يوم فرحي عشان أصرت تركب معانا العربية، وانا كنت رافضه لانى اختى كانت معايا طول اليوم وهى اللى المفروض تركب معايا ولما اشتكيت لجوزي بدل ما يدافع عني ضربني هو كمان وقالّي: اسمعي كلام أختي!
ساعتها وقعت على الأرض وطلبت بابا وعمامي، وقررت أسيب الفرح وأرجع بيت أهلي قبل ما أدخل بيت جوزي.
بس اللي حصل بعد كده، واللي عملته عيلة العريس عشان يرجعوني، كان أكبر بكتير من اللى حصل
أنا ملك، عندي 26 سنة، عمري ما تخيلت إن اليوم اللي كنت بستناه من سنين، واللي كنت بحسب له كل تفصيلة، هيبقى أسوأ يوم في حياتي.
أنا وأدهم كنا مخطوبين بقالنا سنة، وكنا كاتبين الكتاب من كام يوم، والفرح كان متحدد يوم الخميس.
أدهم كان بالنسبالي شاب محترم، شغال في شركة، وعنده شقته، وكنت فاكرة إننا هنبدأ حياتنا بهدوء ونبني بيتنا مع بعض.
بس كان فيه شخص واحد وجوده في حياتنا كان مسببلي مشاكل من أول يوم.
أخته داليا!
داليا كانت متجوزة وعندها بيتها وجوزها وعيالها، لكن الغريب إنها كانت عايشة في تفاصيل حياتنا أكتر مني أنا وأدهم.
من أول ما اتخطبنا وهي بتتدخل في كل حاجة.
اختارت لون الدهانات، واعترضت على لون غرفة النوم، وكانت عايزة تغير شكل المطبخ، وحتى العفش اللي أنا وأدهم اخترناه سوا، كانت بتطلع فيه عيوب.
وكل ما أعترض أو أقول رأيي، أدهم يقولي:
ـ معلش يا ملك، دي أختي الكبيرة، وبتحب مصلحتي، اسمعي كلامها.
كنت بسكت وأقول لنفسي: معلش، دي فترة وهتعدي، ولما نتجوز كل واحد هيبقى في بيته.
لكن اللي ماكنتش أعرفه إن داليا مش ناوية تسيب أخوها يعيش حياته من غير ما تكون هي صاحبة الكلمة الأولى والأخيرة.
وجاء يوم الفرح.
كنت في الكوافير، وفرحانة، وكل شوية أبص في المراية وأبتسم، وأقول لنفسي أخيرًا اليوم اللي حلمت بيه جه.
لبست الفستان، وعملت شعري، وخرجت مع أهلي على القاعة.
وبعد ما خلصنا التصوير، جه وقت زفة العربية.
العريس والعروسة بيركبوا ورا جنب بعض، وفي العادة بيكون معاهم أخت العروسة أو واحدة من صاحباتها.
وأنا كنت متفقة مع أختي مريم إنها تركب معانا.
لكن أول ما خرجنا من القاعة، لقيت داليا جاية بسرعة وبتقول:
ـ استنوا، أنا هركب معاكم.
بصيت لها باستغراب وقلت:
ـ معلش يا داليا، أنا متفقة مع مريم تركب معانا.
بصتلي وقالت بحدة:
ـ وإيه يعني؟ أنا أخت العريس، ومش هينفع أخويا يعمل زفة وأنا مش معاه!
قلت لها بهدوء:
ـ يا حبيبتي إنتِ متجوزة، ومريم أختي، وهي اللي هتركب معايا.
اتغير وشها وقالت:
ـ إنتِ بتقولي إيه؟! يعني أنا أخت جوزك ومليش مكان، وأختك هي اللي ليها مكان؟
أدهم كان واقف وسامع كل الكلام، وأنا كنت مستنية منه يتدخل وينهي الموقف.
لكنه فضل ساكت.
داليا قربت مني وقالت:
ـ إنتِ من أول يوم بتعملي مشاكل، هو أخويا كان ناقصه إيه قبل ما يعرفك؟
رديت عليها وقلت:
ـ أنا مش بعمل مشاكل، أنا بس عايزة أختي تركب معايا زي ما اتفقنا.
