ـ خلاص بقى يا طنط، إحنا فهمنا إنك زعلانة، بس الموضوع كبر أكتر من اللازم.
بصيتلها.
ـ لأ يا داليا، الموضوع ماكبرش النهارده. الموضوع بدأ من أول مرة قررتي فيها إن وجودي في البيت مشكلة.
المحامي جمع أوراقه وقال:
ـ إحنا خلصنا كل اللي جينا عشانه، ولو فيه أي استفسار قانوني، أنا موجود.
قبل ما يمشي، طلبت منه يستنى شوية.
كان عندي ورقة أخيرة عايزة أوريها لياسين.
طلعتها من درج صغير في المكتبة وناولتهاله.
ـ خد يا ابني، اقرا دي.
مسك الورقة وبدأ يقرا، وبعد ثواني عينه اتملت بالدموع.
كانت كشف حساب بكل المبالغ اللي كنت حولتهاله على مدار السنين، من غير ما أطلب منه يرجعها.
كان فيه مصاريف تعليمه، ومصاريف جوازه، ومبلغ ساعدته بيه لما خسر شغله القديم، وحتى المبلغ اللي دفعته مقدمًا في أول عربية اشتراها.
وتحت الكشف كنت كاتبة بخط إيدي:
«كل ده كان من قلبي، ومافيش جنيه واحد مستنياه منك. لكن كنت أتمنى إنك تفتكر إن ليك أم كبرت في السن، ومحتاجة ابنها أكتر ما هي محتاجة فلوسه».
ياسين حط الورقة على الترابيزة، وغطى وشه بإيديه.
وفجأة نزل على ركبته قدامي.
ـ سامحيني يا ماما… أرجوكي سامحيني.
بدأ يعيط بصوت عالي.
ـ أنا كنت غبي، وسمحت لداليا تقنعني إنك بقيتي حمل علينا. والله ما كنت متخيل إنك حاسة بكل الوجع ده.
بصيتله ودموعي نزلت غصب عني.
كان نفسي أمد إيدي وأحضنه زي زمان، لكن قلبي كان لسه موجوع.
قلتله:
ـ قوم يا ياسين، أنا مش عايزة أشوفك على ركبتك. أنا عايزاك تبقى راجل تعرف قيمة أمك قبل ما يفوت الأوان.
قام وهو بيمسح دموعه.
لكن المفاجأة الحقيقية كانت لسه جاية.
بعد ما المحامي والناس مشيوا، داليا دخلت المطبخ وقفلت الباب بعنف.
ياسين فضل واقف في الصالة، مش عارف يبصلي في عيني.
بعد شوية خرجت داليا وهي شايلة شنطتها.
قالت بغضب:
ـ ياسين، إحنا لازم نمشي من هنا فورًا.
ياسين بص لها.
ـ استني يا داليا، إحنا محتاجين نتكلم.
ـ نتكلم في إيه؟ أمك باعت البيت لجمعية! يعني إحنا خلاص مالناش مستقبل هنا!
رد عليها:
ـ البيت عمره ما كان بتاعنا يا داليا.
اتصدمت من كلامه.
ـ إنت بتقول إيه؟!
ـ بقول الحقيقة. البيت بتاع أمي، وإحنا كنا عايشين فيه بموافقتها.
ـ يعني إنت واقف في صفها ضدي؟!
ـ أنا مش في صف حد. أنا بس بدأت أفهم أنا عملت إيه.
داليا قربت منه وقالت بصوت واطي لكنه مليان غضب:
ـ اسمع يا ياسين، أنا مش هعيش مع واحدة بتتحكم في حياتنا، وكل شوية تحسسنا إنها صاحبة فضل علينا.
ياسين رد لأول مرة بحزم:
ـ أمي عمرها ما حسستنا بكده. إنتِ اللي كنتِ شايفة وجودها مشكلة.
داليا سكتت لحظة، وبعدها قالت:
ـ خلاص، أنا هاخد الولاد وأروح عند أمي.
ياسين قال:
ـ الولاد مش طرف في المشكلة دي، ومش هسمح إنك تستخدميهم علشان تعاقبي بيهم جدتهم.
كنت واقفة بعيد وبسمع الكلام.
ماكنتش عايزة أتدخل، لكن أول ما سمعت كلمة الولاد خرجت من مكاني.
قلت:
يا داليا، مهما حصل بيني وبينك، ليلى وآدم مالهمش ذنب. دول أحفادي، وأنا عمري ما هحطهم في نص خلافات الكبار.
داليا بصتلي بنظرة غريبة.
ـ يعني إنتِ عايزة تاخدي عيالي مني؟
قلت باستغراب:
ـ مين قال كده؟ دول ولادك وإنتِ أمهم. أنا مش عايزة غير إني أشوفهم وأحبهم من غير ما حد يخوفهم مني.
في اللحظة دي، ليلى خرجت من أوضتها وهي ماسكة دبدوبها.
بصت لمامتها، وبعدها بصتلي.
قالت بصوت صغير:
ـ تيتة فريدة… هو إنتِ هتمشي وتسيبينا؟
قلبي اتقطع.
نزلت لمستواها وقلت:
ـ لأ يا حبيبتي، تيتة لسه هنا.
جريت عليا وحضنتني بكل قوتها.
ـ أنا بحبك يا تيتة، ومش عايزة تروحي دار المسنين.
حضنتها وفضلت أبوس راسها.
ـ وأنا كمان بحبك يا روح تيتة.
داليا كانت واقفة بتبصلنا، وياسين دموعه نزلت تاني.
ليلى رفعت راسها وسألتني:
ـ هو أنا كده عملت حاجة غلط لما حضنتك؟
بصيت لها وقلت:
ـ لأ يا حبيبتي، إنتِ عملتي أحلى حاجة في الدنيا.
وبعدين قلتلها:
ـ بس عايزة منك وعد، ماتخافيش تقولي لحد إنك بتحبيه، وماتخليش حد يحسسك إن الحب غلط.
البنت هزت راسها.
عدى أسبوع على اللي حصل.
داليا نقلت حاجتها وراحت تقعد عند والدتها، وياسين فضل معايا كام يوم، لكنه كان قليل الكلام.
كنت بشوفه كل ليلة قاعد في الصالة، باصص لصورة أبوه، وساعات كنت أسمعه بيعيط لوحده.
في يوم الصبح، دخل عليا المطبخ.
ـ صباح الخير يا ماما.
روايات_مشيره_محمد
ـ صباح النور يا حبيبي.
قعد قدامي وقال:
ـ أنا عايز أقولك حاجة، ومش عايزك تردي غير لما تسمعيني للآخر.
سبت اللي في إيدي وقعدت.
قال:
ـ أنا كلمت داليا امبارح، وقلت لها إن اللي حصل مش هيتكرر. وإنها لو عايزة ترجع بيتك، لازم تعرف إن ده بيتك وإنتِ صاحبة القرار فيه، ومحدش له حق يعاملك كأنك ضيفة تقيلة.
سألته:
ـ وهي قالت إيه؟
ـ قالت إنك السبب في خراب بيتنا، وإنك كان ممكن تسيبيلنا البيت بدل ما تديه لجمعية.
ابتسمت بحزن.
ـ وهي لسه مش فاهمة إن المشكلة عمرها ما كانت في البيت.
ياسين هز راسه.
عارف يا ماما. وعشان كده أنا قررت أستأجر شقة ليا وللولاد فترة، لحد ما الأمور تهدى، ونقدر نعرف نعيش من غير خناقات.
بصيتله وقلت:
