“شغل إيه ده يا نيرمين؟ ما تفوقي بقى هو إنتي هتعملي فيها دكتورة؟ دي كلها شخبطة تلوين!”
بصيت له في عينه فعلاً.. ما هو بالنسبة لك طول عمره مجرد شخبطة. نفخ بضيق وخرج ورزع الباب.
بعدها بأسبوع، جالي التليفون اللي قلب حياتي: “نيرمين، مبروك! الطبعة الأولى كلها اتحجزت في تلاتين ساعة من المعرض، وداخلين في طبعة تانية فوراً.. ده غير إن في جاليري في الزمالك طالب يعمل معرض مخصوص للوحاتك الأصلية!”
بصيت لإيديا المورمة.. نفس الإيدين اللي حماتي قالت إنها ما تنفعش غير لفرك السمنة والشقا، هي اللي فتحتلي باب عمر العيلة دي ما كانت تحلم تعدي من جنبه.
بس الفرحة ما كملتش ساعتين.. لما أحمد رجع البيت بالليل، وفي إيده كشف حساب البنك اللي كان مخبيه في عربيته بقاله أسابيع. والمفاجأة؟ اسم دينا كان متكرر في تحويلات بمبالغ خيالية…
الورقة اللي كانت في إيد أحمد كانت بترتعش، بس مش من الصدمة زيي، ده كان عرقان ووشه أصفر كأنه ممسوك في جريمة.
أنا وقفت في مكاني وسط المرسم، ريحة ألوان الزيت والورق لسه مالية الأوضة، والفرحة اللي كانت من شوية في قلبي بمكالمة مديرة دار النشر اتبخرت في ثانية واحدة.
صوته طلع عالي ومتحشرج، وحاول يمد إيده يشدها، بس أنا رجعت خطوتين لورا وخليت ترابيزة الرسم الكبيرة حاجز بيني وبينه. عيني نزلت على السطور: التواريخ، والمبالغ، واسم المستفيد. خمسين ألف جنيه في أول شهر، سبعين ألف في شهر أربعة، وتسعين ألف قبل العيد! والمستفيد واحد مفيش غيره: دينا فاروق الحسيني.
رفعت عيني وبصيت له، حسيت وقتها إن الدم في وشي سحب كله لتحت، وركبي كانت هتخوني بس شديت حيلي بالعافية وسندت بطرف صوابعي على طرف الترابيزة:
“قلة قيمة؟ هو مين فينا اللي قليل القيمة بالظبط يا أحمد؟ الفلوس دي بتاعة إيه؟ ده كشف حساب البنك بتاعك اللي بقالك شهور بتتحجج إن الشركة مأخرة مستحقاتك، وإن الدنيا مأزمة، وفي الآخر مطلع أكتر من ميتين ألف جنيه ومحولهم لحساب سلفتي؟ لمرات أخوك؟!”
أحمد اتلخبط، عينيه رايحة جاية في الصالة والطرقة، كأنه بيدور على كدبة مناسبة تترقع في ثواني، قرب من الترابيزة بصوت واطي عشان الجيران: “وطي صوتك يخرب بيتك هتفضحينا في العمارة! إنتي مش فاهمة أي حاجة.. دي فلوس جمعية كانت دافعاها ومستحقات لمشروع، وأنا سديت عنهم لحد ما طارق يرجع من السفر!”
ضحكت.. ضحكة مقهورة وطالعة بشرخ من نص صدري، هزيت راسي وأنا ببص له بقرف: “جمعية؟! طارق أخوك بقاله تمان شهور بيقبض بالدولار في الخليج، وطارق ياما عايرك إنك على باب الله.. طارق يحتاج منك إنت تسد عنه؟ وإنت لو بتسد عن أخوك، التحويل يروح باسم دينا ليه؟ دينا اللي كل ما تقعد في قعدة تفرد ضهرها وتتمنظر إن لبسها بالشيء الفلاني، تطلع بتاخد من شقى جوزي أنا؟!”
“اخرسي بقى!” أحمد زعق وخبط كفه على الترابيزة: “ما تغلطيش في دينا! دينا ست محترمة ومش زي تفكيرك العقيم ده! دينا كانت بتمول مشروع كتاب جديد مع الدار، وفلوسها كانت مجمدة في البنك، وطلبت مني أقف جنبها سلفة مؤقتة، وإنتي عارفة إن أمي هي اللي طلبت مني كده!”
الكلمة نزلت على دماغي زي المية النار: “أمي هي اللي طلبت مني؟!”
يعني حماتي صفاء، اللي كانت قبل أسبوعين بس واقفة فوق راسي في المطبخ بتزعقلي عشان صينية الجلاش خدت معلقتين سمنة زيادة وبتقولي وفري عشان جوزك طالع عينه في المصاريف، هي نفسها اللي قاعدة تملي في ودان ابنها عشان يحول تحويشة عمره لسلفتي الهانم!
مسكت الورقة وطبقتها بهدوء مريب.. هدوء فاجئ أحمد نفسه، هو كان متوقع إني أصرخ أو أكسر حاجة، لكن الوجع لما بيعدي مرحلة معينة، بيتحول لتلج.
حطيت الورقة في جيب الروب، ووقفت قصاده مستقيمة: “تمام يا أحمد.. دي كانت سلفة عشان خاطر مامتك وخاطر البرنسيسة.. حلو أوي. الورقة دي بتاعتي، ومش هتاخدها. وعايزة أشوف بقى طارق هيرجع مليم واحد من اللي البرنسيسة لهفته ولا لأ.”
سبته ودخلت أوضتي، قفلت الباب بالمفتاح من جوة، وقعدت على حافة السرير. السكون كان تقيل ومخيف. دموعي ما نزلتش، حسيت بنار قايدة في راسي، وبدأت أربط الخيوط اللي فاتت كلها ببعض. دينا كانت دايماً في كل عزومة تلمح إن الدار طالبة منها تكاليف دعاية وتسويق، وكانت حماتي تبصلي وتقول: “شوفي الشغل اللي عليه القيمة! مش اللي قاعدة تشخبط شوية كارتون في البيت ومحدش بيعبرها!”
طلعت تليفوني، فتحت محادثة الواتساب مع أستاذة ماجدة، مديرة دار النشر. الوقت كان متأخر، حوالي حداشر بالليل، بس هي كانت لسه أونلاين.
كتبت لها: “مساء الخير يا أستاذة ماجدة، بعتذر عن الإزعاج، بس كنت عايزة أستفسر من حضرتك عن حاجة.. هل بتتعاملي أو تعرفي كاتبة اسمها دينا فاروق الحسيني؟”
مرت دقيقتين، وبعدها رسالة صوتية من ماجدة:
“أهلاً يا نيرمين، لا إزعاج ولا حاجة يا حبيبتي. دينا الحسيني؟ طبعاً عارفاها! دي كانت لافة على دور النشر كلها في المعادي ووسط البلد من سنة تقريباً عشان تطبع رواية على حسابها الشخصي! إنتي عارفة يا نيرمين في ناس بتدفع من جيبها مبالغ ضخمة عشان الدار توافق تنزل كتابهم باسمهم ويعملوا شو إعلامي، وهي روايتها أصلاً ضعيفة ومحدش رضي يقبلها غير دار نشر صغيرة بتطلب أرقام فلكية.. ليه؟ هو إنتي تعرفيها منين؟”
سمعت الريكورد وأنا حاسة بقلبي بيدق طبول حرب. دينا ما كانتش بتكسب مليم من الكتابة! دينا كانت بتدفع شقى جوزي وفلوس تعبنا عشان تطبع ورق وتعمل بيه برستيج قدام حماتي وناس العيلة، وتطلع هي العبقرية الفذة وأنا الخدامة!
