روايات_مشيره_محمد
فضلت حاضنة ياسين، وإيدي على ضهره، وهو بيعيط من غير صوت. كان بيحاول يكتم عياطه كأنه خايف حتى دموعه تبقى عبء علينا.
أما حسام فكان واقف قدامي متضايق، وحماتي نوال بتحاول تلاقي أي مخرج للكلام اللي اتكشف.
بعد شوية، ياسين رفع وشه من على كتفي وقال:
“ماما، هو أنا لو روحت عند خالتي عواطف هتنسوني؟”
حسيت إن قلبي اتعصر.
مسكت وشه بين إيديا وقلتله:
“إنت بتقول إيه يا حبيبي؟ إزاي ممكن ننساك؟ إنت أول فرحة دخلت حياتي، وإنت اللي خلتني أعرف يعني إيه أبقى أم. وجودك في البيت مش محتاج فلوس ولا شروط.”
بص ناحية أبوه وقال:
“بس بابا قال إن البيبيهات محتاجين الأوضة، وإن أنا بقيت كبير وممكن أستحمل أبقى بعيد شوية.”
اتجمدت مكاني.
الكلام اللي سمعته أكدلي إن الموضوع مش مجرد اقتراح عابر من حماتي.
حسام كان بيجهز ابني نفسيًا لفكرة إنه يسيب البيت، وبيستخدم كل كلمة ممكن تخليه يحس إنه لازم يضحي بنفسه عشان إخواته.
بصيت لجوزي وقلت:
“عايزة أفهم حاجة واحدة. إنت ليه بتقنع ابنك إنه عبء علينا؟”
رد بعصبية:
“أنا مقولتش إنه عبء، إنتِ بتفسري كلامي غلط.”
“طيب إيه تفسير إن طفل عنده تسع سنين يجمع فلوسه ويعرضها علينا عشان نسمحله يفضل في بيته؟”
“يا سمر، أنا كنت بحاول أتصرف في الظروف اللي إحنا فيها.”
“والظروف دي خلتك تكذب عليه وتقول له إني وافقت؟”
حسام سكت.
حماتي تدخلت وقالت:
“يا بنتي، إنتِ مش شايفة الصورة كاملة. البيت بقى زحمة، وإنتِ تعبانة، والتوأم محتاجين رعاية، وياسين محتاج حد يهتم بيه. عواطف عندها وقت وبيت واسع.”
بصيتلها وقلت:
“وياسين محتاج أمه وأبوه كمان. ولا دي حاجة مش مهمة؟”
ردت بضيق:
“محدش بيقول كده، بس الولد كبير وفاهم.”
ضحكت من غير ما يكون في ضحك حقيقي.
“كبير؟ ده طفل لسه فاكر إن تمن وجوده وسط أهله ممكن يكون تمنه كام جنيه!”
قمت بصعوبة من مكاني، وحسام حاول يسندني.
بعدت إيده وقلت:
“متلمسنيش دلوقتي.”
وبعدين بصيت لياسين:
“حبيبي، خد الفلوس بتاعتك وحطها في حصالتك. دي فلوسك وإنت حر تعمل بيها اللي تحبه، لكن عمرك ما هتدفع منها جنيه عشان تفضل معانا.”
اسين أخد الفلوس، لكنه فضل واقف مكانه.
سألني:
“يعني مش لازم أروح السبت؟”
قلتله:
“مش هتروح في أي مكان إنت مش عايز تروحه.”
ابتسم ابتسامة صغيرة، وطلع أوضته.
أول ما اختفى من قدامنا، التفت لحسام وقلت:
“دلوقتي عايزة الحقيقة من غير لف ولا دوران.”
حسام سحب كرسي وقعد.
“بصي يا سمر، أنا كنت بفكر إن ياسين يقعد عند خالته شهرين أو تلاتة لحد ما الدنيا تستقر.”
“مين قال إن الدنيا مش مستقرة؟”
“إحنا داخلين على مصاريف كتير. مرتبي مش مكفي كل حاجة.”
“وده مبرر إنك تبعد ابنك؟”
“مش هبعده، دي خالته!”
“ولو هو مش عايز يروح؟”
رد بسرعة:
“هو لسه صغير ومش فاهم مصلحته.”
بصيتله وقلت:
“الغريب إنه فاهم أكتر من الكبار كلهم. فاهم إنه بيتحرم من مكانه، وفاهم إنكم عايزين أوضته، وفاهم إنكم شايفين وجوده مصاريف زيادة.”
حماتي قالت:
“إنتِ بتتكلمي بطريقة مش مقبولة.”
رديت عليها:
“اللي مش مقبول إنك تقرري مصير ابني من غير ما ترجعيلي.”
حسام رفع صوته:
“خلاص بقى يا سمر! أنا أبو الولد ومن حقي أقرر!”
بصيتله بثبات:
“وأنا أمه، ومن حقي أعرف قبل ما ابني يكتشف إن أبوه حجزله مكان بعيد عن بيته.”
سكت لحظة، وبعدها قال:
“أنا معنديش فلوس أفتح بيت لستة أفراد بالطريقة اللي إنتِ متخيلاها.”
الكلمة دي خلتني أرجع بضهري للكرسي.
“ستة أفراد؟”
هز راسه.
“أيوه. إحنا بقينا ستة، والمصاريف زادت، وإنتِ مش شغالة دلوقتي.”
سألته:
“يعني إيه؟ وجود ياسين هو اللي خلانا ستة؟ ده ابنك يا حسام، مش ضيف عندك!”
حسام مسح وشه بإيده، وبعدين قام وقال:
“أنا محتاج أخرج شوية. الكلام معاكي مش هيخلص.”
لكن قبل ما يخرج، رن تليفونه.
بص للشاشة واتوتر، وقفل المكالمة بسرعة.
سألته:
“مين؟”
قال:
“مفيش حد.”
بعد ثواني التليفون رن تاني.
المرة دي حماتي بصت للشاشة قبل ما هو يقفلها، وقالت:
“رد يا حسام، يمكن عواطف.”
أنا سمعت الاسم واتحركت ناحيته.
“عواطف؟ أختك بتكلمك ليه في الموضوع ده؟”
حسام خرج من المطبخ من غير ما يرد.
