أبويا بص لنهى، اللي كانت قاعدة قدامه وبتشرب القهوة.
ملامحه اتغيرت.
«إنتِ بتقولي إيه يا أمي؟ نهى قالتلي إن ملك هي اللي طلبت تروح عندك، وإنها كانت مكسوفة تقولي بنفسها!»
جدتي ردت وهي على وشك العياط:
«والله ما حصل يا محمود! أنا معرفش حاجة عن الموضوع ده غير دلوقتي، لما ملك كلمتني وقالتلي إنها لوحدها في البيت!»
أبويا حس إن الأرض بتنسحب من تحته.
«لوحدها إزاي؟ من إمتى؟»
«من يوم ما سافرتوا!»
في اللحظة دي، أبويا قفل المكالمة بعد ما وعد أمه إنه هيتصرف فورًا.
لف ناحية نهى، اللي كانت بتحاول تقوم من مكانها.
«نهى، أنا عايز أفهم حاجة واحدة بس. ملك فين؟»
نهى حاولت تبتسم.
«مالك يا محمود؟ إيه اللي حصل؟»
صوته ارتفع:
«متسألينيش إيه اللي حصل! أمي بتقولي إن ملك مش عندها، وإنك إنتِ اللي قلتي لها إنها مسافرة معانا! وإنتِ قلتيلي إن ملك هي اللي طلبت تروح عندها!»
نهى اتلخبطت، لكنها حاولت تسيطر على نفسها.
«يمكن حصل سوء تفاهم، يا محمود.»
«سوء تفاهم إيه؟ بنتي عندها 12 سنة! إنتِ قولتيلي إنها عند أمك، وأمي بتقول إنها في البيت لوحدها!»
نهى بصت للأرض، وبعدها قالت:
«أنا كنت فاكرة إنها هتقدر تعتمد على نفسها كام يوم، وبعدين…»
قاطعها أبويا بصدمة:
«كام يوم إيه؟ إنتِ بتتكلمي عن طفلة! إنتِ سيبتيها لوحدها فعلًا؟»
نهى بدأت تدافع عن نفسها:
«يا محمود، إنت بتكبر الموضوع ليه؟ البيت آمن، والأكل موجود، والموبايل معاها! وبعدين هي اللي قالتلي إنها عايزة تقعد في البيت ومش عايزة تيجي معانا.»
أبويا قرب منها، وعينيه مليانة غضب.
«كفاية كدب! ملك قالتلي امبارح إنها كانت مستنية المصيف. وأنا بنفسي شفتها مستغربة لما كلمتها عن جدتها! إنتِ كنتِ بتقوليلي إيه بالظبط؟»
نهى سكتت.
ولأول مرة من سنين جوازهم، أبويا شافها مش قادرة ترد.
لكنه مكنش عنده وقت يفضل يتخانق معاها.
خد مفاتيح العربية، واتصل بأحد جيراننا الموثوقين، الأستاذ سامح، وطلب منه يروح يطمن على ملك فورًا، لحد ما هو يرجع.
وبعدها اتصل بيا.
أول ما شفت اسم أبويا على شاشة الموبايل، قلبي دق بسرعة.
ديت وأنا بحاول أتكلم طبيعي:
«ألو يا بابا.»
صوته كان مختلف، فيه قلق ووجع.
«ملك، إنتِ فين يا حبيبتي؟»
«في البيت يا بابا.»
«إنتِ لوحدك؟»
سكت شوية، وبعدها قلت:
«أيوه.»
سمعته بياخد نفس طويل، وبعدين سألني:
«من إمتى يا ملك؟»
«من يوم ما حضرتك سافرت.»
صوته اتكسر وهو بيقول:
«طب ليه مقولتليش يا حبيبتي؟ ليه مسمعتيش كلامي لما قلتلك تكلميني لو احتجتي أي حاجة؟»
لقيت نفسي بعيط.
«أنا كنت فاكرة إن حضرتك عارف يا بابا. نهى قالتلي إنك موافق، وإنك عارف إني هقعد لوحدي.»
أبويا سكت، وأنا كملت وأنا بعيط:
«أنا والله ما طلبتش أروح عند تيتة، ولا قلت لنهى إني مكسوفة منك. أنا كنت عايزة أروح المصيف معاك. أنا حتى كنت مجهزة المايوه بتاعي ومستنية اليوم ده من زمان.»
الكلمات دي كانت كفيلة إنها تكسر قلب أبويا.
سمعته بيقول بصوت مخنوق:
«خلاص يا حبيبتي، متعيطيش. أنا غلطان إني مسألتكيش بنفسي واتأكدت. أنا راجعلك، ومش هسيبك لوحدك تاني.»
سألته بخوف:
«إنت زعلان مني يا بابا؟»
«زعلان منك إزاي يا قلب بابا؟ أنا زعلان من نفسي، لأني صدقت كلام حد من غير ما أسمع منك إنتِ.»
وبعدين قال لي:
«الأستاذ سامح جارنا جاي يطمن عليكي دلوقتي، وأنا راجع على طول. لحد ما يوصل، خليكي في مكان آمن، ومتفتحيش الباب لأي حد غريب.»
قفلت معاه، وفضلت أبص للموبايل وأنا مش مصدقة إنه عرف الحقيقة أخيرًا.
بعد حوالي ربع ساعة، سمعت جرس الباب.
اتخضيت، لكن أول ما بصيت من العين السحرية، لقيت الأستاذ سامح واقف.
كان راجل طيب، وأبويا يعرفه من سنين.
فتحته بعد ما اتأكدت من هويته، وأول ما شافني، ملامحه اتغيرت.
«يا نهار أبيض يا ملك! إنتِ بقالك كام يوم لوحدك؟»
قلت له:
«من يوم السبت.»
هز راسه بحزن، ودخل بعد ما اتأكد إني كويسة.
جاب لي أكل، وقعد معايا لحد ما أبويا يرجع، وكان كل شوية يتصل بيه يطمنه.
أما أبويا، فكان في طريق العودة، والغضب جواه بيزيد مع كل دقيقة.
في العربية، نهى كانت قاعدة جنبه، ومش عارفة تبدأ الكلام منين.
حاولت تكسر الصمت وقالت:
