الجزء الأخير
حماتي كانت واقفة قدام جوزي، وعينيها متعلقة بالورقة اللي في إيده، وقالتله بصوت متوتر:
ـ إنت لسه محتفظ بالورقة دي لحد دلوقتي؟!
بصلها وقال:
ـ أيوه يا أمي، وعمري ما هتخلص منها، دي آخر حاجة سابتْهالي مراتي الله يرحمها.
أنا وقفت مكاني، وبصيتله باستغراب، وقلت:
ـ ورقة من مراتك الأولى؟!
هز راسه وقال:
ـ أيوه يا بسمة، دي جواب كانت كاتباهولي قبل ما تتوفى بفترة، وكانت موصياني على بنتنا.
حماتي نزلت عينيها في الأرض، وهو فتح الورقة وبدأ يقرأ بصوت متقطع:
«لو في يوم ربنا كتبلك تعيش مع واحدة تانية، أتمنى تختار إنسانة تحب بنتنا وتخاف عليها، مش لازم تكون أمها اللي ولدتها، لكن نفسي تكون أم ليها بقلبها.
أوعى تحسس بنتي إنها غريبة في بيت أبوها، وأوعى تخليها تحس إن وجودها عبء على حد.
أنا عارفة إنك هتحاول تعوضها عن غيابي، بس صدقني مفيش حد هيقدر يعوضها عن الأم غير قلب حنين يحتويها.
ولو ربنا رزقك بأطفال تانيين، خلي بالك منها، هي لسه صغيرة ومش هتفهم ليه حياتها اتغيرت فجأة».
جوزي سكت، ودموعه كانت نازلة.
وبعدين بص لأمه وقال:
ـ فاكرة يا أمي لما كنتي بتقوليلي بلاش أتجوز تاني عشان بنتي؟ أنا وقتها كنت خايف عليها، لكن لما قابلت بسمة، لقيت فيها الحنية اللي كنت بدور عليها لبنتي، وعمري ما توقعت إنها تحبها بالشكل ده.
حماتي بدأت تعيط وقالت:
ـ أنا والله ما كنتش عايزة أظلمها، أنا بس خايفة على حفيدتي، أمها ماتت وهي صغيرة، وكنت خايفة لما تخلفوا تحس إنها ملهاش مكان عندكم.
بصيتلها وقلت:
ـ يا ماما، أنا عارفة إن خوفك على حفيدتك طبيعي، بس البنت دي مش محتاجة حد ياخدها من حضني، هي محتاجة تحس إن ليها أب وأم وبيت، ومش كل ما يحصل خلاف نهددها إنها تروح تعيش بعيد عننا.
حماتي قربت مني وقالت:
ـ سامحيني يا بنتي، أنا يمكن غلطت في حقك.
قولتلها:
ـ أنا مسامحاكي، بس أوعي تاني تقولي للبنت إنها تقيلة أو إن وجودها بقى صعب بعد ما خلفنا.
البنت كانت واقفة ورا باب الأوضة، وسمعت جزء من الكلام، فجريت على أبوها وقالت:
ـ بابا، هو أنا هفضل هنا؟
جوزي شالها وباسها وقال:
ـ إنتي صاحبة البيت يا حبيبتي، ومحدش هيقدر يخرجك منه.
وبصتلي وقالت:
ـ وماما بسمة هتفضل ماما بتاعتي؟
ضحكت ودموعي نازلة وقلت:
ـ أنا مش هسيبك يا قلب ماما.
بعد الموقف ده، حماتي بدأت تتغير معايا، وبقت لما تيجي تجيب حاجة للبيبي تجيب لأخته معاه، ولو شافتني تعبانة تاخد البنت تلعب معاها شوية عشان أرتاح.
ومرت شهور، وفي يوم كنت بجهز الفطار، لقيت بنتي الكبيرة داخلة عليا ومعاها ورقة مطوية.
قالتلي:
ـ ماما، أنا رسمتلك حاجة.
فتحت الورقة، لقيتها رسمة فيها أنا وبابا وأخوها وهي، وكلنا ماسكين إيد بعض.
وتحت الرسمة كاتبة بخطها الصغير:
«ماما بسمة، شكراً إنك اخترتيني بنتك».
والله ما قدرت أمسك نفسي، حضنتها وفضلت أعيط.
جوزي دخل المطبخ ولما شافني قال:
ـ مالك يا بسمة؟
ناولته الرسمة، ولما قراها ابتسم وقال:
ـ عارفة يا بسمة، أنا كنت فاكر إني لما اتجوز هجيب لبنتي أم، لكن ربنا رزقني بواحدة حبتها قبل ما تفكر هي هتاخد إيه في المقابل.
قولتله:
ـ وأنا كنت فاكرة إن حلم الأمومة ضاع مني، وإن عمري ما هسمع كلمة ماما من طفل، لكن ربنا رزقني ببنت نادتني ماما قبل ما يرزقني بابن.
وبعدها بفترة، كنت بجهز ألبوم صور لأولادنا، وحطيت صورة بنتي الكبيرة أول صورة، وبعدها صورة أخوها.
جوزي شافني وقال:
ـ ليه حطيتي صورتها الأول؟
ضحكت وقلتله:
ـ عشان هي اللي علمتني أبقى أم.
حضني وقال:
ـ ربنا يخليكي لينا يا بسمة.
وعايزة أقول لكل ست اتظلمت واتكسرت واتقالها كلام وجعها، إنك مش ناقصة لمجرد إنك محرومه من حاجة، وإن عدم الإنجاب مش مبرر إن حد يهينك أو يقلل منك.
أنا اتطردت من بيتي واتعايرت بحاجة مش بإيدي، وافتكرت إن حياتي انتهت، لكن ربنا فتحلي باب تاني، ورزقني بزوج بيحترمني وببنت حبيتها من قلبي، وبعدها رزقني بطفل.
وسبحان الله، الراجل اللي كان فاكر إن الجواز التاني هيعوض بنته عن أمها، اكتشف إن العوض الحقيقي كان في قلب ست دخلت حياته وحبت بنته كأنها بنتها.
مش كل طلاق نهاية، ساعات ربنا بيقفل باب عشان يفتحلك باب أحن وأجمل مما كنت تتخيلي.
#حكاوي_شيمو
إيه رأيكم في بسمة؟ وهل شايفين إن الأمومة مش شرط تكون بالولادة، وإن ممكن واحدة تحب طفل مش من دمها وتكون ليه أم بجد؟
اكتبولي رأيكم، ولو القصة لمست قلوبكم شاركوها مع غيركم.
وصلوا على النبي ﷺ
