أنا راجل متجوز اتنين. مراتي الأولى “سوسن” كانت راضية ومرضية ومستحملة عيشتها عشان خاطر الولاد، وكنت وعدتها إني هعدل بين البيتين، بس غصب عني وعن إرادتي نفسي الأمارة بالسوء كانت بتمل لمراتي التانية “مرفت”. كنت دايماً أتحجج بالشغل وبظروف المأموريات الطويلة عشان أقضي معظم لياليّ هناك عندها. ومكنش الموضوع واقف بس على البيات والوقت، لا، كان معدي للفلوس كمان؛ كنت بدي الأولى تلت مرتبى اللي يا دوب بيكفي أكل وشرب وعفش البيت بالعافية، واددي التانية التلتين عشان تجيب اللي نفسها فيه وتعيش براحتها، وكنت بضحك على نفسي وأقول إني بعوضها عن حكاية الخلفة.
الموضوع مكنش واقف عند الفلوس والبيات، كان بيزيد من غير ما أحس، أو يمكن كنت بحس وبغمض عيني بمزاجي عشان مكدرش على نفسي. جه الصيف ومراتي التانية قالتلي إن نفسها تسافر تغير جو وتشوف البحر، ومقدرتش أكسر بخاطرها ولا أقولها لأ. حجزت أسبوع كامل في فندق غالي على البحر، ولما جيت أخرج من بيت مراتي الأولى، لميت هدومي في شنطة صغيرة وقلت لها بجدية مزيفة:
«عندي مأمورية شغل مهمة جداً برة القاهرة مش هعرف أرجع منها طول الأسبوع.. خلي بالك من العيال ومترنيش كتير عشان الاجتماعات ورا بعض».
هي صدقتني كالعادة بقلبها الطيب، دعتلي ربنا يوفقني ويوسع رزقي، وسابتني أنزل وهي شايلة هم العيال ومصاريف البيت اللي يدوب مكفياهم بالعافية في الحر.
ركبت عربيتي وطرت على مراتي التانية، وهناك عشنا أيام بالطول والعرض، صرف من غير حساب ودلع وبحبوحة. بس مرفت مكنش كفاية عليها إني معاها لوحدها، كانت عايزة تحس بانتصار أنثوي يرضي غرورها. بدأت من تاني يوم تصور البحر، والعشا الرومانسي، والهدايا اللي بشتريها، وصورنا مع بعض، وتبعت كل ده لمراتي الأولى على الواتساب مع رسايل مبطنة وكلام يفرس:
«الجو هنا يرد الروح، جوزي حبيبي مش مخليني عايزة حاجة من الدنيا ومفسحني في أحلى مكان.. خلى عندك دم واتطلقي، لأنه عمره ما هيوديكي في مكان زي ده ولا هيعمل معاكي نص اللي بيعمله معايا».
مراتي الأولى كانت قاعدة في حر الشغل والبيت مع العيال، فتتفاجئ بالرسايل والصور نازلة عليها زي الماية المغلية. اتصلت بيا كتير وأنا شايف اسمها بينور على الشاشة وكنت بكنسل عليها بحجة إن «المأمورية متتعطلش». هي عرفت إن كل كلمة قلتها كانت كدب، وإن سفرية الشغل كانت فسحة ودلع للتانية على حساب قهرتها وكسرة نفسها هي وعيالي، وأنا كنت عارف كويس إنها عرفت.. وبرضه كملت رحلتي ولا كأن في حاجة حصلت، وعملت لها بلوك عشان ماتتصلش لحد ما أرجعلها.
القسوة مكنتش بتوقف عند الصور والرسايل، الموضوع وصل لمرحلة تانية خالص من كسر الخاطر. في ليلة واحنا سهرانين على البحر، قعدت تتدلع عليا وتجرجرني في الكلام، وتشتكي بمسكنة مصطنعة:
«أنا حاسة إنك لسه بتفكر في بيتك الأولاني، وإن قلبك مش معايا لوحدي والست دي لسة مالكة جزء منك».
ساعتها الدم غلي في عروقي وبقيت عايز أثبت لها بأي طريقة إنها كل دنيتي. فتحت قلبي على آخره وقلت بغباء وعمى بصيرة:
«أنا عمري ما حبيت ولا هحب غيرك.. التانية دي مجرد أم لعيالي وبس، رابطني بيها المسئولية والعيلين، لكن إنتي النفس اللي بتنفسه، ومستعد أبيع الدنيا وأضحي بأي حد في سبيل إنج تفضلي راضية ومبسوطة، حتى لو على حساب أي حد تاني».
مكنتش أعرف إنها كانت فاتحة التسجيل وبتسجل كل حرف بنبرة صوتي الواضحة، وبمجرد ما خلصت، ومن غير ما يرمش لها جفن، داست إرسال للتسجيل في شات مراتي الأولى ومعاه رسالة مكتوبة:
«اسمعي جوزك بيقول عليكي إيه يا أم العيال.. عشان تعرفي مكانتك ومكانتي بجد».
لما التليفون رن بعد دقيقة وكان اسم مراتي الأولى على الشاشة، بصيت للتانية لقيتها بتبتسم بخبث ومسكت الموبايل من إيدي وقفلته خالص في وشها وقالتلي ببرود:
«سيبك منها بقى.. الليلة دي بتاعتي أنا وبس».
والمصيبة إني طاوعتها! شفتها وهي بتكوي قلب مراتي الأولى بدم بارد، وعرفت إنها بتستقصد تفرسها وتهين كرامتها هي وعيالي، ومفتحتش بؤي ولا حتى عاتبتها بكلمة.. بالعكس، ابتسمت وخدتها في حضني وكأن كرامة الست اللي صاينة بيتي وعيالي متسواش عندي قشرة بصلة.
لحد ما جه اليوم اللي الكسرة كملت فيه. كانت الساعة داخلة على اتنين بالليل، وتليفوني رن برقم مراتي الأولى. رديت بنفخة وزهق، لقيت صوتها منهار وبيقترعش وبتصرخ في السماعة:
«إلحقني يا عاطف.. ابنك حرارته ولعت وبقت عالية جداً بسبب التهاب شديد في الحلق والأذن، مش قادرة أسيطر عليه والحرارة مش راضية تنزل خالص، تعالى بسرعة وديه المستشفى أنا مش عارفة أتصرف لوحدي!».
قومت مفزوع من على السرير وبدأت أدور على هدومي عشان أنزل، بس مراتي التانية قامت وقفت قدامي وسدت الباب بجسمها، وقالت بصوت عالي واصل بوضوح لمكالمة مراتي الأولى:
«على فكرة دي حركات حريم، بتعمل نمرة وتلكيكة عشان تنكد عليك، أقصاها دور برد صغير والعيال كلها بيجيلها برد.. عشان تثبتلي بجد إنك بتحبني ومفيش حاجة تفرق معاك غيري، خليك هنا ومترروحش واقفل التليفون في وشها».
مراتي الأولى على الخط كانت سامعة كل كلمة، صوت بكاها ورجاها اتقطع بذهول وكسرة:
«ابنك بيتعب أوي في إيدي وبيشتكي.. بتقولك دور برد وتلكيكة وأنت سامعها وساكت؟».
وقفت ثواني بين نارين، بس شيطاني عماني. بصيت لمراتي التانية وشفت في عينيها التحدي، وضعفت قدامها.. رديت ببرود على أم ابني وقلت لها:
«ادي له خافض حرارة واعملي له كمادات وبطلي مبالغة وفزلكة، الولد مفيهوش حاجة ومش مستاهلة أقطع المشوار ده كله بنصاص الليالي عشان شوية حرارة عادية»، وقفلته في وشها وهي بتستنجد بيا.
رميت التليفون على السرير ورجعت نمت، وسبت ابني بيصارع التعب والسخونية، وسبت أمه تجري بيه لوحدها في الشوارع بنصاص الليالي تدور على دكتور ومستشفى مكسورة ومتبهدلة.. كل ده بس عشان أرضي غرور مراتي التانية وأثبت لها حبي.
الصبح طلع، وصحيت على صوت مرفت وهي بتحضر الفطار بمزاج رايق وبتغني، ولا كأن في كارثة حصلت امبارح. مسكت تليفوني ببرود، مكنش في أي رنة ولا رسالة تانية من سوسن، فقلت لنفسي:
«أهو شوفت؟ كان فيلم هندي منها عشان تنكد عليا وتشدني من هنا وخلاص، والواد زمانه بقى زي الفل».
شربت قهوتي مع مرفت ونزلت على الظهر، وقريت أعدي على شقتي الأولى أشوف في إيه ومنها أثبت لنفسي إني مكنتش غلطان. فتحت باب الشقة بالمفتاح.. الهدوء كان مرعب، ريحة البيت مطفية وكئيبة. دخلت الصالة لقيت سوسن قاعدة على طرف الكنبة بهدوم الخروج المتبهدلة، عينيها وارمة من البكا، والكمادات والروشيتة الطبية مرميين على الترابيزة.
أول ما شافتني، متكلمتش.. ولا صرخت.. ولا عاتبت زي كل مرة. بصتلي بنظرة خلت الدم يتجمد في عروقي، نظرة مفيهاش ذرة عشم، مفيهاش غير قرف وانسحاب تام.
اتنحنحت وحاولت أبان تقيل وواثق من نفسي، وقلت بصوت مهزوز:
«أهو جيتلك أهو يا سوسن.. الولد ماله؟ مش قلتلك دور برد تافه ومكنش مستاهل دراما نص الليل؟».
قامت وقفت بهدوء يخوف، وطلعت من جيبها كارت تقرير المستشفى وورقة العلاج، ورزعتهم على الترابيزة قدامي وقالت بصوت ميت، صوت خارج من واحدة خلاص قطعت آخر خيط كان رابطها بيا:
«ابنك كان عنده التهاب حاد وحرارته عدت الحدود وكنت هندخل في مضاعفات لو اتأخرت شوية كمان.. جريت بيه في الشوارع زي المجنونة بمد إيدي للناس عشان ألحق تاكسي ينقذ ابني، وأنت نايم في حضن الست مرفت بتثبت لها حبك يا عاطف».
سكتت ثانية، وبصت في عيني مباشرة وابتسمت بمرارة كسرتني من جوة:
«مبروك يا عاطف.. أنت ومرفت كسبتوا الرهان، أثبت لها إنك راجل معندوش ريحة الدم ولا النخوة، وأثبت لي أنا إن وجودك في حياتنا زي قلته.. من اللحظة دي، ابنك أمانته عند ربنا مش عندك، وأنت مالكش عندي عتاب.. عشان العتاب ما بيتقالش إلا للغاليين، وأنت رخصت نفسك أوي».
سابتني ودخلت قفلت باب أوضة الولاد بالمفتاح من جوة. وقفت مسمر في مكاني في الصالة، الورق في إيدي بيترعش، ولأول مرة أحس بطعم الهوان والذل اللي كنت بسقيهولها بإيدي كل يوم.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
