيض غطى الأرضية، والأنوار كلها اتسلطت علينا وإحنا داخلين ماسكين إيد بعض. المعازيم وقفوا يسقفوا، ومدام ميرفت كانت واقفة في أول الصف بتزغرد بفخر.

مشينا على السجادة الحمرا، وهشام فارد صدره وبيشاور للناس بابتسامة النصر. وصلنا لحد الكوشة، وقفنا قدام الناس عشان المصور ياخد اللقطة الأولى. المصور رفع الكاميرا وقال: “ابتسامة حلوة بقى يا عريس.. ابتسامة يا عروسة!”

في اللحظة دي بالظبط، سحبت إيدي من إيد هشام بعنف.

هشام اتلخبط وبصلي باستغراب وهو لسه راسم الابتسامة على وشه: “في إيه يا ندى؟ مسكتي إيدك ليه؟ الناس بتبص علينا!”

مسكت المايك اللاسلكي اللي كان محطوط على ترابيزة الكوشة جنب بوكيه الورد، وقربته من شفايفي. رفعت صوتي في المايك، الصوت رن في كل ركن في القاعة وسكت الدي جي تماماً:

“مساء الخير على كل المعازيم الكرام اللي شرفونا الليلة.. نورتوا فرح ابن الأكابر هشام المنياوي!”

القاعة كلها سكتت، الناس استغربت إن العروسة هي اللي ماسكة المايك وبتتكلم بالطريقة دي في أول الزفة. مدام ميرفت وشها بدأ يتغير وخطت خطوة لقدام بقلق، وهشام عينه برقت وهمسلي بغيظ وهو بيحاول يشد المايك من إيدي: “إنتِ بتعملي إيه يا مجنونة؟! هاتي المايك ده انزلي من هنا وبطلي فضايح!”

زقيته بإيدي بقوة خلت كعبه يرجع لورا خطوتين ويخبط في الكوشة، وقولت في المايك بصوت أعلى وأقوى هز أركان الصالة: “اثبت مكانك يا هشام! متتحركش خطوة واحدة.. عشان الناس اللي جاية تبارك لك الليلة دي، لازم تعرف هي بتبارك لمين بالظبط.. بتبارك للمقاول المحترم، ولا للشخص اللي داخل يسرق يتيمة ويهرب بفلوسها؟!”

القاعة اتقلبت، همهمات وصدمة بين المعازيم، ومدام ميرفت صرخت: “إنتِ اتهبلتي يا شحاتة؟! أمن! طلعوا البنت دي برة الفندق!”

لكن قبل ما الأمن يتحرك خطوة واحدة، باب القاعة اتفتح على آخره، ودخل الحاج وفيق الشربيني، وجنبه راجل طويل عريض، شعره أبيض وشكله يقطع الخلف من الهيبة والصرامة.. اللواء رؤوف المنشاوي، وفي إيده بنته نيرمين اللي كانت منهارة في العياط!

هشام أول ما شاف اللواء رؤوف ونيرمين داخلين، وشه بهت تماماً، بقى شبه لوح التلج، ركبه خبطت في بعضها والبوكيه وقع من إيده على الأرض.

بصيت لهشام اللي كان بيبلع ريقه بصعوبة، وشاورت عليه قدام الكل: “الفرح ده مكانش عشاني يا حضرات.. الفرح ده كان معمولي عشان أكون ستار يغطي بيه تصرفاته. التوكيل اللي حيلتك يا هشام، التوكيل اللي جريت تاخد بيه نص مليون عربون من الحاج وفيق، حبر على ورق! التوكيل باطل وميسواش تمن الورقة اللي انطبع عليها!”

طلعت من بوكيه الورد بتاعي نسخة من إخطار الشهر العقاري ورميتها في وشه: “أرض ستي متتباعش لا بيك ولا بأشكالك! وأرض أوسيم اللي كنت فاكر إنك هتبني عليها مجدك، هتفضل باسمي وباسم أهلي!”

هشام صرخ بهستيريا وهو بيبص للواء رؤوف اللي كان بيقرب منه بخطوات بطيئة: “كدابة! والله العظيم كدابة! يا سيادة اللواء دي واحدة نصابة عايزة تبتزني، نيرمين.. قولي لباباكي الحقيقة!”

نيرمين رفعت راسها ودموعها نازلة وقالت بصوت مسموع قدام الكل: “أنا قولتله الحقيقة كلها يا هشام.. قولتله على الجواز العرفي، وعلى رسايلك اللي بتهددني بيها.. قولتله على كل حاجة!”

اللواء رؤوف وصل قدام الكوشة، وقف قدام هشام، وفي ثانية واحدة، صوت كف نزل على وش هشام رن في الميكروفونات والصالة كأنه طلقة رصاص! هشام وقع على ركبه من قوة الضربة ومسك خده وهو بينهج ومش قادر ينطق.

اللواء رؤوف بص له باحتقار وبصوت زي الرعد: “كنت فاكر نفسك ذكي وهتلعب ببنتي وبشرف بيتي يا حتة صايع؟ ورقة الجواز العرفي دي هتتحول لقضية قانونية، ده غير تلات سنين سجن في الشيكات اللي الحاج وفيق مقدمها للنيابة دلوقتي حالاً.. البوكس مستنيك برة باب الفندق يا هشام، وهتدفع تمن كل دقيقة وجع سببتها للناس.”

مدام ميرفت جريت على ابنها ووقعت على الأرض جنبه تصوت: “ابني! ضيعتونا يا عالم يا ظلمة!”

ضحكت في المايك بأعلى صوتي، ضحكة خلت كل المعازيم يسكتوا ويبصولي: “ابنك اللي افتكرتيني جاية من بيئة أدنى منها يا مدام ميرفت.. كان أسوأ نموذج للتربية اللي قايمة على الفشخرة الكدابة والديون!”

رميت المايك على الأرض، ورفعت ديل فستاني الأبيض لفوق عشان ميتوسخش من التراب. نزلت من على الكوشة بخطوات ثابتة وراسي مرفوعة للسما، عديت من وسط المعازيم اللي كانوا واقفين فاتحين بوقهم من الصدمة، ومحدش قدر ينطق بحرف.

وصلت عند باب القاعة، لقيت سعيد مستنيني بابتسامة فخر عريضة، ومعاه تاكسي واقف على باب الفندق برة.

قلعت الطرحة من على راسي ورميتها على ترابيزة الاستقبال، وبصيت لسعيد: “يلا يا سعيد.. روحني على أوسيم.”

“الفستان الأبيض هتعملي فيه إيه يا عروسة؟”

بصيت للفستان وضحكت من قلبي لأول مرة من سنين: “الفستان ده هروح بيه الجنينة، هقعد بيه تحت شجر البرتقال اللي ستي زرعته، عشان الأرض تفرح إن حفيدتها عرفت تحميها بحق.”
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”