وفجأة…
لقيت إيدها نازلة على وشي بالقلم!
اتجمدت مكاني، وحطيت إيدي على خدي، وبصيت لها وأنا مش مصدقة اللي حصل.
الناس كلها سكتت، ومريم جريت عليا، وأنا عيني راحت على أدهم.
كنت مستنية أشوف هيعمل إيه بعد ما شاف أخته بتمد إيدها عليا.
قربت منه وقلت وأنا بعيط:
ـ أدهم، أختك ضربتني! إنت شوفت اللي حصل؟!
بصلي بعصبية وقال:
ـ وإنتِ ليه مش بتسمعي كلامها؟!
افتكرت إنه بيهزر، أو إنه مش مستوعب الموقف.
لكن اللي حصل بعد كده كان صدمة عمري.
رفع إيده وضربني بالقلم هو كمان!
وقال بصوت عالي قدام الناس كلها:
ـ لما أقولك اسمعي كلام أختي، تسمعي كلامها! داليا دي أختي الكبيرة، ومش هسمحلك تعلي صوتك عليها!
في اللحظة دي حسيت إن الدنيا بتلف بيا.
ده أدهم!
الراجل اللي أنا لسه كاتبة كتابي عليه من كام يوم، واللي المفروض يكون سندي وأماني، هو بنفسه اللي مد إيده عليا يوم فرحي!
رجعت خطوتين لورا، وبعدين رجلي ماقدرتش تشيلني، وقعدت على الأرض وسط الناس.
وبقيت أعيط من قلبي وأقول:
ـ أنا عايزة بابا… عايزة بابا وعمامي وخوالي… أنا مش هتجوز! أنا مش داخلة بيت الراجل ده!
أدهم حاول يقرب مني وقال:
ـ ملك، قومي بلاش فضايح، الناس بتتفرج علينا!
بصيت له وقلت:
ـ فضايح؟! إنت شايف إن اللي حصل ده فضيحة؟! طب وإيدك اللي اتمدت عليا دي اسمها إيه؟!
داليا وقفت جنبه وقالت:
ـ ما هي لو كانت سمعت الكلام من الأول، مكنش حصل كل ده!
بصيت لها وسط دموعي وقلت:
ـ إنتِ ضربتيني، وهو كمان ضربني، وإنتوا الاتنين فاكرين إني هدخل بيتكم بعد اللي حصل ده؟!
وبعدها بصيت لأختي وقلت لها:
ـ كلمي بابا… أنا عايزة بابا ييجي ياخدني.
أختي مريم مسكت إيدي وهي بتعيط، وحاولت تقومني من على الأرض، لكن أنا كنت حاسة إن رجلي مش شيلاني.
مش قادرة أستوعب إن ده حصل معايا، وإن الشخص اللي المفروض يكون جوزي وسندي هو أول واحد يمد إيده عليا.
مريم طلعت موبايلها وكلمت بابا.
ـ ألو يا بابا… تعالى بسرعة، ملك مش كويسة، وحصلت مشكلة كبيرة.
بابا اتخض وقالها: ـ مالها ملك؟ حصل إيه؟!
مريم بصتلي ودموعها نازلة وقالت: ـ أدهم ضربها يا بابا… وأخته كمان ضربتها!
سمعت بابا بيقول بصوت عالي: ـ إيه؟! ضربها مين؟!
مريم حكتله اللي حصل بسرعة، وقفل معاها وقال إنه جاي هو وعمامي وخوالي.
في الوقت ده، أدهم كان واقف قدامي وبيحاول يمد إيده عشان يقومني.
قال: ـ ملك، قومي بقى، كفاية اللي عملتيه ده، إحنا مش ناقصين فضايح.
شيلت إيده عني وقلت: ـ إوعى تلمسني!
قال بعصبية: ـ إنتِ هتفضلي تعاندي لحد إمتى؟ داليا أختي، وكان المفروض تحترميها وتسيبيها تركب العربية.
بصيتله بصدمة وقلت: ـ يعني أنا اللي غلطانة؟! هي تضربني وإنت تضربني، وفي الآخر أنا اللي غلطانة؟!
داليا دخلت في الكلام وقالت: ـ بص يا أدهم، أنا من الأول قولتلك البنت دي مش هتريحك، ولسه على البر، أهي بدأت تتحكم فيك.
