سابني وخرج يجري في الشارع عشان يلحق يروح لمراته، وأنا وقفت مكاني، أخدت نفس طويل عميق ، وبصيت لورقة طلاقي وأنا بقول لنفسي: «النهاردة بس.. أنا بدأت أعيش». خرجت من عند المأذون والورقة في إيدي، رجلي كانت شايلاني بالعافية بس راسي كانت في السماء.
أول ما وصلت الشقة، قفلت الباب ورايا بالمفتاح والترباس، وسندت ضهري عليه وأنا باخد نفسي اللي كان محبوس بقاله خمس سنين. بصيت حوليا.. الشقة اللي كانت في يوم من الأيام حلمنا، بقت بالنسبة لي مجرد جدران مالهاش روح.
مكنش فيه وقت للدموع ولا للحزن، النبض اللي جوايا كان نبض حد عايز ينظف حياته من أي قذارة سببت له الوجع. دخلت أوضة النوم، فتحت دولابه وطلعت الشنط الكبيرة اللي عندنا. وبقيت ألم في هدومه..
قمصانه، بدله، لبسه البيت، كل حاجة تخص حامد رمتها في الشنط بمنتهى العصبية والغل، مسبتلهوش حتى فرشة سنانه ولا قلامه. كنت برمي حاجته وأنا بفتكر منظره وهو بيقشر لها الجمبري، وهو شايلها، وهو بيمسح لها صوابعها..
كل قطرة عرق صبتها في البيت ده وهو مش مقدرها، كنت بطلعها وأنا بقفل سوست الشنط بقوة لدرجة إن إيدي وجعتني. لما خلصت، بقوا ثلاث شنط كبار محطوطين في الصالة. مسكت موبايلي وفتحت أبلكيشن أوبر، وطلبت عربية، وكتبت عنوان شقتها الجديدة اللي كان واخدها فيها.
أول ما السواق وصل ورن عليا، نزلت الشنط مع بواب العمارة وخليته يحطهم في شنطة العربية، وأديت للبواب حساب السواق وزيادة، وقولت له: «قول للسواق يسلم الشنط دي لأستاذ حامد على العنوان ده، ومينزلش من العربية غير لما يتأكد إن حامد بنفسه استلمهم».
طلعت شقتي تاني، وقفت في البلكونة أراقب العربية وهي بتبعد وتختفي عن عيني، ومعاها اختفت كل حاجة كانت بربطني بالبني آدم ده. دخلت الصالة وقعدت على الكنبة.. الكنبة اللي مكنش بيقعد معايا عليها ويقضي وقته كله ماسك الموبايل بيكلمها.
بصيت حواليا في الهدوء اللي مالي المكان، الهدوء اللي كنت بخاف منه زمان وبحسه وحدة وقهر، النهاردة حسيته راحة وسكينة. حطيت رجلي على الكنبة وفردت ضهري لورا، وغمضت عيني وأنا ببتسم وبقول لنفسي: «الشقة دي شقتي، بأيامي وصبري وشقايا فيها..
وهو خلّيه يشبع بالبطل بتاعه وبدلع مراته، أما أنا فـ قعدت هنا ملكة، بكرامتي اللي دُست على قلبي عشان أحميها». بصيت لصالون البيت، ولغرفة النوم، وللمطبخ اللي وقفت فيه سنين.. كل ركن هنا بقى بيفكرني بخيبتي وصبري على راجل ميسواش.
فجأة حسيت إن جدران الشقة دي بتخنقني، وإن قعدتي هنا مش نصر، دي سجن بيفكرني بكل دمعة نزلت مني وكل قهرة عشتها. أنا مش عايزة أي حاجة تربطني بماضيه، ولا حتى عفش البيت اللي نقيته قطعة قطعة معاه وشقيت عشان نعمله.
طلعت موبايلي وطلبت رقم صاحب الشقة، «عم جلال».. الراجل الطيب اللي كان دايماً بيعاملنا زي أولاده. أول ما رد، قولت له بصوت هادي وفيه نبرة حسم غريبة عليا: «مساء الخير يا عم جلال.. أنا بكلمك عشان أقولك إني هسلمك الشقة اول ما افضيها .
أنا وحامد اتطلقنا النهاردة رسمي، وأنا هسيب المكان خالص». سمعت صوته مذهول ومش مصدق: «يا بنتي استهدي بالله! طلاق إيه وعشرة خمس سنين فين؟ ده أنتوا كنتوا مثال للأدب والهدوء في العمارة!» رديت عليه بابتسامة باهتة: «كل شيء قسمة ونصيب يا عم جلال، والحمد لله قدر الله وما شاء فعل.
