الحركة دي، حركة قفلة السكة في وش نادية الشناوي، كانت بالنسبة للعيلة دي من الكبائر اللي تستوجب حد الردة. نادية
ست عاشت حياتها كلها بعد وفاة حمايا بتمشي الكل على عجين ميتلخبطش. بنَت لنفسها هيبة من ورق؛ شكل من برة مظبوط على الفرازة، فساتين كلاسيك، عقد لولي صناعي بس نضيف، وطريقة كلام مقتبسة من مسلسلات التمانينات عن ولاد الذوات، مع إن حقيقتها كانت مجرد ست مديونة لحد شوشتها بتعتمد على ابنها البكراني اللي بيبيع كلام، وعلى ابني التاني اللي لقيته غنيمة لما اتجوز مهندسة ديكور ناجحة وعندها شركتها الخاصة وبتكسب دهب.
رميت الموبايل على الكنبة الجلد، ولسه ملحقتش أتنفس، لقيت التليفون بيزن تاني، وتالت، ورابع.
نادية كملت رن. مردتش. بعدها بدقيقة كريم يتصل بك.
أهو جه المحترم، سي السيد اللي دمه كان ميت ومشاعر رجولته اتبخرت وهو شايف أمه بتهيني قدام أخوه ومرات أخوه، ودلوقتي الدم فار في عروقه فجأة لما البنك قفل عليه الحنفية.
فتحت الخط وفتحت السبيكر، وسبته يرغي وأنا باخد بؤ قهوة سخن.
مريم! إنتِ مبترديش على أمي ليه؟ هي كلمتني بتعيط ومنهارة والضغط علي عليها! إنتِ إزاي تتجرأي تلغي التحويلات دي من ورا ضهري؟ وعملتي إيه في كارت البنك بتاعي؟! أنا كنت واقف في البنزينة دلوقتي بحاسب، الكارت اترفض قدام العمال والناس في المحطة! انتِ بتهزريني في الشارع يا مريم؟!
ضحكت من غير
ما أداري صوتي. ضحكة قصيرة كده طلعت من مناخيري قبل لساني.
بتهزر في الشارع؟ معلش يا كيمو، أصل كارتك كان معمول له سداد تلقائي من حساب شركتي، وأنا قولت حرام أخليك متفضل عليا وفلوسي الحرام اللي ملهاش لازمة تدخل جيبك النضيف. مش أنا اتأخرت عليكم أول إمبارح في الشغل عشان كنت بلم مصاريف العزومة دي؟ مش أنا اللي ملكيش ميزانية عندي؟ ادفع بقى من جيبك.
إنتِ فاكرة نفسك مين؟! صوته علّى لدرجة السماعة خروشت إنتِ اتفرعنتي خلاص عشان قرشين معاكي؟ أنا جوزك يا هانم! الفلوس اللي بتعمليها دي كلها أنا ليا حق فيها، والبيت ده أنا راجله! افتحي الكروت حالا وحولي قسط الشقة قبل ما أجيلك الزمالك وأكسر الشقة دي على دماغك!
تنور يا حبيبي، بس متنساش تدفع حق البنزين كاش، عشان لو جيت بالعربية هتفضل محبوسة في الجراج لو ملكش رصيد قولتله بهدوء تام خلاه يتجنن أكتر ولو جيت هنا، أمن العمارة معاه تعليمات واضحة، ورقمك ورقم عربيتك ممنوعين من دخول الجراج أو طلوع الأسانسير. ومفتاح شقتي اللي كان معاك اتغير الكالون بتاعه من إمبارح العصر.
مريم إنتِ بتطلبي الطلاق على فكرة؟ إنتِ بتهدي بيتك؟ بيتي؟ هو كان فيه بيت عشان يتهد يا كريم؟ إنت كنت معتبرني بنك استثماري بعائد مجاني، لا بتصرف عليا
جنيه، ولا حتى بتعرف تصون كرامتي بربع كلمة قدام أهلك. الطلاق ده أقل حاجة هتحصل، بس لما أخلص تصفية حساباتي، قرش قرش. سلام يا سيادة المدير.
قفلت، وعملت لرقم كريم ورقم أمه بلوك. الراحة النفسية اللي حسيت بيها في الدقيقة دي كانت كفيلة تغسل قرف أربع سنين جواز. كنت غبية، والاعتراف بالحق فضيلة. لما اتجوزت كريم، كنت معجبة بيه؛ مهندس شيك، بيعرف يتكلم حلو، لابس نضارة طبية بتديله شكل وِقار وثقافة، وأول ما اتقدملي قالي إنه راجل بيحترم شغل الست ونجاحها. كنت فاكرة ده نضج ووعي، بس مع الوقت اكتشفت إنه مكنش نضج، كان استنطاع واستغلال؛ لقى واحدة ناجحة، شاطرة، بتعمل ملايين من تصميم المقرات الإدارية والفيلات، قال يريح رجليه ويستمتع بالحياة على قفاها.
لبست بدلتي الشيك، بنطلون كحلي وجاكيت أوفر سايز، وخدت شنطتي ونزلت على شركتي في التجمع.
أول ما دخلت الشركة، كانت الساعة بقت عشرة. السكرتيرة بصتلي بتوتر خفيف بشمهندسة مريم، أستاذ هاني المحاسب مستني حضرتك من بدري في المكتب، وقالي أول ما توصلي أبلغه فوراً. تمام يا شيرين، خليه يدخل وهاتيلي شاي بنعناع.
دخلت مكتبي، ريحة الخشب الطبيعي والتكييف البارد كانت بتديني دايماً إحساس بالأمان. بعد دقيقتين بالظبط، الباب خبط
ودخل هاني. هاني ده مش
مجرد محاسب للشركة، هاني شغال معايا من أول ما فتحت المكتب، راجل في الخمسينات من عمره، أمين جداً وعينه فاحصة، وبيني وبينه عِشرة وثقة عميا.
قفل الباب وراه كويس، وكان شايل في إيده دوسيه كرتون تقيل لونه أزرق غامق، وشه كان مخطوف وفيه لمعة توتر غريبة.
صباح الخير يا بشمهندسة. صباح الفل يا هاني، طمني، لغيت كل التحويلات زي ما طلبت إمبارح؟ لغيتها كلها من الفجر يا فندم، كل حسابات الدفع التلقائي اتقفلت، حتى الخطوط الأرضية والإنترنت اللي باسم مدام نادية والشقة التانية اتلغت. بس في حاجة تانية أهم بكتير لازم تشوفيها.
قعد على الكرسي اللي قدامي، وحط الدوسيه الأزرق على المكتب، وزقه نحيتي بهدوء غريب.
إيه ده؟ سألته وأنا بمد إيدي ناحية الملف. حضرتك إمبارح طلبتي مني تقرير شامل بحركة الحسابات الشخصية اللي كانت مربوطة بكروت وحسابات أستاذ كريم ووالدته خلال السنتين اللي فاتوا، عشان التصفية. تمام، وده التقرير؟ ده التقرير، بس معاه حاجات تانية أنا اكتشفتها بالصدفة لما دخلت أطابق السحوبات بكشوف الحساب بتاعة البنك الأهلي وبنك مصر وبنك ال CIB اللي كان مفتوح فيهم اعتمادات بضمان شهادات حضرتك. رفعت عيني وبصيتله باهتمام لقيت إيه يا هاني؟ اتكلم دغري.