بصيتلها وقلت: ـ أنا عمري ما هنسى اللي عملتيه فيا، بس إنتِ مشكلتك مش إني رفضت تركبي العربية، مشكلتك إنك متعودة كل الناس تنفذ كلامك.
ردت باستهزاء: ـ وإنتِ فاكرة نفسك مين عشان تردي عليا بالطريقة دي؟
وقبل ما أرد، لقيت صوت بابا من ورايا:
ـ مين عمل فى بنتى كده؟ ومين اللي مد إيده عليها؟!
دخل بابا القاعة ومعاه عمامي وخوالي، وأول ما شافني قاعدة على الأرض وفستاني متبهدل ووشي محمر من الضرب، جري عليا.
نزل لمستوايا وقال: ـ مالك يا حبيبتي؟ مين عمل فيكي كده؟
حضنته وفضلت أعيط وأقول: ـ أنا مش هتجوز يا بابا… خدني من هنا، أنا مش عايزة أدخل البيت ده.
بابا مسح دموعي وقال: ـ اهدي يا بنتي، أنا معاكي، ومحدش هيجبرك على حاجة.
أدهم قرب وقال: ـ يا عمي، الموضوع بسيط، سوء تفاهم بين ملك وأختي، وإحنا هنحل الموضوع.
واحد من عمامي رد عليه: ـ سوء تفاهم؟! هو الضرب بقى سوء تفاهم؟!
أدهم قال: ـ أصل ملك من أول اليوم وهي مصممة تعاند أختي، وأنا بس كنت بحاول أفهمها إن داليا ليها احترامها.
بابا بصله وقال: ـ واحترام أختك يخليك تضرب بنتي؟ دي لسه عروسة، ولسه فرحها ما بدأش، إنت إزاي تمد إيدك عليها؟!
داليا اتدخلت وقالت: ـ يا جماعة، هو إنتوا مكبرين الموضوع ليه؟ ده أخويا، ومن حقه يربي مراته!
بابا بص لها وقال بهدوء شديد: ـ يربي مراته؟! بنتي مش داخلة بيتكم عشان حد يربيها، وبنتي ليها أب وأهل يعرفوا قيمتها.
أم أدهم كانت واقفة بتعيط، وقربت من بابا وقالت:
ـ يا حاج محمود، والنبي اهدى، دي فرحة والناس كلها موجودة، والبيت والشقة والتجهيزات، حرام اللي يحصل ده كله.
بابا رد عليها: ـ يا حاجة سعاد، البيت يتعوض، والفرح يتعوض، إنما بنتي اللي اتضربت قدام الناس دي كرامتها مين يعوضها عنها؟
وبعدين بصلي وقال: ـ قومي يا ملك، إحنا ماشيين.
قمت وأنا ماسكة إيد مريم، لكن أدهم وقف قدامي وقال:
ـ استني يا ملك، إنتِ مش هتمشي بالشكل ده، إحنا لسه متجوزين على فكرة!
بصيتله وقلت: ـ أيوه، إحنا كاتبين الكتاب من كام يوم، وكنت فاكرة إنك راجل هتصوني وتحافظ عليا، لكن إنت أثبتلي إنك مش هتقدر تحميني حتى من إيد أختك.
قال: ـ داليا أختي، ومش هتتغير.
قلتله: ـ وأنا كمان مش هتغير من نفسي عشان أرضيها، ومش هقبل إن حد يهيني تاني.
ومشيت مع بابا.
لكن قبل ما نخرج، سمعت داليا بتقول لأمها:
ـ سيبيها تمشي، دي هترجع لوحدها، هي فاكرة إن في حد هيقبل بيها بعد ما تسيب جوزها يوم فرحها!
وقفت لحظة، وبصيت لها وقلت:
ـ أنا ممكن أرجع من غير فستان الفرح، لكن عمري ما هرجع لراجل مد إيده عليا.
وخرجت من القاعة.
وفي العربية، بابا كان ساكت، وأنا كنت ببص من الشباك ودموعي بتنزل.
بعد شوية ماما كلمتني وقالت:
ـ يا بنتي، أم أدهم بتتصل وعايزة تيجي تقعد معانا، وبتقول إنهم مستعدين يبعدوا داليا عنكم خالص.
سكت شوية، وبعدين قلتلها:
ـ يا ماما، أنا مشكلتي مش إن داليا هتيجي ولا مش هتيجي، مشكلتي إن أدهم نفسه ضربني عشانها، أنا لو دخلت بيته هعيش عمري كله مستنية إمتى أخته تزعل، وإمتى هو يمد إيده عليا تاني.
بابا سمع كلامي وقال:
ـ القرار قرارك يا بنتي، وأنا مش هضغط عليكي.
بس اللي ماكنتش أعرفه إن أدهم وأخته مش هيقبلوا إن الموضوع ينتهي بالسهولة دي، وإن الأيام الجاية هتكشفلي حاجات عن جوازي كنت مستحيل أتخيلها.
وصلت بيت بابا وأنا لسه بفستان الفرح، ومكنتش قادرة أصدق إن اليوم اللي كنت مستنياه من سنين انتهى بالشكل ده.
ماما أول ما شافتني دخلت عليا وحضنتني وفضلت تعيط.
قالتلي: ـ يا حبيبتي، إيه اللي حصل؟ إزاي يعملوا فيكي كده؟ ده إنتِ لسه عروسة!
حضنتها وقلت: ـ أنا مش زعلانة من داليا يا ماما، أنا زعلانة من أدهم، أنا كنت مستنياه يدافع عني، حتى لو بكلمة، لكن هو اللي ضربني بإيده!
بابا كان قاعد في الصالة، ووشه كله غضب، وعمامي حواليه.
واحد من عمامي قال: ـ أنا من رأيي نروح نجيب عفش البنت من الشقة، ومحدش له عندنا حاجة.
بابا رد عليه: ـ هنستنى لما ملك تهدى، ومش هنعمل حاجة غير بموافقتها.
دخلت أوضتي وخلعت الفستان، وفضلت أبصله فترة طويلة.
الفستان اللي كنت بحلم ألبسه من وأنا صغيرة، واللي كنت متخيلة إني هفضل محتفظة بيه طول عمري، بقي بالنسبالي ذكرى يوم اتكسرت فيه فرحتي.
بعدها بساعتين، موبايل ماما رن.
كانت أم أدهم.
ماما ردت، وسمعتها بتقول: ـ أيوه يا حاجة سعاد.
أم أدهم كانت بتعيط وبتقول: ـ والنبي يا أم ملك، خلينا نتكلم، إحنا مش عايزين نخسر البنت، وأدهم غلطان، بس هو اتعصب، وداليا كمان غلطت، وأنا هتصرف معاها.
ماما قالتلها: ـ يا حاجة، بنتي اتضربت مرتين في يوم فرحها، مرة من أخت ابنك ومرة من ابنك نفسه، إنتِ متخيلة إحنا حاسين بإيه؟
قالت: ـ عارفة والله، بس عشان خاطري، الفرح والبيت والشقة، والناس كلها كانت موجودة، حرام الجوازة تبوظ.
ماما ردت: ـ الجوازة باظت من اللحظة اللي ابنك رفع إيده على بنتي.
وقفلوا المكالمة.
بعدها بدقايق، أدهم اتصل بيا.
رفضت أرد.
فضل يتصل مرة واتنين وعشرة، لحد ما بعتلي رسالة:
“ملك، أنا عارف إني غلطت، بس إنتِ كمان استفزيتيني قدام الناس، ومكنش ينفع ترفضي كلام داليا بالشكل ده.”
قرأت الرسالة أكتر من مرة، وفضلت مستغربة.
حتى وهو بيعتذر، شايف إن الغلط مش غلطه لوحده!
بعتله: “أدهم، أنا مش عايزة أسمع منك أي كلام، ومش عايزة أشوفك تاني.”
رد بسرعة: “إنتِ بتتكلمي بجد؟! يعني هتضيعي جوازنا عشان قلم؟”
حسيت إن دمي بيغلي، وكتبتله: “مش قلم يا أدهم، دي إهانة، والأصعب إنك إنت اللي أهنتني، وأنا مش هقبل أعيش مع راجل شايف إن ضرب مراته حق من حقوقه.”
قفلت الموبايل.
