الورقة وقعت من إيد أحمد على الأرض كأنها جمرة. حماتي وطت بسرعة، مسكت الورقة بإيد بتترعش، وبصت فيها وهي بتحاول تقرأ المكتوب… لكن عينيها وسعت فجأة، ووشها اصفر كأنه ميت.
أما نجلاء، ففضلت واقفة مش فاهمة، وبتبص لأحمد ولأمها وهي بتقول بارتباك:
“في إيه يا ماما؟! إيه الورق ده يا أحمد؟! مالكم اتسمرتوا كده ليه؟!”
أحمد مكنش سامعها أصلاً. كان باصصلي، ريقه ناشف، وشفايفه بتتحرك بصعوبة من غير صوت… كأنه شاف عفريت.
قربت منه خطوة واحدة، وبصيت في عينيه بمنتهى الثبات والبرود:
“إيه يا باشمهندس؟ لسانك اتعقد ليه؟ ما تقرأ لأمك وأختك بصوت عالي… قريّهم إشعار إيقاف الحسابات البنكية والقرض، ووريهم صورة عقد جوازك السري اللي متجوزها بقالك سنة!”
الكلمة نزلت على الصالة زي القنبلة. حماتي رجعت خطوة لورا وخبطت في الحيطة، ونجلاء شهقت شهقة خلت عيالها يسكتوا ويبصولها برعب:
“متجوز؟! جواز إيه؟! أحمد… أنت متجوز على مراتك؟! والشقة دي منين؟!”
أحمد كان بيبلع ريقه بصعوبة، وحاول يجمع بقايا هيبته، وزعق بصوت مرعوش:
“أنتِ… أنتِ فتحتي تليفوني؟! إزاي تفتشي في حاجتي؟! ده تعدي على خصوصيتي!”
ضحكت. ضحكت بصوت عالي رن في الشقة كلها، لدرجة إنه هو نفسه اتخض.
“تتكلم عن الخصوصية يا حيلة أمك؟! ده أنت اللي مسألة وقت وحقوقك القانونية كلها هتتصفى! الورقة اللي في إيدك دي إنذار رسمي باتهامك بالتلاعب المالي وإخفاء حقوق شريكة حياتك… استغلت توقيعي وأوراقي الخاصة من غير علمي عشان تضمن قرض كبير وتشتري بيه شقة لست الحسن والجمال!”
حماتي بدأت تلطم على خدها وهي مرعوبة:
“يالهوي… تلاعب ومشاكل إيه يا دكتورة؟! استهدي بالله، ده بيتك وأبو عيالك!”
لفيت لحماتي، وابتسمت ابتسامة هادئة:
“بيتي؟! دلوقتي بقى بيتي وأبو عيالي؟! مش من نص ساعة بس كنتي جاية تقعدي حاطة رجل على رجل وعايزاني أخدمك وأخدم ولاد بنتك عشان أنا مكسورة الجناح؟! مش أنتِ اللي قايلاله في الشات: ‘اضغط عليها عشان تخاف وما تعرفش حاجة عن الشقة التانية’؟!”
نجلاء وشها جاب ألوان، وبصت لأمها ولأحمد وهي مندمجة في الصدمة:
“يعني أنتوا كنتوا عارفين ومخبيين عليا؟! وأنا جاية الصبح عشان تخدم عيالي وأنتوا بتلعبوا من ورايا ومخبيين أموال وشقق بالملايين؟!”
البيت اتقلب سيرك في ثانية. الخيانة والغدر لما بيتكشفوا، بيخلوا اللي متفقين على الشر ياكلوا في بعض. أحمد قرب مني، ومد إيده يحاول يمسك دراعي وهو بتترجى:
“سارة… اسمعيني بس، والله الموضوع مش زي ما أنتِ فاهمة، الموضوع ده مجرد نزوة والفلوس هترجع… متخربيش بيتنا، البنات ذنبهم إيه؟!”
رجعت خطوة لورا، وبصيت لإيده بقرف كأنه حشرة:
“إيدك متلمسنيش! والبنات اللي بتفتكرهم دلوقتي، هما نفس البنات اللي كنت بتبخل عليهم بالمليم وبتقولي ‘شيلي معايا أنا حسابي على الصفر’ وأنت شايل في حسابك مبالغ كبيرة وبتصرف ببذخ!”
طلعت تليفوني، وشغلت الشاشة قدام وشه:
“الساعة دلوقتي سبعة ونص. المحامي بتاعي أنهى إجراءات دعوى الطلاق للضرر، ودعوى استرداد الحقوق المالية، وتقديم بلاغات رسمية لإدارة الجهة اللي بتشتغل فيها بسبب التجاوز الإداري.”
أحمد وقع على ركبه. بقلم مـنال عـلي
الراجل اللي كان واقف إمبارح بالليل رافع راسه لفوق وبيهددني إنه هيرميني في الشارع، بقى مرمي تحت رجلي ودموعه بتنزل بقلة حيلة.
“أبوس إيدك يا سارة… شغلي هيضيع، عشان خاطر البنات!”
بصيت لبناتي اللي كانوا واقفين ورايا، ماسكين في هدومي بس عينيهم مش خايفة… عينيهم كانت شايفة أمهم واقفة زي الجبل وبتاخد حقهم تالت ومتلت. نزلت لمستواه، وهمستله بصوت يسمعه الكل:
“أنت اللي خيّرتني إمبارح يا أحمد… قولتلي ‘يا الشغل يا الطلاق’… وأنا اختارت كرامتي وشغلي وحق بناتي. ورقة طلاقي هتوصلني رسمي بالمحكمة، والشقة دي بقوة القانون هتبقى شقة الحضانة ليا وللبنات… ومعاهم حقوقنا الكاملة.”
التفتت لحماتي ونجلاء اللي كانوا واقفين زي الأصنام من الصدمة:
“اتفضلوا برة بيتي… وخدوا معاكم ابنكم.”
حماتي حاولت تتكلم، لكن نجلاء شدتها وهي بتعيط ومكسوفة من الفضيحة وسط الجيران اللي بدأوا يتجمعوا على صوت الزعيق. أحمد خرج وراهم، ضهره محني وراسه في الأرض، مكسور ومذلول بالظبط زي ما كان مخطط يكسرني.
قفلت الباب وراهم بالمفتاح. حسيت بهدوء عمري ما حسيته في حياتي. قعدت على الكنبة، وبناتي ارتموا في حضني، بس المرة دي مكنش عياط خوف… كان عياط راحة وأمان. مسحت على شعر مريم وبوست راس لينا، وقولتلهم:
“خلاص يا حبايب ماما… مفيش خوف بعد النهاردة.”
مرت ست شهور.
أحمد خسر منصبه ووظيفته بعد التحقيقات الإدارية، وبقى يلف يدور على أي وظيفة تسد ديونه ومصاريف بناته اللي القانون فرضها عليه غصب عنه.
ونهى؟ أول ما عرفت إن الشقة راحت، وإن وظيفته وفلوسه طاروا، رفعت عليه قضايا وافتصلت عنه في أول شهر.
أما أنا…
الصيدلية اللي كان عايزني أسيبها، ربنا كرمني فيها واترأيت وبقيت مديرة الفرع. بناتي كبروا في بيئة هادية ومليانة حب وسلام، بعيد عن التوتر والإهانة.
اتعلمت إن الست لما بتضحي وتيجي على نفسها عشان ترضي راجل مبيشوفش غير نفسه، التضحية بتتحول لفرض والفرض بتتحول لإهانة. بس اتعلمت كمان… إن الست اللي تبني نفسها بشغلها وتعتمد على ربها ثم دراعها، مفيش راجل في الدنيا يقدر يكسرها.
(هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.)