تاني يوم الصبح، لقيت داليا باعتالي رسالة من رقم غريب.
كانت كاتبة: “إنتِ فاكرة إنك لما مشيتي هتكسري أخويا؟ ده أخويا يقدر يتجوز أحسن منك، وإنتِ اللي هتندمي، وبلاش تعملي فيها مظلومة، إنتِ اللي بدأتي.”
ورّيت الرسالة لبابا.
قرأها، وابتسم ابتسامة غريبة وقال: ـ البنت دي شكلها مش فاهمة إن الموضوع انتهى.
وبعد الضهر، أدهم وأمه جم البيت.
بابا استقبلهم في الصالون، وأنا كنت قاعدة في أوضتي، لكن سمعت كل كلمة.
أم أدهم قالت: ـ يا حاج محمود، إحنا جايين نراضيكم، وملك بنتنا، وإحنا مش عايزين نخسرها.
بابا قال: ـ بنتكم دي كانت لسه من يومين بتجهز شقتها، وكانت فرحانة بجوازها، إيه اللي يخليها تسيب كل ده وترجع بيت أبوها بفستان الفرح؟
أدهم رد: ـ أنا غلطت يا عمي، ومعترف بده، بس هي كمان لازم تفهم إن أختي جزء من حياتي، ومش هينفع كل شوية يحصل خلاف بينا بسببها.
بابا سأله: ـ يعني إنت شايف إن بنتي لازم تسمع كلام أختك حتى لو على حساب كرامتها؟
أدهم سكت شوية، وبعدين قال: ـ لا، بس داليا أكبر مني، وليها فضل عليا، ومش هقدر أزعلها.
هنا بابا قاله: ـ يبقى إنت مش جاهز للجواز يا ابني، لأنك لسه مش عارف إن مراتك ليها حق عليك زي ما أختك ليها حق.
في اللحظة دي خرجت من أوضتي، ووقفت قدامهم.
أدهم أول ما شافني قام من مكانه وقال: ـ ملك، تعالي نتكلم لوحدنا.
قلتله: ـ مفيش كلام بينا، أنا عايزة أسألك سؤال واحد بس.
قال: ـ اتفضلي.
قلت: ـ لو رجعنا واتجوزنا، وأختك اتدخلت في حياتنا تاني، هتعمل إيه؟
رد من غير تفكير: ـ هحاول أرضي الطرفين.
ضحكت وقلت: ـ يعني هتفضل واقف في النص، وأنا كل مرة أتنازل عشان أختك ماتزعلش؟
قال: ـ إنتِ ليه مصممة تكبري المواضيع؟
بصيت لأمه وقلت: ـ أنا آسفة يا طنط، بس أنا مش هقدر أكمل.
أمه بدأت تعيط وقالت: ـ طب والشقة يا بنتي؟ والعفش اللي اتجاب؟ ده كله جديد، إنتِ هتسيبيه لمين؟
قلت: ـ العفش ده حقي، وأنا مش عايزة منه حاجة زيادة عن حقي، لكن مش هبيع كرامتي عشان شقة وعفش.
أدهم وقف وقال بعصبية: ـ يعني خلاص؟! إنتِ مصممة على الطلاق؟
بصيتله وقلت: ـ أيوه يا أدهم، مصممة.
لكن قبل ما يمشي، قال جملة خلتني أتأكد إن قراري صح.
قال: ـ ماشي يا ملك، بس افتكري إنك إنتِ اللي اخترتي تضيعي بيتك بإيدك.
بابا رد عليه: ـ البيت اللي بيتبني على إهانة بنتي مش بيت، واللي يضيعه هو اللي مش عارف يصون مراته.
خرجوا من البيت.
وبعدها بكام يوم، بابا بدأ إجراءات الانفصال، واتفق مع أهل أدهم إننا ناخد عفشنا بالكامل، بما فيه الأجهزة والمطبخ وكل حاجة اشتريناها.
لكن المفاجأة كانت يوم ما عربية النقل وصلت قدام عمارة أدهم عشان تنزل العفش…
داليا نزلت من شقتها، ووقفت قدام العمال، وقالت لهم بصوت عالي: محدش هياخد حاجة من هنا، العفش ده كله بقى من حق أخويا!
